Open AI: ಸ್ಯಾಮ್‌ ಆಲ್ಟ್ಮ್ಯಾನ್‌ರಿಂದ ಹೊಸ ಕಂಪನಿ ಶುರು?

Team Udayavani, Nov 19, 2023, 10:56 PM IST

ನವದೆಹಲಿ: ಶನಿವಾರ ನಡೆದ ಅಚ್ಚರಿಯ ಬೆಳವಣಿಗೆಯಲ್ಲಿ ಓಪನ್‌ ಎಐನ ಸಿಇಒ ಸ್ಥಾನದಿಂದ ವಜಾಗೊಂಡಿರುವ ಸ್ಯಾಮ್‌ ಆಲ್ಟ್ಮ್ಯಾನ್‌ ಹೊಸ ಕಂಪನಿ ಶುರು ಮಾಡುವ ಸಾಧ್ಯತೆಗಳು ಇವೆ. ಈ ಮೂಲಕ ಅವರು ಮತ್ತೆ ಕೃತಕ ಬುದ್ಧಿಮತ್ತೆ ಕ್ಷೇತ್ರದಲ್ಲಿ ಮುಂದುವರಿಯುವ ಸೂಚನೆ ನೀಡಿದ್ದಾರೆ.

ಹುದ್ದೆಯಿಂದ ವಜಾಗೊಂಡ ಮಾರನೇ ದಿನ ಅಂದರೆ ಭಾನುವಾರ ಟ್ವೀಟ್‌ ಮಾಡಿರುವ ಅವರು, “ಓಪನ್‌ ಎ.ಐ. ತಂಡವನ್ನು ಬಹುವಾಗಿ ಇಷ್ಟಪಡುತ್ತೇನೆ’ ಎಂದು ಟ್ವೀಟ್‌ ಮಾಡಿದ್ದಾರೆ. ಜತೆಗೆ ಹಾರ್ಟ್‌ ಇಮೋಜಿಯನ್ನು ಟ್ವೀಟ್‌ ಮಾಡಿದ್ದಾರೆ. ಇನ್ನೊಂದೆಡೆ, ವಜಾಗೊಂಡಿರುವ ಸ್ಥಾನಕ್ಕೆ ಮತ್ತೆ ಅವರನ್ನೇ ನೇಮಿಸುವ ಬಗ್ಗೆಯೂ ಸಾಮಾಜಿಕ ಜಾಲತಾಣಗಳಲ್ಲಿ ಬಿರುಸಿನ ಚರ್ಚೆಗಳು ನಡೆದಿವೆ. ಇದೇ ವೇಳೆ, ಓಪನ್‌ ಎಐ ಆಡಳಿತ ಮಂಡಳಿ ಜತೆಗೆ ಮೈಕ್ರೋಸಾಫ್ಟ್ ಸೇರಿದಂತೆ ಹಲವು ಬಂಡವಾಳ ಹೂಡಿಕೆದಾರರು ಮಾತುಕತೆ ನಡೆಸಿ ಆಲ್ಟ್ಮ್ಯಾನ್‌ರನ್ನು ಮತ್ತೆ ನೇಮಿಸುವ ಬಗ್ಗೆ ಚರ್ಚೆ ನಡೆಸಿದ್ದಾರೆ ಎನ್ನಲಾಗಿದೆ.