ಖಡಕ್ ಪೊಲೀಸ್ ಲುಕ್‌ನಲ್ಲಿ ಪ್ರಿಯಾಂಕ

Team Udayavani, Jul 10, 2020, 8:38 AM IST

“ದೇವಕಿʼ ಚಿತ್ರದ ನಂತರ ಪ್ರಿಯಾಂಕ ಉಪೇಂದ್ರ ಸಾಕಷ್ಟು ಬ್ಯುಸಿಯಾಗಿದ್ದು, ಇದೀಗ “ಉಗ್ರಾವತಾರʼದಲ್ಲಿ ಬರಲು ರೆಡಿಯಾಗಿದ್ದಾರೆ. ಹೌದು! ಪ್ರಿಯಾಂಕ “ಉಗ್ರಾವತಾರ’ ಚಿತ್ರದಲ್ಲಿ ಖಡಕ್ ಪೊಲೀಸ್ ಅಧಿಕಾರಿಯಾಗಿ ಕಾಣಿಸಿಕೊಳ್ಳುತ್ತಿದ್ದು, ಗುರುಮೂರ್ತಿ ನಿರ್ದೇಶನ ಚಿತ್ರಕ್ಕಿದೆ. ಈ ಹಿಂದೆ “ಸೆಕೆಂಡ್ ಹಾಫ್‍ʼ ಚಿತ್ರದಲ್ಲಿ ಪ್ರಿಯಾಂಕ ಖಾಕಿ ಧಿರಿಸಿನಲ್ಲಿ ನಟಿಸಿದ್ದರು

“ಉಗ್ರಾವತಾರʼ ಹೆಸರೇ ಹೇಳುವಂತೆ ಇದೊಂದು ಆ್ಯಕ್ಷನ್ ಬೇಸ್ಡ್ ಚಿತ್ರವಾಗಿದ್ದು, ಪ್ರಿಯಾಂಕಾ ಫೈಂಟಿಂಗ್ ದೃಶ್ಯಗಳಲ್ಲಿ ಡೂಪ್ ಇಲ್ಲದೇ‌ ನೈಜವಾಗಿ ನಟಿಸಿದ್ದಾರೆ. ಹಾಗೂ ಚಿತ್ರದ ಪಾತ್ರಕ್ಕಾಗಿ ಸಾಕಷ್ಟು ಶ್ರಮವನ್ನು ಹಾಕಿದ್ದು, ಇನ್‌ಸ್ಪೆಕ್ಟರ್‌ ಶ್ರೀದುರ್ಗಿಯಾಗಿ ಕಾಣಿಸಿಕೊಂಡಿದ್ದಾರೆ. ಅತ್ಯಾಚಾರ ಪ್ರಕರಣದ ಮರ್ಡರ್‌ ಮಿಸ್ಟರಿ ಕಥಾ ಹಂದರವಿರುವ ಈ ಚಿತ್ರದ ಚಿತ್ರೀಕರಣ ಶೇ. 80ರಷ್ಟು ಮುಗಿದಿದೆ.

ನವ ನಟಿ ನಿಸರ್ಗ ಪ್ರಮುಖ ಪಾತ್ರದಲ್ಲಿ ಕಾಣಿಕೊಂಡರೆ, ಕಮಿಷನರ್‌ ಪಾತ್ರದಲ್ಲಿ ಜಾಕಿಶ್ರಾಫ್ ಕಾಣಿಸಿಕೊಳ್ಳಲಿದ್ದಾರೆ. ಇನ್ನು ಎಂ.ಕೆ. ಪಿಕ್ಚರ್ಸ್‌ ಬ್ಯಾನರ್‌ ಅಡಿ ಚಿಕ್ಕಬಳ್ಳಾಪುರದ ಮುನಿಕೃಷ್ಣ ಚಿತ್ರಕ್ಕೆ ಬಂಡವಾಳ ಹೂಡುತ್ತಿದ್ದು, ಕಿನ್ನಾಳ್‍ ರಾಜ್ ಸಂಭಾಷಣೆ, ರವಿ ಬಸ್ರೂರು ಸೋದರ ರಾಧಾಕೃಷ್ಣ ಬಸ್ರೂರು ಸಂಗೀತ ಸಂಯೋಜನೆ, ನಂದಕುಮಾರ್ ಕ್ಯಾಮೆರಾ ಕೈ ಚಳಕ ಚಿತ್ರಕ್ಕಿದೆ. ಅಲ್ಲದೇ ಈ ಚಿತ್ರದ ನಂತರ “ಮಮ್ಮಿ ಸೇವ್ ಮಿʼ ಸೀಕ್ವೆಲ್‍, ಮಗ್‍ವೆನ್ ನಿರ್ದೇಶಿಸುತ್ತಿರುವ “ಸೇಂಟ್ ಮಾರ್ಕ್ಸ್‌ ರೋಡ್ʼ ಸೇರಿದಂತೆ ಅವರದೇ ಪ್ರೊಡಕ್ಷನ್‌ನಲ್ಲಿ ಹೊಸ ಚಿತ್ರವನ್ನು ನಿರ್ಮಿಸಲು ಪ್ರಿಯಾಂಕ ಸಿದ್ಧತೆ ನಡೆಸುತ್ತಿದ್ದಾರೆ.