ಮ್ಯಾನ್ಮಾರ್‌: ಹೊರಗಿನಿಂದಲೇ ಸೋಂಕು

Team Udayavani, Jun 19, 2020, 10:52 AM IST

ಯಾಂಗೂನ್‌: ಮ್ಯಾನ್ಮಾರ್‌ನಲ್ಲೂ ಕೋವಿಡ್‌ ಪ್ರಕರಣಗಳ ಸಂಖ್ಯೆ ಏರಿಕೆ ಕಾಣುತ್ತಿದ್ದು, ನಿಯಂತ್ರಣ ಸವಾಲೆನಿಸಿದೆ.
ಈವರೆಗೆ 262 ಪ್ರಕರಣಗಳು ವರದಿಯಾಗಿದ್ದು, 6 ಮಂದಿ ಮೃತಪಟ್ಟಿದ್ದಾರೆ. ಕೋವಿಡ್‌ ಸೋಂಕು ಪೀಡಿತರಲ್ಲಿ ಹೆಚ್ಚಿನವರು ರೊಹಿಂಗ್ಯಾ ಸಮುದಾಯದವರಾಗಿದ್ದು, ಇವರಿಗೆಲ್ಲ ಹೊರಗಿನಿಂದಲೇ ಸೋಂಕು ಬಂದಿದೆ ಎಂದು ಅಲ್ಲಿನ ಅಧಿಕಾರಿಗಳು ಹೇಳಿದ್ದಾರೆ.

ಮ್ಯಾನ್ಮಾರ್‌, ಬಾಂಗ್ಲಾದೇಶದೊಂದಿಗೆ ಗಡಿ ಹಂಚಿಕೊಂಡಿದ್ದು, ಅಲ್ಲಿಂದ ಬಂದವರೇ ಈಗ ಕೋವಿಡ್‌ ಸೋಂಕು ಹರಡಲು ಕಾರಣವಾಗಿದ್ದಾರೆ ಎಂದು ಅಧಿಕಾರಿಗಳು ಹೇಳುತ್ತಾರೆ. ಕೆಲವರು ಅಕ್ರಮ ವಾಗಿಯೂ ಬಂದಿರಬಹುದು ಎನ್ನುವುದು ಅವರ ಆರೋಪ. ಇನ್ನು ಒಟ್ಟು ಸೋಂಕಿತರಲ್ಲಿ ಮೂರನೇ ಒಂದರಷ್ಟು ಪಾಲು ರೊಹಿಂಗ್ಯಾ ಮಹಿಳೆಯರೇ ಇದ್ದಾರೆ. ಮ್ಯಾನ್ಮಾರ್‌ನ ಮಾಂಗ್ಡಾವ್‌ ಎಂಬಲ್ಲಿ ಅತಿ ಹೆಚ್ಚು ಸೋಂಕು ಪೀಡಿತರು ಕಂಡುಬಂದಿದ್ದು, ಎಲ್ಲ ರೋಗಿಗಳಲ್ಲಿ ಈಗ ಆಸ್ಪತ್ರೆಗೆ ದಾಖಲಿಸಲಾಗಿದೆ. ಕಡಿಮೆ ರೋಗ ಲಕ್ಷಣ ಇರುವವರನ್ನು ಪ್ರತ್ಯೇಕವಾಗಿ ಇಡಲಾಗಿದ್ದು ಚಿಕಿತ್ಸೆ ನೀಡಲಾಗುತ್ತಿದೆ. ಬಾಂಗ್ಲಾ ಅಡಿಯಲ್ಲಿ ಅಕ್ರಮ ಪ್ರವೇಶದಿಂದಾಗಿ ಸೋಂಕು ಹರಡುವಿಕೆ ಅಂಕೆಗೆ ಸಿಗದೇ ಇರುವ ಸಾಧ್ಯತೆ ಇದೆ ಎನ್ನಲಾಗಿದೆ.

ಇದೇ ವೇಳೆ ರೊಹಿಂಗ್ಯಾಗಳ ವಿರುದ್ಧ ಕೋವಿಡ್‌ ಹೆಸರಲ್ಲಿ ಇನ್ನಷ್ಟು ಹಿಂಸೆ ನಡೆಯುವ ಸಾಧ್ಯತೆ ಇದೆ ಎಂದು ಮಾನವ ಹಕ್ಕುಗಳ ಸಂಘಟನೆಗಳು ಆತಂಕ ವ್ಯಕ್ತಪಡಿಸಿವೆ. ರೊಹಿಂಗ್ಯಾಗಳು ಬಾಂಗ್ಲಾ ಗಡಿಯಲ್ಲಿ ಸಂಚರಿಸುವುದು ಮತ್ತು ಅವರಲ್ಲಿ ಕೆಲವರು ಅಕ್ರಮ ದಾರಿಗಳಲ್ಲಿ ಸಂಚರಿಸುವುದರಿಂದ ಮ್ಯಾನ್ಮಾರ್‌ ಪೊಲೀಸರು ಅವರನ್ನು ವಶಕ್ಕೆ ಪಡೆದು, ಹಿಂಸಿಸುವ ಅಪಾಯವಿದೆ ಎನ್ನಲಾಗದೆ. ಇದೇ ವೇಳೆ ಅಲ್ಲಿನ ಅಧಿಕಾರಿಗಳೂ ಲಂಚ ಪಡೆದು ಜನರನ್ನು ಗಡಿಯಲ್ಲಿ ಬಿಡುತ್ತಿರುವುದರಿಂದ ಸಮಸ್ಯೆಯಾಗುತ್ತಿದೆ ಎನ್ನಲಾಗಿದೆ.