ಕೋಳಿ, ಮೊಟ್ಟೆ ಬೆಲೆ ಇಳಿಕೆ; ಮೀನಿಗೆ ಏರಿಕೆ

Team Udayavani, Jul 9, 2020, 6:20 AM IST

ಮಹಾನಗರ: ಕೋಳಿ -ಮಾಂಸ ಮತ್ತು ಮೊಟ್ಟೆಯ ಬೆಲೆ ಇಳಿಕೆಯಾಗಿದ್ದು, ಮೀನಿನ ದರದಲ್ಲಿ ಏರಿಕೆಯಾಗಿದೆ.

ಸುಮಾರು ಮೂರು ತಿಂಗಳ ಅನಂತರ ಕೋಳಿ ಮಾಂಸದ (ಲೈವ್‌ ಚಿಕನ್‌)ಬೆಲೆ ಕೆ.ಜಿ. ಯೊಂದಕ್ಕೆ ಸುಮಾರು 50 ರೂ. ಇಳಿಕೆಯಾಗಿದೆ. ಮೊಟ್ಟೆಯ ದರ ಕೂಡ ಅಪರೂಪವೆಂಬಂತೆ 1 ರೂ. ಕಡಿಮೆಯಾಗಿದೆ.

ಮಂಗಳೂರಿನ ಮಾರುಕಟ್ಟೆಗಳಲ್ಲಿ ಕೋಳಿ ಮಾಂಸ (ಲೈವ್‌ ಚಿಕನ್‌) ಕೆ.ಜಿ.ಗೆ 130-140 ರೂ., ಕೋಳಿ ಮಾಂಸ ಕೆ.ಜಿ.ಗೆ 200-220 ಇದೆ.

ಕೋವಿಡ್ ಆರಂಭದ ದಿನಗಳಲ್ಲಿ ಕೋಳಿ ಮಾಂಸದ ಬೆಲೆ ಭಾರೀ ಇಳಿಕೆಯಾಗಿತ್ತು. ಆದರೆ ಅನಂತರ ಒಂದೇ ಸಮನೆ ಏರಿಕೆಯಾಗಿತ್ತು. ಆ ಬಳಿಕ ಲಾಕ್‌ಡೌನ್‌ ಹಿನ್ನೆಲೆಯಲ್ಲಿ ಕೋಳಿ ಫಾರಂಗಳಿಗೆ ಫೀಡ್‌ (ಕೋಳಿಗಳ ಆಹಾರ) ಪೂರೈಕೆ ಸ್ಥಗಿತವಾದ ಹಿನ್ನೆಲೆಯಲ್ಲಿ ಕೋಳಿ ಉತ್ಪಾದನೆ ಕಡಿಮೆಯಾಗಿ ಬೆಲೆ ಮತ್ತಷ್ಟು ಹೆಚ್ಚಳವಾಗಿತ್ತು. ಇದೀಗ ಫೀಡ್‌ ಪೂರೈಕೆ ಯಥಾಸ್ಥಿತಿಗೆ ಬಂದಿರುವುದರಿಂದ ಕೋಳಿ ಉತ್ಪಾದನೆಯೂ ಸಹಜ ಸ್ಥಿತಿಗೆ ಬಂದಿದೆ.

ಹಾಗಾಗಿ ಬೆಲೆ ಕೂಡ ಸಾಮಾನ್ಯವಾಗಿದೆ. ಗ್ರಾಹಕರು, ಕೋಳಿ ಸಾಕಣೆದಾರರು ಹಾಗೂ ಮಾರಾಟಗಾರರಿಗೆ ಕೂಡ ನಷ್ಟವಾಗುತ್ತಿಲ್ಲ ಎಂದು ಮಂಗಳೂರಿನ ಕೋಳಿ ಮಾರಾಟಗಾರರು ಅಭಿಪ್ರಾಯ ವ್ಯಕ್ತಪಡಿಸಿದ್ದಾರೆ.

ಮೀನು ದರ ಏರಿಕೆ
ಕರಾವಳಿಯಲ್ಲಿ ಯಾಂತ್ರೀಕೃತ ಮೀನುಗಾರಿಕೆ ಸ್ಥಗಿತಗೊಂಡಿರುವುದರಿಂದ ನಾಡದೋಣಿ ಮೀನುಗಾರಿಕೆ ಮಾತ್ರ ನಡೆಯುತ್ತಿದೆ. ಆದರೆ ಮೀನಿಗೆ ಬೇಡಿಕೆ ಹೆಚ್ಚಾಗಿದೆ. ಹಾಗಾಗಿ ಮೀನಿನ ದರ ಕೂಡ ಏರಿಕೆಯಾಗಿದೆ. ಮಂಗಳೂರಿನಲ್ಲಿ ಬುಧವಾರ ಬಂಗುಡೆ ಕೆ.ಜಿ.ಯೊಂದರ ಬೆಲೆ 350ರಿಂದ 400 ರೂ. ಇತ್ತು. ನಂಗ್‌ (ಸಣ್ಣದು) ಕೆ.ಜಿ.ಗೆ 350, ಕಾನೆ 800 ರೂ. ಇತ್ತು. ಮೀನು ಲಭ್ಯತೆ ಕಡಿಮೆ ಇರುವಾಗ, ಬೆಲೆ ಹೆಚ್ಚಿರುವಾಗ ಕೋಳಿ ಮಾಂಸ ಹಾಗೂ ಮೊಟ್ಟೆಯ ಬೆಲೆ ಕಡಿಮೆಯಾಗಿರುವುದು ಮಾಂಸಾಹಾರಿಗಳಿಗೆ ಸಮಾಧಾನ ತಂದಿದೆ.