ಕಟ್ಟಡದೊಳಗೊಂದು ನಗರವ ಮಾಡಿ…!ಸೌದಿ ಪ್ರಾಜೆಕ್ಟ್ “ಮುಕಾಬ್‌’ ವೀಡಿಯೋ ವೈರಲ್‌

Team Udayavani, Feb 21, 2023, 7:17 AM IST

ರಿಯಾದ್‌: ಹಲವು ಗಗನಚುಂಬಿ ಕಟ್ಟಡಗಳ ನಿರ್ಮಾಣದ ಮೂಲಕ ವಿಶ್ವ ದಾಖಲೆಗಳನ್ನು ಬರೆದಿರುವ ಸೌದಿ ಅರೇಬಿಯಾ ಈಗ ಮತ್ತೂಂದು “ಎಂಜಿನಿಯರಿಂಗ್‌ ವಿಸ್ಮಯ’ಕ್ಕೆ ಸಾಕ್ಷಿಯಾಗಲಿದೆ.

ಬೃಹತ್‌ ಕಟ್ಟಡದೊಳಗೆ ಒಂದಿಡೀ ನಗರವೇ ಇರುವಂಥ “ಮುಕಾಬ್‌'(ನ್ಯೂ ಮುರಬ್ಟಾ) ಎಂಬ ಹೊಸ ಪ್ರಾಜೆಕ್ಟ್ ಅನ್ನು ದೇಶದ ರಾಜಧಾನಿ ರಿಯಾದ್‌ನಲ್ಲಿ ಕೈಗೆತ್ತಿ­ಕೊಳ್ಳಲು ನಿರ್ಧರಿಸಿದೆ. ಈ ಪ್ರಸ್ತಾವಿತ ಯೋಜನೆಯ ನೀಲನಕ್ಷೆಯ ವೀಡಿಯೋ ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್‌ ಆಗಿದೆ.

ಇಡೀ ಕಟ್ಟಡವು ನೋಡಲು ಟೊಳ್ಳಾದ ಘನಾಕೃತಿಯನ್ನು ಹೊಂದಿರಲಿದೆ. ವಿಶೇಷ­ವೆಂದರೆ, ನ್ಯೂಯಾರ್ಕ್‌ನಲ್ಲಿರುವ ಎಂಪೈರ್‌ ಸ್ಟೇಟ್‌ ಬಿಲ್ಡಿಂಗ್‌ನಷ್ಟು ದೊಡ್ಡದಾದ 20 ಕಟ್ಟಡಗಳನ್ನು ಇದರೊಳಗೆ ನಿರ್ಮಿಸಬಹು­ದಾಗಿದೆ.

ಮುಕಾಬ್‌ನೊಳಗೆ ಮ್ಯೂಸಿಯಂ, ತಂತ್ರಜ್ಞಾನ ಮತ್ತು ವಿನ್ಯಾಸ ವಿಶ್ವವಿದ್ಯಾನಿಲಯ, ಬಹೂಪಯೋಗಿ ಥಿಯೇಟರ್‌, 80ಕ್ಕೂ ಹೆಚ್ಚು ಮನರಂಜನ ಹಾಗೂ ಸಾಂಸ್ಕೃತಿಕ ತಾಣಗಳು ಇರಲಿವೆ.

ಮುಕಾಬ್‌ನ ಒಟ್ಟಾರೆ ವಿಸ್ತೀರ್ಣ 25 ದಶಲಕ್ಷ ಚದರ ಕಿ.ಮೀ. ಆಗಿದ್ದು, 1.04 ಲಕ್ಷ ವಸತಿ ಗೃಹಗಳು, 9 ಸಾವಿರ ಹೊಟೇಲ್‌ ರೂಂಗಳು, ಮಳಿಗೆಗಳಿಗಾಗಿ 9.80 ಲಕ್ಷ ಚದರ ಮೀಟರ್‌ ಪ್ರದೇಶ, 1.4 ದಶಲಕ್ಷ ಚದರ ಮೀಟರ್‌ ಆಫೀಸ್‌ ಸ್ಪೇಸ್‌ ಸಹಿತ ಹಲವು ಸೌಕರ್ಯಗಳು ಇದರಲ್ಲಿ ಇರಲಿವೆ. 2030ರಲ್ಲಿ ನಿರ್ಮಾಣ ಕಾರ್ಯ ಪೂರ್ಣಗೊಳ್ಳುವ ನಿರೀಕ್ಷೆಯಿದೆ.