ಅಂತಾರಾಜ್ಯ ಪ್ರವೇಶ ನಿರ್ಬಂಧ ತೆರವು: ಗೋವಾದಲ್ಲಿ ಪ್ರವಾಸಿಗರ ಸಂಖ್ಯೆ ಹೆಚ್ಚಳ

Team Udayavani, Sep 3, 2020, 2:39 PM IST

ಪಣಜಿ: ಕೇಂದ್ರ ಸರ್ಕಾರದ ಅನ್‌ಲಾಕ್‌ ಮಾರ್ಗಸೂಚಿ ಅಡಿಯಲ್ಲಿ ಸೆ. 1ರಿಂದ ಗೋವಾ ರಾಜ್ಯ ಪ್ರವೇಶಕ್ಕಿದ್ದ ಎಲ್ಲ ನಿರ್ಬಂಧ ತೆಗೆದುಹಾಕಿರುವ ಹಿನ್ನೆಲೆಯಲ್ಲಿ ಗೋವಾಕ್ಕೆ ಆಗಮಿಸುವ ವಾಹನಗಳ ಸಂಖ್ಯೆಯಲ್ಲಿ ಭಾರಿ ಹೆಚ್ಚಳವುಂಟಾಗಿದೆ. ಕರ್ನಾಟಕ ಮತ್ತು ಮಹಾರಾಷ್ಟ್ರ ರಾಜ್ಯಗಳಿಂದ ಗೋವಾಕ್ಕೆ ಆಗಮಿಸುವ ಪ್ರವಾಸಿಗರ ಸಂಖ್ಯೆಯಲ್ಲಿ ಹೆಚ್ಚಳ ಕಂಡುಬಂದಿದೆ.

ಆರು ತಿಂಗಳ ನಂತರ ಇದೀಗ ಗೋವಾ ಗಡಿ ತೆರವುಗೊಳಿಸಲಾಗಿರುವುದರಿಂದ ಗೋವಾದತ್ತ ಪ್ರವಾಸಿಗರು ಮುಖಮಾಡುತ್ತಿದ್ದಾರೆ. ಗೋವಾ ಬೀಚ್‌ಗಳಲ್ಲಿ ಬುಧವಾರ ಪ್ರವಾಸಿಗರು ಕಂಡುಬರುತ್ತಿದ್ದಾರೆ. ಗೋವಾದಲ್ಲಿ ಬಾರ್‌ ಮತ್ತು ರೆಸ್ಟೊರೆಂಟ್‌ಗಳನ್ನು ತೆರೆಯಲು ಅನುಮತಿ ನೀಡಲಾಗಿದೆ.

ಅಕ್ಟೋಬರ್‌ನಿಂದ ಪ್ರತಿವರ್ಷ ಗೋವಾದ ಪ್ರವಾಸಿ ಹಂಗಾಮ ಆರಂಭಗೊಳ್ಳುತ್ತದೆ. ಇದೀಗ ನೆರೆಯ ರಾಜ್ಯಗಳಿಂದ ಗೋವಾಕ್ಕೆ ಆಗಮಿಸಲು ಇದ್ದ ಎಲ್ಲ ನಿರ್ಬಂಧ ತೆಗೆದುಹಾಕಲಾಗಿರುವುದರಿಂದ ಗೋವಾಕ್ಕೆ ದೇಸಿಯ ಪ್ರವಾಸಿಗರು ಹೆಚ್ಚಿನ ಸಂಖ್ಯೆಯಲ್ಲಿ ಗೋವಾಕ್ಕೆ ಆಗಮಿಸುವ ನಿರೀಕ್ಷೆ ಹೊಂದಲಾಗಿದೆ. ಆದರೆ ಅಂತಾರಾಷ್ಟ್ರೀಯ ಪ್ರವಾಸಿಗರು ಸದ್ಯಕ್ಕೆ ಆಗಮಿಸುವುದು ಮಾತ್ರ ಅಸಾಧ್ಯ ಎಂಬಂತಾಗಿದೆ.