ಉತ್ತರ ಕೊರಿಯಾದಿಂದ ಮತ್ತೆರೆಡು ಕ್ಷಿಪಣಿ ಉಡಾವಣೆ : ಜಪಾನ್‌ ಆಕ್ಷೇಪ

Team Udayavani, Feb 21, 2023, 6:35 AM IST

ಸಿಯೋಲ್‌ : ಉತ್ತರ ಕೊರಿಯಾ ಸೋಮವಾರ ಅಲ್ಪಶ್ರೇಣಿಯ 2 ಖಂಡಾಂತರ ಕ್ಷಿಪಣಿಗಳನ್ನು ಜಪಾನ್‌ನತ್ತ ಉಡಾಯಿಸಿ ಪರೀಕ್ಷೆ ನಡೆಸಿದೆ. ಈ ಬಗ್ಗೆ ಜಪಾನ್‌ ನೀಡಿದ್ದ ಎಚ್ಚರಿಕೆಯನ್ನು ಕಡೆಗಣಿಸಿ ಉದ್ಧಟತನ ತೋರಿರುವ ಉತ್ತರ ಕೊರಿಯಾದ ನಡೆಯನ್ನು ಖಂಡಿಸಿರುವ ಜಪಾನ್‌, ಈ ಕುರಿತು ಭದ್ರತಾ ಮಂಡಳಿಯಲ್ಲಿ ಸಭೆ ನಡೆಸುವಂತೆ ವಿಶ್ವಸಂಸ್ಥೆಯ ಮೊರೆ ಹೋಗಿದೆ.

ಮೂರು ದಿಗಳ ಅವಧಿಯಲ್ಲಿ ಉತ್ತರ ಕೊರಿಯಾ ನಡೆಸಿರುವ ಎರಡನೇ ಖಂಡಾಂತರ ಕ್ಷಿಪಣಿ ಪರೀಕ್ಷೆ ಇದಾಗಿದೆ. ಶನಿವಾರ ನಡೆಸಿದ್ದ ಕ್ಷಿಪಣಿ ‌ ಜಪಾನ್‌ ಸಮುದ್ರದಲ್ಲಿ ಬಿದ್ದಿತ್ತು. ಈ ಬಳಿಕ ಉ. ಕೊರಿಯಾದ ಈ ನಡೆಯನ್ನು ಖಂಡಿಸಿ, ಅಂತಾರಾಷ್ಟ್ರೀಯ ಬೆದರಿಕೆ ಎಂದು ಪರಿಗಣಿಸುವುದಾಗಿ ಜಪಾನ್‌ ಎಚ್ಚರಿಕೆ ನೀಡಿತ್ತು.

ಇತ್ತ ದಕ್ಷಿಣ ಕೊರಿಯಾ ಹಾಗೂ ಅಮೆರಿಕ ಮಿಲಿಟರಿ ಸಮರಾಭ್ಯಾಸ ನಡೆಸುತ್ತಿದ್ದು, ಈ ಬೆಳವಣಿಗೆ ತನ್ನ ಭದ್ರತೆಗೆ ಬೆದರಿಕೆಯಾಗಿದೆ. ಹೀಗಾಗಿ, ಕ್ಷಿಪಣಿ ಪರೀಕ್ಷೆ ನಡೆಸಲಾಗಿದೆ ಎಂದು ಉತ್ತರ ಕೊರಿಯಾ ಹೇಳಿಕೊಂಡಿದೆ.