Mangaluru: ಶ್ರೀ ಸುಧೀಂದ್ರ ಸ್ಮರಣ ಗುರು ವಂದನ ಕಾರ್ಯಕ್ರಮ, ಭಾವಚಿತ್ರ ಪಲ್ಲಕಿ ಉತ್ಸವ

Team Udayavani, Jan 10, 2025, 11:26 PM IST

ಮಂಗಳೂರು: ಶ್ರೀ ಕಾಶಿ ಮಠಾಧೀಶರಾದ ಶ್ರೀಮತ್‌ ಸುಧೀಂದ್ರತೀರ್ಥ ಸ್ವಾಮೀಜಿ ಅವರ ಜನ್ಮಶತಾಬ್ಧ ಪ್ರಯುಕ್ತ ಎಸ್‌ವಿಟಿ ವಾಲೆಂಟೀರ್ ಅಸೋಸಿಯೇಶನ್‌ ವತಿಯಿಂದಶುಕ್ರವಾರ ನಗರದ ರಥಬೀದಿಯಲ್ಲಿರುವ ಶ್ರೀ ವೆಂಕಟರಮಣ ದೇವಸ್ಥಾನದಿಂದ ಸ್ವಾಮೀಜಿಯವರ ಭಾವಚಿತ್ರದ ಪಲ್ಲಕಿ ಉತ್ಸವದ ಭವ್ಯ ಮೆರವಣಿಗೆ ನಡೆಯಿತು.

ದೇಗುಲದ ಸ್ವಯಂಸೇವಕರು ಹಾಗೂ ಭಜಕರು ಆಬಾಲ ವೃದ್ಧ ಸ್ತ್ರಿ ಪುರುಷರೊಡಗೂಡಿ ವಿಶೇಷ ಚಂಡೆ ವಾದ್ಯ, ವಿವಿಧ ಭಜನ ಮಂಡಳಿಯವರಿಂದ ಭಜನೆ ದೇಗುಲದಿಂದ ಹೊರಟು ಮಹಾ ಮಾಯ ದೇವಸ್ಥಾನ ರಸ್ತೆ, ಗದ್ದೆಕೇರಿ, ಡೊಂಗರಕೇರಿ ಕಟ್ಟೆ ಮೂಲಕ ಕೆನರಾ ಹೈಸ್ಕೂಲ್‌ನ ಶ್ರೀ ಸುಕೃತೀಂದ್ರ ಕಲಾ ಮಂಟಪದಲ್ಲಿ ಶ್ರೀ ಸುಧೀಂದ್ರ ಸ್ಮರಣ ಗುರು ವಂದನ ಕಾರ್ಯಕ್ರಮ ನಡೆಯಿತು.

ಡಾ| ಎಂ. ರಾಘವೇಂದ್ರ ಆಚಾರ್ಯ ಅವರಿಂದ ಶ್ರೀ ಗುರು ಗುಣಗಾನ ನೆರವೇರಿತು. ಪಂಡಿತ್‌ ನರಸಿಂಹ ಆಚಾರ್ಯರು ಧಾರ್ಮಿಕ ಕಾರ್ಯಕ್ರಮಗಳನ್ನು ನೆರವೇರಿಸಿದರು. ನಮನ ಪಠಣ, ಭಜನ ಸಂಕೀರ್ತನೆ ನಡೆದು ಬಳಿಕ ಪಂಡಿತ್‌ ರಾಘವೇಂದ್ರ ಆಚಾರ್ಯ ಅವರಿಗೆ ಎಸ್‌ವಿಟಿ ವಾಲೆಂಟೀರ್ ಅಸೋಸಿಯೇಶನ್‌ ವತಿಯಿಂದ ಸಮ್ಮಾನ ಕಾರ್ಯಕ್ರಮ ಜರಗಿತು. ನರಸಿಂಹ ಭಟ್‌ ಕಾರ್ಯಕ್ರಮ ನಿರ್ವಹಿಸಿದರು.

ಅಸೋಸಿಯೇಶನ್‌ ಅಧ್ಯಕ್ಷ ಸುರೇಶ್‌ ವಿ. ಕಾಮತ್‌, ಉಪಾಧ್ಯಕ್ಷ ಸಾಹುಕಾರ್‌ ಕಿರಣ್‌ ಪೈ, ಕಾರ್ಯದರ್ಶಿ ಕೆ. ಮಂಜುನಾಥ್‌ ಶೆಣೈ, ಕೋಶಾಧಿ ಕಾರಿ ಸುಧಿಧೀರ್‌ ಭಗತ್‌, ಅಡಿಗೆ ದಾಮೋದರ ಶೆಣೈ, ಹರೀಶ್‌ ಕಾಮತ್‌, ದೇಗುಲದ ಆಡಳಿತ ಮೊಕ್ತೇಸರರಾದ ಅಡಿಗೆ ಬಾಲಕೃಷ್ಣ ಶೆಣೈ, ಸತೀಶ್‌ ಪ್ರಭು, ಗಣೇಶ್‌ ಕಾಮತ್‌, ಜಗನ್ನಾಥ್‌ ಕಾಮತ್‌ ಉಪಸ್ಥಿತರಿದ್ದರು.