ಸತ್ತಂತೆ ನಟಿಸಿ ಬಂಧನದಿಂದ ಪಾರಾಗಲು ಯತ್ನ

Team Udayavani, May 29, 2020, 3:28 PM IST

ಮಣಿಪಾಲ: ಎರಡು ತಿಂಗಳಿಂದ ಜಾರಿಯಲ್ಲಿದ್ದ ಲಾಕ್‌ಡೌನ್‌ ನಿಯಮಗಳನ್ನು ಒಂದು ಹಂತಕ್ಕೆ ಸಡಿಲಿಸಿ ಸಾರ್ವಜನಿಕರಿಗೆ ಅನುಕೂಲವಾಗುವಂತೆ ಕಾನೂನು ರೂಪಿಸಲಾಗಿದೆ. ಆದರೆ, ಅರ್ಧಕ್ಕರ್ಧ ಜನ ನಿಯಮಗಳನ್ನು ಉಲ್ಲಂಘಿಸುತ್ತಿದ್ದು, ಬೇಕಾಬಿಟ್ಟಿ ನಡೆದುಕೊಳ್ಳುತ್ತಿದ್ದಾರೆ. ಜನನಾಯಕರೂ ಇಂತಹ ತಪ್ಪೆಸಗುತ್ತಿದ್ದು, ಸಾಮಾಜಿಕ ಅಂತರವನ್ನು ಗಾಳಿಗೆ ತೂರಿ ಸಭೆ- ಸಮಾರಂಭಗಳನ್ನು ನಡೆಸುತ್ತಿರುವುದು ಟೀಕೆಗೆ ಗುರಿಯಾಗಿದೆ.

ಇದೀಗ ಪೆರುವಿನ ಟಂಟಾರಾ ಮೇಯರ್‌ ಜೈಮ್‌ ರೋಲ್ಯಾಂಡ್‌ ಉರ್ಬಿನಾ ಟೋರೆಸ್‌ ಅವರೂ ಇಂತಹ ಮೂರ್ಖತನ ಪ್ರದರ್ಶಿಸಿ, ಲಾಕ್‌ಡೌನ್‌ ನಿಯಮಗಳನ್ನು ಉಲ್ಲಂಘಿಸಿ ಸ್ನೇಹಿತರೊಂದಿಗೆ ಪಾರ್ಟಿ ಮಾಡಿ ಸಿಕ್ಕಿಬಿದ್ದಿದ್ದಾರೆ. ಈ ಮೇಯರ್‌ ಬಂಧನದಿಂದ ತಪ್ಪಿಸಿಕೊಳ್ಳಲು ಸತ್ತಂತೆ ನಟಿಸಿದ್ದು, ಸಾಮಾಜಿಕ ಜಾಲತಾಣದಲ್ಲಿ ವೈರಲ್‌ ಆಗಿದೆ.

ತನ್ನ ಸ್ನೇಹಿತರೊಂದಿಗೆ ಲಾಕ್‌ಡೌನ್‌ ನಿಯಮಗಳನ್ನು ಕಡೆಗಣಿಸಿ ಪಾರ್ಟಿ ಮಾಡಿದ ಮೇಯರ್‌ ವಿಚಾರ ಪೊಲೀಸರಿಗೆ ತಿಳಿಯುತ್ತಿದ್ದಂತೆಯೇ ಅವರು ಸ್ಥಳಕ್ಕೆ ದಾಳಿ ಮಾಡಿದ್ದಾರೆ. ಈ ಸಂದರ್ಭದಲ್ಲಿ ಮೇಯರ್‌ ಸ್ನೇಹಿತರು ಅಡಗಿ ಕುಳಿತರೆ, ತನ್ನನ್ನು ಬಂಧಿಸುತ್ತಾರೆಂಬ ಭಯದಲ್ಲಿ ಮೇಯರ್‌ ಮಹಾಶಯ ಶವಪೆಟ್ಟಿಗೆಯಲ್ಲಿ ಮಲಗಿ, ಸತ್ತಂತೆ ನಟಿಸಿದ್ದರು. ಬೇಲಿಯೇ ಎದ್ದು ಹೊಲ ಮೇಯ್ದ ಕಥೆ ನೆನಪಾಗಿ ಪೆರುವಿನ ಜನರೀಗ ಈ ಮೇಯರ್‌ ವಿರುದ್ಧ ಆಕ್ರೋಶ ವ್ಯಕ್ತಪಡಿಸಿದ್ದಾರೆ. ಪೊಲೀಸರು ಪಾರ್ಟಿ ಮಾಡಿದ ಎಲ್ಲರನ್ನೂ ಠಾಣೆಗೆ ಕರೆದೊಯ್ದು, ಶಿಸ್ತಿನ ಪಾಠ ಹೇಳಿದ್ದಾರೆ.