ಓಲ್ಡ್‌ ಮಾಂಕ್‌ಗೆ ಮಲಯಾಳಂ ನಟ ಸುದೇವ್‌ ನಾಯರ್‌ ಎಂಟ್ರಿ

Team Udayavani, Jul 10, 2020, 10:16 AM IST

ನಟ ಕಂ ನಿರ್ದೇಶಕ ಶ್ರೀನಿ ಅವರ ಮುಂದಿನ ಚಿತ್ರ ಓಲ್ಡ್‌ ಮಾಂಕ್‌ ಸದ್ಯ ಚಿತ್ರೀಕರಣದ ಹಂತದಲ್ಲಿದೆ. ರೊಮ್ಯಾಂಟಿಕ್‌ ಡ್ರಾಮಾ ಕಥಾಹಂದರ ಹೊಂದಿರುವ ಈ ಚಿತ್ರದಲ್ಲಿ ನಾಯಕನ ಪಾತ್ರ ನಿರ್ವಹಿಸುತ್ತಿರುವ ಶ್ರೀನಿವಾಸ್‌ ಮಲಯಾಳಂ ಮತ್ತು ಹಿಂದಿ ಚಿತ್ರರಂಗದಲ್ಲಿ ಸಾಕಷ್ಟು ಜನಪ್ರಿಯವಾಗಿರುವ ಸುದೇವ್‌ ನಾಯರ್‌ ಅವರನ್ನು ಕನ್ನಡಕ್ಕೆ ಕರೆತರುತ್ತಿದ್ದಾರೆ. ಕೇರಳ ಮೂಲದ ಪ್ರಶಸ್ತಿ ವಿಜೇತ ನಟ ಸುದೇವ್‌ ನಾಯರ್‌ “ಓಲ್ಡ್‌ ಮಾಂಕ್‌’ ಚಿತ್ರದಲ್ಲಿ ವಿಲನ್‌ ಪಾತ್ರ ಮಾಡುತ್ತಿದ್ದಾರೆ.

ವಿಲನ್‌ ಪಾತ್ರಕ್ಕೆ ಹೊಸ ಮುಖವನ್ನು ಹುಡುಕುತ್ತಿದ್ದ ಶ್ರೀನಿಗೆ ಸುದೇವ್‌ ನಾರ್ಯ ತಕ್ಕ ಆಯ್ಕೆ ಎಂದು ಅನಿಸಿದ್ದರಿಂದ, ಅವರನ್ನೇ ಈ ಚಿತ್ರದಲ್ಲಿ ಕರೆತರಲು ಯೋಚಿಸಿದ್ದಾರಂತೆ. ಈ ಬಗ್ಗೆ ಮಾತನಾಡುವ ಶ್ರೀನಿ, ಈ ಸಿನಿಮಾದಲ್ಲಿ ಇಲ್ಲಿನ ಆಡಿಯನ್ಸ್‌ ಗೆ ಹೊಸದೆನಿಸುವ ಮುಖದ ಖಳನಾಯಕನ ಅಗತ್ಯತೆಯಿತ್ತು. ಆಗ ನಮಗೆ ಕಂಡಿದ್ದು ಸುದೇವ್‌ ನಾಯರ್‌. ಈಗಾಗಲೇ ಬಾಲಿವುಡ್‌ ನಲ್ಲಿ ಅರ್ಜುನ್‌ ಕಪೂರ್‌ ಅವರು ಭಾಗವಹಿಸಿದ್ದ ಇಂಡಿಯಾಸ್‌ ಮೋಸ್ಟ್‌ ವಾಂಟೆಡ್‌’, ಗುಲಾಬ್‌ ಗ್ಯಾಂಗ್‌ನಲ್ಲಿ ಭಾಗವಾಗಿದ್ದರು.

ನೊ ಫಿಟ್‌ ಫಾರ್‌ ದಿ ವೈರಲ್‌ ಫೀವರ್‌’ ಮತ್ತು ಡೈಸ್‌ ಮೀಡಿಯಾ ವೆಬ್‌ ಸೀರಿಸ್‌ ನಲ್ಲಿ ಸುದೇವ್‌ ಅಭಿನಯಿಸಿದ್ದಾರೆ. ಇನ್ನು ಮಲಯಾಳಂನಲ್ಲಿ “ಅನಾರ್ಕಲಿ’, ಕರಿಂಕುನ್ನಮ್‌ 6′, ಸ್ಲಿಪ್‌ ಲೆಸ್ಲಿ ಯುವರ್ಸ್‌’, “ಎಜ್ರಾ’ ಮೊದಲಾದ ಸಿನಿಮಾಗಳಲ್ಲಿ ಸುದೇವ್‌ ನಾಯರ್‌ ಅದ್ಭುತ ಅಭಿನಯ ನೀಡಿದ್ದಾರೆ. ಅಂತೆಯೇ ನಮ್ಮ ಸಿನಿಮಾದಲ್ಲೂ ಸುದೇವ್‌ ನಾಯರ್‌ ಹೊಸಲುಕ್‌ ನಲ್ಲಿ ಕಾಣಿಸಿಕೊಳ್ಳಲಿದ್ದಾರೆ’ ಎನ್ನುತ್ತಾರೆ.

ಉಳಿದಂತೆ ಓಲ್ಡ್‌ ಮಾಂಕ್’ ಚಿತ್ರದಲ್ಲಿ ಶ್ರೀನಿಗೆ ನಾಯಕಿಯಾಗಿ ಅದಿತಿ ಪ್ರಭುದೇವ ಜೋಡಿಯಾಗುತ್ತಿದ್ದಾರೆ. ನಿರ್ದೇಶಕ ಹಾಗೂ ನಟ ಎಸ್‌. ನಾರಾಯಣ…, ಅರುಣಾ ಬಾಲರಾಜ್‌ ಚಿತ್ರದ ಇತರ ಪ್ರಮುಖ ಪಾತ್ರಗಳಲ್ಲಿ ಅಭಿನಯಿಸುತ್ತಿದ್ದಾರೆ. ಚಿತ್ರಕ್ಕೆ ಸೌರಭ್‌ ವೈಭವ್‌ ಸಂಗೀತ, ಭರತ್‌ ಪರಶುರಾಮ್‌ ಛಾಯಾಗ್ರಹಣವಿದೆ. ಈಗಾಗಲೇ ಶೇಕಡಾ 40ರಷ್ಟು ಚಿತ್ರೀಕರಣ ಮುಗಿಸಿರುವ ಓಲ್ಡ್‌ ಮಾಂಕ್‌ ಚಿತ್ರತಂಡ, ಹಂತಹಂತವಾಗಿ ಶೂಟಿಂಗ್‌ ಕಂಪ್ಲೀಟ್‌ ಮಾಡುವ ಪ್ಲಾನಿಂಗ್‌ನಲ್ಲಿದೆ.

*‌ ಕಾರ್ತಿಕ ಸುಧನ್