Politics: ರಾಹುಲ್‌ ಪನೌತಿ ಹೇಳಿಕೆ- ಕೈ V/s ಕಮಲ ಪೋಸ್ಟ್‌ ವಾರ್‌

Team Udayavani, Nov 24, 2023, 10:04 PM IST

ನವದೆಹಲಿ: ಕಾಂಗ್ರೆಸ್‌ ಸಂಸದ ರಾಹುಲ್‌ ಗಾಂಧಿ ಅವರ “ಪನೌತಿ’ ಹೇಳಿಕೆ ಸಂಬಂಧಿಸಿದಂತೆ ಕಾಂಗ್ರೆಸ್‌ ಹಾಗೂ ಬಿಜೆಪಿ ನಡುವಿನ ಗುದ್ದಾಟ ಮತ್ತಷ್ಟು ಹೆಚ್ಚಿದ್ದು, ಸಾಮಾಜಿಕ ಜಾಲತಾಣದವರೆಗೂ ತಲುಪಿದೆ. ಕಾಂಗ್ರೆಸ್‌ ಟ್ವಿಟರ್‌ ಖಾತೆಯಲ್ಲಿ ಮೋದಿ ಅವರನ್ನು “ಪನೌತಿ-ಎ-ಆಜಾಮ್‌’ ಎಂದು ಟೀಕಿಸಿದ್ದರೆ, ಬಿಜೆಪಿಗರು ಗಾಂಧಿ ಪರಿವಾರವನ್ನೇ ದೇಶದ ಅತಿದೊಡ್ಡ ಪನೌತಿ (ಅಪಶಕುನ) ಎಂದು ಟೀಕಿಸಿ ಪೋಸ್ಟ್‌ ಹಾಕಿದ್ದಾರೆ.

ಪ್ರಧಾನಿ ಮೋದಿ 2 ಸ್ಕ್ರೀನ್‌ಗಳ ಮಧ್ಯೆ ಇಣುಕುತ್ತಿರುವಂಥ ಪೋಸ್ಟರ್‌ನ ಮೇಲೆ ಪನೌತಿ -ಎ- ಆಜಾಮ್‌ ಎಂದು ಬರೆದು ಕಾಂಗ್ರೆಸ್‌ ಖಾತೆಯಲ್ಲಿ ಪೋಸ್ಟ್‌ ಮಾಡಲಾಗಿದೆ. ಇದಕ್ಕೆ ಬಿಜೆಪಿಯ ವಕ್ತಾರ ಶೆಹಜಾದ್‌ ಪೂನಾವಾಲಾ ತಿರುಗೇಟು ನೀಡಿದ್ದು, ಪ್ರಿಯಾಂಕಾ, ರಾಹುಲ್‌ , ಸೋನಿಯಾ, ರಾಜೀವ್‌, ನೆಹರು, ರಾಬರ್ಟ್‌, ಇಂದಿರಾ ಹೆಸರಿರುವ ಮತ್ತು ಆ ಹೆಸರಿನಲ್ಲಿ ಒಂದೊಂದು ಅಕ್ಷರಗಳನ್ನು ಹೈಲೈಟ್‌ ಮಾಡಿ ” ಪನೌತಿ’ ಎಂದು ಬರೆದಿರುವ ಪೋಸ್ಟರ್‌ ಅನ್ನು ಶೇರ್‌ ಮಾಡಿದ್ದಾರೆ. ಅಲ್ಲದೇ, ಇವೇ ಭಾರತದ ನಿಜವಾದ ಅಪಶಕುನಗಳು ಎಂದು ಕ್ಯಾಪ್ಶನ್‌ ಕೂಡ ಹಾಕಿದ್ದಾರೆ.