Oh My God-2 ಗೆ ಇನ್ನೂ ಸಿಕ್ಕಿಲ್ಲ ಪ್ರಮಾಣಪತ್ರ

Team Udayavani, Jul 29, 2023, 8:53 PM IST

ನವದೆಹಲಿ: ಇತ್ತೀಚಿನ ದಿನಗಳಲ್ಲಿ ಬಾಲಿವುಡ್‌ ಸಿನಿಮಾಗಳು ಒಂದಿಲ್ಲೊಂದು ರಗಳೆಗಳನ್ನು ಮೈಮೇಲೆ ಎಳೆದುಕೊಳ್ಳುತ್ತಲೇ ಇವೆ. ಆದಿಪುರುಷ ವಿವಾದದ ಬೆನ್ನಲ್ಲೇ ಇದೀಗ ನಟ ಅಕ್ಷಯ್‌ ಕುಮಾರ್‌ ಅಭಿನಯದ ಓ ಮೈಗಾಡ್‌-2 ಚಿತ್ರವೂ ಕೂಡ ಅಂಥದ್ದೇ ಸಂದಿಗ್ಧತೆಗೆ ಸಿಕ್ಕಬಹುದೆಂಬ ಮಾತುಗಳು ಕೇಳಿಬಂದಿದೆ.

ಬಿಡುಗಡೆ ಹೊಸ್ತಿಲಿನಲ್ಲಿರುವ ಓ ಮೈಗಾಡ್‌-2ಗೆ ಕೇಂದ್ರೀಯ ಸಿನಿಮಾ ಪ್ರಮಾಣೀಕರಣ ಮಂಡಳಿ (ಸಿಬಿಎಫ್ಸಿ) ಇನ್ನೂ ಪ್ರಮಾಣಪತ್ರವನ್ನೇ ನೀಡದಿರುವುದು ಈ ವಾದಕ್ಕೆ ಪುಷ್ಟಿ ನೀಡಿದೆ. ಓ ಮೈಗಾಡ್‌-2 ಲೈಂಗಿಕ ಶಿಕ್ಷಣದ ಕಥಾಹಂದರವನ್ನು ಹೊಂದಿದ ಸಿನಿಮಾ ಆಗಿದ್ದು, ಚಿತ್ರದ 20 ದೃಶ್ಯಗಳಿಗೆ ಕತ್ತರಿ ಹಾಕುವ ಸಲಹೆಯನ್ನೂ ಮಂಡಳಿ ನೀಡಿದೆ. ಈ ಹಿನ್ನೆಲೆಯಲ್ಲಿ ಚಿತ್ರ ಬಿಡುಗಡೆಗೊಂಡ ಬಳಿಕ ಉಂಟಾಗುವ ಸವಾಲುಗಳನ್ನು ಮುನ್ನೆಚ್ಚರಿಕೆ ಕ್ರಮವಾಗಿ ಪರಿಹರಿಸಲು ಮಂಡಳಿ ಯೋಜಿಸುತ್ತಿದೆ ಎಂದು ತಿಳಿಸಿದೆ.