ಮಾಸಾಂತ್ಯಕ್ಕೆ ಈರುಳ್ಳಿ ಬೆಲೆಯೂ ಏರಿಕೆ?

Team Udayavani, Aug 5, 2023, 10:34 PM IST

ನವದೆಹಲಿ: ದೇಶದಲ್ಲಿ ಟೊಮಾಟೋ ಬೆಲೆ ಏರಿಕೆಯಿಂದ ಗ್ರಾಹಕರು ತತ್ತರಿಸಿರುವ ನಡುವೆಯೇ, ಈಗ ಈರುಳ್ಳಿ ಬೆಲೆಯೂ ಗಗನಕ್ಕೇರುವ ಸಾಧ್ಯತೆಗಳಿದ್ದು, ಆಗಸ್ಟ್‌ ತಿಂಗಳಾಂತ್ಯದ ವೇಳೆ ಈರುಳ್ಳಿ ಬೆಲೆ ಕೆಜಿಗೆ 60ರಿಂದ 70 ರೂ.ಗೆ ತಲುಪಲಿದೆ ಎಂದು ಮಾರುಕಟ್ಟೆ ವಿಶ್ಲೇಷಣಾ ಸಂಸ್ಥೆ ಕ್ರಿಸಿಲ್‌ ತಿಳಿಸಿದೆ.

ಕ್ರಿಸಿಲ್‌ ವರದಿಗಳ ಪ್ರಕಾರ, ಅತ್ಯಧಿಕ ತಾಪಮಾನ ಹಾಗೂ ಅಕಾಲಿಕ ಮಳೆಯಿಂದಾಗಿ ಬಹುತೇಕ ಕಡೆ ಈರುಳ್ಳಿ ಬೆಳೆ ಮೇಲೆ ಪರಿಣಾಮ ಬೀರಿದೆ. ಈಗಾಗಲೇ ಪೂರೈಕೆ ಸರಪಳಿಯಲ್ಲಿ ವ್ಯತ್ಯಯವಾಗುತ್ತಿರುವುದೂ ವರದಿಯಾಗಿದೆ. ಈ ಹಿನ್ನೆಲೆಯಲ್ಲಿ ಮಾಸಾಂತ್ಯದಲ್ಲಿ ಬೆಲೆ ಏರಿಕೆ ಆಗುವ ಸಾಧ್ಯತೆ ಅಧಿಕವಾಗಿದೆ. ಪ್ರಸಕ್ತ ದೇಶದಲ್ಲಿ ಈರುಳ್ಳಿ ಬೆಲೆ ಕೆಜಿಗೆ 25ರಿಂದ 30 ರೂ.ಗಳಿವೆ.

ಇನ್ನು, ಹಿಮಾಚಲ ಪ್ರದೇಶ ಸೇರಿದಂತೆ ದೇಶದ ಹಲವೆಡೆ ಆಗಿರುವ ಭಾರೀ ಮಳೆಯ ಅನಾಹುತದಿಂದಾಗಿ ಟೊಮಾಟೋ ಪೂರೈಕೆಗೆ ಸಮಸ್ಯೆಯಾಗುತ್ತಿದ್ದು, ಆಗಸ್ಟ್‌ನಲ್ಲೂ ಟೊಮಾಟೋ ಬೆಲೆ ಇಳಿಕೆಯಾಗುವ ಸಾಧ್ಯತೆ ಇಲ್ಲ. ಮುಂದಿನ ದಿನಗಳಲ್ಲಿ ಬೆಲೆ ಮತ್ತಷ್ಟು ಏರಿಕೆಯಾಗಿ 1 ಕೆಜಿ ಟೊಮೆಟೊಗೆ 180 ರೂ.ಗಳಿಂದ 200 ರೂ.ಗಳವರೆಗೂ ಏರಬಹುದು ಎನ್ನಲಾಗಿದೆ.