World Cup: ಭಾರೀ ಒತ್ತಡದಲ್ಲಿ ನ್ಯೂಜಿಲ್ಯಾಂಡ್‌, ಪಾಕಿಸ್ಥಾನ

Team Udayavani, Nov 4, 2023, 12:14 AM IST

ಬೆಂಗಳೂರು: ವಿಶ್ವಕಪ್‌ ಪಂದ್ಯಾವಳಿಯ ಅತ್ಯಂತ ಮಹತ್ವದ ಹಾಗೂ ನಿರ್ಣಾಯಕ ಸಮರದಲ್ಲಿ ನ್ಯೂಜಿಲ್ಯಾಂಡ್‌ ಮತ್ತು ಪಾಕಿಸ್ಥಾನ ತಂಡಗಳು ಶನಿವಾರ ಎದುರಾಗಲಿವೆ. ಇದು ಬೆಂಗಳೂರಿನಲ್ಲಿ ನಡೆಯುವ ಹಗಲು ಪಂದ್ಯ. ಇತ್ತಂಡಗಳ ಪಾಲಿಗೂ ಗೆಲುವು ಅನಿವಾರ್ಯವಾಗಿದೆ. ಆದರೆ ಕಿವೀಸ್‌ ಗೆದ್ದರೆ ತನ್ನ 4ನೇ ಸ್ಥಾನವನ್ನು ಗಟ್ಟಿಗೊಳಿಸಲಿದೆ. ಪಾಕ್‌ ಜಯಿಸಿದರೂ ವಿಶೇಷ ಲಾಭವಾಗದು ಎಂಬಂಥ ವಿಚಿತ್ರ ಸ್ಥಿತಿ. ಅಫ್ಘಾನ್‌ ಸಾಧಿಸಿದ 4ನೇ ಗೆಲುವಿನಿಂದ ಪಾಕ್‌ ಹಿಂದೆ ಬಿದ್ದಿದೆ!

ನ್ಯೂಜಿಲ್ಯಾಂಡ್‌ ಸತತ 4 ಪಂದ್ಯ ಗಳನ್ನು ಗೆದ್ದು ಸೆಮಿಫೈನಲ್‌ ಖಚಿತ ಎಂಬ ಸುಭದ್ರ ಸ್ಥಿತಿಯಲ್ಲಿತ್ತು. ಆದರೆ ಭಾರತದ ಕೈಯಲ್ಲಿ ಏಟು ತಿಂದ ಬಳಿಕ ಗೆಲುವಿನ ಮುಖವನ್ನೇ ಕಂಡಿಲ್ಲ. ಆಸ್ಟ್ರೇಲಿಯ ಮತ್ತು ದಕ್ಷಿಣ ಆಫ್ರಿಕಾ ವಿರುದ್ಧ ಮುಗ್ಗರಿಸಿದೆ. ಅರ್ಥಾತ್‌, ಹ್ಯಾಟ್ರಿಕ್‌ ಸೋಲಿನಿಂದಾಗಿ ನ್ಯೂಜಿಲ್ಯಾಂಡ್‌ನ‌ 4ನೇ ಸ್ಥಾನವೂ ಅಲುಗಾಡಲಾರಂಭಿಸಿದೆ. ಇದು ನಿಲ್ಲ ಬೇಕಾದರೆ ಪಾಕಿಸ್ಥಾನವನ್ನು ಮಣಿ ಸಲೇ ಬೇಕು. ಇದು ನ್ಯೂಜಿ ಲ್ಯಾಂಡ್‌ನ‌ 8ನೇ ಪಂದ್ಯ. ಕೊನೆಯ ಪಂದ್ಯದಲ್ಲಿ ಶ್ರೀಲಂಕಾವನ್ನು ಎದುರಿಸಲಿದೆ. ಎರಡನ್ನೂ ಗೆದ್ದರೆ ಕಿವೀಸ್‌ ಅಂಕ 12ಕ್ಕೆ ಏರಲಿದೆ. ರನ್‌ರೇಟ್‌ ಉತ್ತಮವಾಗಿ ರುವುದರಿಂದ ಸೆಮಿಫೈನಲ್‌ಗೆ ಧಾರಾಳ ಎಂಬುದು ಸದ್ಯದ ಲೆಕ್ಕಾಚಾರ.

