India-Myanmar: ಶೀಘ್ರ ಭಾರತ-ಮ್ಯಾನ್ಮಾರ್‌ ಮುಕ್ತ ಸಂಚಾರ ನೀತಿಗೆ ತೆರೆ?

Team Udayavani, Jan 2, 2024, 10:28 PM IST

ನವದೆಹಲಿ: ಭಾರತ-ಮ್ಯಾನ್ಮಾರ್‌ ಗಡಿಯಲ್ಲಿ ವಾಸಿಸುವ ಜನರು ವೀಸಾ ಇಲ್ಲದೇ ಪರಸ್ಪರ ಎರಡೂ ದೇಶಗಳ ನಡುವೆ ತಲಾ 16 ಕಿ.ಮೀ.ವರೆಗೆ ಸಂಚರಿಸಲು ಅನುವು ಮಾಡಿಕೊಡುವ ಮುಕ್ತ ಸಂಚಾರ ನೀತಿಗೆ(ಎಫ್ಎಂಆರ್‌) ಅಂತ್ಯ ಹಾಡಲು ಭಾರತ ಸರ್ಕಾರ ಮುಂದಾಗಿದೆ ಎಂದು ಹಿರಿಯ ಅಧಿಕಾರಿಯೊಬ್ಬರು ತಿಳಿಸಿದ್ದಾರೆ. ಇತ್ತೀಚಿನ ವರ್ಷಗಳಲ್ಲಿ ಈ ದಾರಿಯ ಮೂಲಕ ಅಕ್ರಮ ವಲಸಿಗರು ಮತ್ತು ನುಸುಳುಕೋರರು ದೇಶದೊಳಕ್ಕೆ ಬರುವುದು ಹೆಚ್ಚಾಗಿರುವ ಕಾರಣ, ಇದಕ್ಕೆ ಕಡಿವಾಣ ಹಾಕುವ ನಿಟ್ಟಿನಲ್ಲಿ ಈ ಕ್ರಮ ಕೈಗೊಳ್ಳಲು ಸರ್ಕಾರ ಮುಂದಾಗಿದೆ.

ಭಾರತ-ಮ್ಯಾನ್ಮಾರ್‌ 1,643 ಕಿ.ಮೀ. ಉದ್ದದ ಗಡಿಯನ್ನು ಹಂಚಿಕೊಂಡಿದೆ. ಈ ಗಡಿಯು ಮಿಜೋರಾಂ, ಮಣಿಪುರ, ನಾಗಾಲ್ಯಾಂಡ್‌ ಮತ್ತು ಅರುಣಾಚಲ ಪ್ರದೇಶವನ್ನು ಹಾದು ಹೋಗಲಿದ್ದು, ಪ್ರಸ್ತುತ ಎಫ್ಎಂಆರ್‌ ಅಸ್ತಿತ್ವದಲ್ಲಿದೆ.

ಎಫ್ಎಂಆರ್‌ ಅಡಿಯಲ್ಲಿ ಭಾರತದ ಪ್ರಜೆ ಅಥವಾ ಮ್ಯಾನ್ಮಾರ್‌ ಪ್ರಜೆಯಾಗಿದ್ದು, ಗಡಿಯ ಎರಡು ಬದಿಗಳಲ್ಲಿ 16 ಕಿ.ಮೀ. ವ್ಯಾಪ್ತಿಯಲ್ಲಿ ವಾಸಿಸುವ ಗುಡ್ಡಗಾಡು ಬುಡಕಟ್ಟು ವ್ಯಕ್ತಿಯು ವೀಸಾ ಇಲ್ಲದೇ ಬಾರ್ಡರ್‌ ಪಾಸ್‌ ಮೂಲಕ ಪರಸ್ಪರ ಸಂಚರಿಸಬಹುದು. ಅಲ್ಲದೇ ಒಮ್ಮೆಗೆ ಎರಡು ವಾರಗಳು ತಂಗಬಹದು.

“ಶೀಘ್ರದಲ್ಲಿ ಎಫ್ಎಂಆರ್‌ ಅಂತ್ಯವಾಗಲಿದ್ದು, ಮುಂದಿನ ನಾಲ್ಕು ವರ್ಷಗಳಲ್ಲಿ ಭಾರತ-ಮ್ಯಾನ್ಮಾರ್‌ ಗಡಿ ಉದ್ದಕ್ಕೂ ಬೇಲಿ ಹಾಕಲಾಗುವುದು” ಎಂದು ಅಧಿಕಾರಿಗಳು ಮಾಹಿತಿ ನೀಡಿದ್ದಾರೆ.