Metaverse Game: ಬಾಲಕಿಯ ಮೇಲೆ ವರ್ಚುವಲ್‌ ಗ್ಯಾಂಗ್‌ ರೇಪ್‌!

Team Udayavani, Jan 3, 2024, 11:31 PM IST

ಲಂಡನ್‌: ಮೆಟಾವರ್ಸ್‌ ಗೇಮ್‌ನಲ್ಲಿ 16 ವರ್ಷದ ಬಾಲಕಿಯ ಮೇಲೆ ವರ್ಚುವಲ್‌ ಆಗಿ ಸಾಮೂಹಿಕ ಅತ್ಯಾಚಾರ ನಡೆಸಿದ ಘಟನೆ ಲಂಡನ್‌ನಲ್ಲಿ ವರದಿಯಾಗಿದೆ. ಈ ಸಂಬಂಧ ಬ್ರಿಟನ್‌ ಪೊಲೀಸರು ಪ್ರಕರಣ ದಾಖಲಿಸಿಕೊಂಡಿದ್ದಾರೆ. ಈ ರೀತಿಯ ಘಟನೆ ದಾಖಲಾಗಿ­ರುವುದು ಇದೇ ಮೊದಲು. ಮಾಲ್‌ವೊಂದರಲ್ಲಿ ಬಾಲಕಿ ವರ್ಚುವಲ್‌ ರಿಯಾಲಿಟಿ(ವಿಆರ್‌) ಹೆಡ್‌ಸೆಟ್‌ ಹಾಕಿ ಕೊಂಡು, ಅದರಲ್ಲೇ ಸಂಪೂರ್ಣವಾಗಿ ತಲ್ಲೀನವಾಗುವ ಆಟ ಆಡುತ್ತಿದ್ದಳು.

ಈ ವೇಳೆ ಆಟದಲ್ಲಿ ಅವಳ “ಅವತಾರ್‌’ ಪಾತ್ರದ ಮೇಲೆ ಹಲವು ಪುರುಷ “ಅವತಾರ್‌’ ಪಾತ್ರಗಳು ಲೈಂಗಿಕ ದೌರ್ಜನ್ಯ ನಡೆಸಿ, ಸಾಮೂಹಿಕ ಅತ್ಯಾಚಾರ ಎಸಗಿದ್ದಾರೆ. “ತಂತ್ರಜ್ಞಾನ ವ್ಯಾಪಕವಾಗಿ ಬೆಳೆಯುತ್ತಿರುವ ಈ ಹೊತ್ತಿನಲ್ಲಿ ಈ ಪ್ರಕರಣವನ್ನು ಗಂಭೀರವಾಗಿ ಪರಿಗಣಿಸಬೇಕಾಗುತ್ತದೆ. ಬಾಲಕಿಯ ಮೇಲೆ ದೈಹಿಕವಾಗಿ ಅತ್ಯಾಚಾರ ನಡೆಯದಿದ್ದರೂ, ಆಕೆ ಮಾನಸಿಕ ಹಿಂಸೆ ಅನುಭವಿಸಿದ್ದಾಳೆ. ಮಾನಸಿಕವಾಗಿ ಜರ್ಜರಿತಳಾಗಿದ್ದಾಳೆ. ಈ ರೀತಿಯ ಗೇಮ್‌ಗಳು ಆರೋಗ್ಯಕರವಲ್ಲ. ಈ ಪ್ರಕರಣದ ತನಿಖೆ ಪ್ರಗತಿಯಲ್ಲಿದೆ’ ಎಂದು ಪೊಲೀಸ್‌ ಅಧಿಕಾರಿಗಳು ತಿಳಿಸಿದ್ದಾರೆ.