ಪಾಕಿಸ್ಥಾನ ನಿರೀಕ್ಷೆಯನ್ನೆಲ್ಲ ಹುಸಿ ಗೊಳಿಸುತ್ತ ಬಂದಿದ್ದು, ಅಪಾಯದ ಅಂಚಿನಲ್ಲಿದೆ. 7 ಪಂದ್ಯಗಳಲ್ಲಿ ಕೇವಲ ಮೂರನ್ನು ಗೆದ್ದು 6 ಅಂಕ ಗಳನ್ನಷ್ಟೇ ಹೊಂದಿದೆ. ರನ್‌ರೇಟ್‌ ಮೈನಸ್‌ನಲ್ಲಿದೆ. ಕೊನೆಯ ಎದುರಾಳಿ ಇಂಗ್ಲೆಂಡ್‌. ಎರಡೂ ಪಂದ್ಯಗಳನ್ನು ದೊಡ್ಡ ಅಂತರದಿಂದ ಗೆದ್ದರೆ ಅಂಕ 10ಕ್ಕೆ ತಲುಪುತ್ತದೆ. ಆದರೆ ನಾಕೌಟ್‌ಗೆ ಈ ಸಾಧನೆ ಸಾಕಾಗದು ಎನ್ನುತ್ತದೆ ಅಂಕಿಅಂಶ. ಒಂದು ವೇಳೆ ನ್ಯೂಜಿಲ್ಯಾಂಡ್‌ ವಿರುದ್ಧ ಸೋತರೆ ಪಾಕ್‌ ಶನಿವಾರವೇ ಕೂಟದಿಂದ ಹೊರಬೀಳುವುದು ಖಚಿತ.

ಕಿವೀಸ್‌ ಗಾಯಾಳುಗಳ ಚಿಂತೆ
ಬಹುತೇಕ ಆಟಗಾರರು ಗಾಯದ ಸಮಸ್ಯೆಗೆ ಸಿಲುಕಿರುವುದು ನ್ಯೂಜಿ ಲ್ಯಾಂಡ್‌ಗೆ ಎದುರಾಗಿರುವ ದೊಡ್ಡ ಆತಂಕ. ಪ್ರಧಾನ ವೇಗಿ ಮ್ಯಾಟ್‌ ಹೆನ್ರಿ ಸ್ನಾಯು ಸೆಳೆತಕ್ಕೆ ಸಿಲುಕಿದ್ದಾರೆ. ಜಿಮ್ಮಿ ನೀಶಮ್‌ಗೆ ದಕ್ಷಿಣ ಆಫ್ರಿಕಾ ಪಂದ್ಯದ ವೇಳೆ ಮಣಿಗಂಟಿಗೆ ಏಟು ಬಿದ್ದಿದೆ. ನಾಯಕ ಕೇನ್‌ ವಿಲಿಯಮ್ಸನ್‌ ಅವರ ಹೆಬ್ಬೆರಳಿನ ನೋವು ಇನ್ನೂ ವಾಸಿಯಾಗಿಲ್ಲ. ಮಾರ್ಕ್‌ ಚಾಪ್‌ಮನ್‌ ಅನಾರೋಗ್ಯದಿಂದ ಚೇತರಿಸಿಕೊಂಡಿಲ್ಲ. ಇವರ್ಯಾರೂ ಪಾಕಿಸ್ಥಾನ ವಿರುದ್ಧ ಕಣಕ್ಕಿಳಿಯುವುದಿಲ್ಲ. ಹೆನ್ರಿ ಬದಲು ಕೈಲ್‌ ಜೇಮಿಸನ್‌ ಬಂದಿದ್ದಾರೆ.

ನ್ಯೂಜಿಲ್ಯಾಂಡ್‌ ಕಳೆದೆರಡು ಪಂದ್ಯಗಳನ್ನು ಸೋತದ್ದು ಬೌಲಿಂಗ್‌ ವೈಫ‌ಲ್ಯದಿಂದ ಎನ್ನಲಡ್ಡಿಯಿಲ್ಲ. ಆಸ್ಟ್ರೇಲಿ ಯಕ್ಕೆ 388 ರನ್‌, ದಕ್ಷಿಣ ಆಫ್ರಿಕಾಕ್ಕೆ 357 ರನ್‌ ಬಿಟ್ಟುಕೊಟ್ಟು ಏಟು ತಿಂದಿತು. ಆಸೀಸ್‌ ವಿರುದ್ಧ ದಿಟ್ಟ ಚೇಸಿಂಗ್‌ ನಡೆಸುವಲ್ಲಿ ಯಶಸ್ವಿಯಾಯಿತಾದರೂ 5 ರನ್ನಿನಿಂದ ಪಂದ್ಯವನ್ನು ಕಳೆದು ಕೊಂಡಿತು. ದಕ್ಷಿಣ ಆಫ್ರಿಕಾ ವಿರುದ್ಧ ಮೊದಲ ಸಲ ಬ್ಯಾಟಿಂಗ್‌ ವಿಭಾಗ ಕೈಕೊಟ್ಟಿತು. ಪಾಕ್‌ ವಿರುದ್ಧ ಕಾನ್ವೇ, ಯಂಗ್‌, ರಚಿನ್‌ ರವೀಂದ್ರ, ಫಿಲಿಪ್ಸ್‌, ಲ್ಯಾಥಂ, ಸ್ಯಾಂಟ್ನರ್‌ ಕ್ರೀಸ್‌ ಆಕ್ರಮಿಸಿಕೊಳ್ಳಬೇಕಾದುದು ಅತ್ಯಗತ್ಯ.

ಪಾಕ್‌ ಅನಿಶ್ಚಿತ ಆಟ
ಪಾಕಿಸ್ಥಾನ ಆನಿಶ್ಚಿತ ಪ್ರದರ್ಶನ ನೀಡುತ್ತ ಬಂದಿದೆ. ವಿಶ್ವಕಪ್‌ಗ್ೂ ಮೊದಲು ಉತ್ತಮ ಫಾರ್ಮ್ನಲ್ಲಿದ್ದ ಬ್ಯಾಟರ್ ಮತ್ತು ಬೌಲರ್ ಈ ಪ್ರತಿಷ್ಠಿತ ಕೂಟದಲ್ಲಿ ಕೈಕೊಡುತ್ತಿದ್ದಾರೆ. ಆರಂಭಕಾರ ಅಬ್ದುಲ್ಲ ಶಫೀಕ್‌, ಕೀಪರ್‌ ಮೊಹಮ್ಮದ್‌ ರಿಜ್ವಾನ್‌ ಮತ್ತು ನಾಯಕ ಬಾಬರ್‌ ಆಜಂ ಬ್ಯಾಟಿಂಗ್‌ ಸರದಿಯನ್ನು ಆಧರಿಸಬೇಕಿದೆ. ಇವರಲ್ಲಿ ಶಫೀಕ್‌ ಮತ್ತು ರಿಜ್ವಾನ್‌ ಮುನ್ನೂರರ ಗಡಿ ದಾಟಿದರೆ, ಆಜಂ 3 ಅರ್ಧ ಶತಕ ಬಾರಿಸಿದ್ದಾರೆ. ಮಧ್ಯಮ ಕ್ರಮಾಂಕದ ಇಫ್ತಿಕಾರ್‌ ಅಹ್ಮದ್‌ ಮತ್ತು ಸೌದ್‌ ಶಕೀಲ್‌ ಅವರಿಗೆ ಇನ್ನೂ ಸ್ಥಿರ ಪ್ರದರ್ಶನ ನೀಡಲು ಸಾಧ್ಯವಾಗಿಲ್ಲ.
ಪಾಕಿಸ್ಥಾನದ ಬೌಲಿಂಗ್‌ ಕೂಡ ಘಾತಕವಾಗಿ ಪರಿಣಮಿಸುತ್ತಿಲ್ಲ. ಅಫ್ರಿದಿ ವೈಫ‌ಲ್ಯ ಉಳಿದ ಬೌಲರ್‌ಗಳ ಮೇಲೂ ವ್ಯತಿರಿಕ್ತ ಪರಿಣಾಮ ಬೀರಿದೆ.