ದೆಹಲಿ-ದೋಹಾ ಕತಾರ್‌ ಏರ್‌ ವೇಸ್‌ ನಲ್ಲಿ ಕಾಣಿಸಿಕೊಂಡ ಹೊಗೆ; ವಿಮಾನ ತುರ್ತು ಭೂಸ್ಪರ್ಶ

Team Udayavani, Mar 21, 2022, 7:46 PM IST

ನವದೆಹಲಿ: ದೆಹಲಿಯಿಂದ ದೋಹಾಕ್ಕೆ ತೆರಳುತ್ತಿದ್ದ ಕತಾರ್‌ ಏರ್‌ ವೇಸ್‌ ವಿಮಾನವು ಪಾಕಿಸ್ತಾನದ ಕರಾಚಿಯಲ್ಲಿ ಸೋಮವಾರ (ಮಾ.21)ರಂದು ತುರ್ತು ಭೂಸ್ಪರ್ಶ  ಮಾಡಿದೆ.

ದೆಹಲಿಯಿಂದ ದೋಹಾಕ್ಕೆ ತೆರಳುತ್ತಿದ್ದ ಕ್ಯೂಆರ್‌ 579 ವಿಮಾನದ ಕಾರ್ಗೋ ಹೋಲ್ಡ್‌ ನಿಂದ ಇದ್ದಕ್ಕಿದ್ದಂತೆ ಹೊಗೆ ಕಾಣಿಸಿಕೊಂಡ ಪರಿಣಾಮ ಪ್ರಯಾಣಿಕರನ್ನು ಕರಾಚಿಯಲ್ಲಿ ಸುರಕ್ಷಿತವಾಗಿ ತುರ್ತಾಗಿ ಇಳಿಸಲಾಗಿದೆ.

ಈ ವಿಮಾನದಲ್ಲಿದ್ದ ಪ್ರಯಾಣಿಕರನ್ನು ಇನ್ನೊಂದು ವಿಮಾನದ ಮೂಲಕ ದೋಹಾಗೆ ಕಳಿಸಲಾಗಿದೆ ಎಂದು ಕತಾರ್‌ ವಿಮಾನಯಾನ ಸಂಸ್ಥೆಯು ತಿಳಿಸಿದೆ.

ಯಾವುದೇ ದೊಡ್ಡ ಅನಾಹುತ ಆಗಿಲ್ಲ. ಆದರೆ ನಮ್ಮ ಪ್ರಯಾಣಿಕರಿಗೆ ಆದ ಅನಾನುಕೂಲತೆಗಾಗಿ ನಾವು ಕ್ಷಮೆಯಾಚಿಸುತ್ತೇವೆ ಎಂದು ಕತಾರ್‌ ಏರ್‌ ವೇಸ್‌ ಹೇಳಿದೆ.

ಈ ವಿಮಾನದಲ್ಲಿ ಹೊಗೆ ಕಾಣಿಸಿಕೊಳ್ಳಲು ಕಾರಣವೇನು ಎಂಬ ಬಗ್ಗೆ ತನಿಖೆ ನಡೆಸಲಾಗುವುದು ಎಂದು ಸಂಸ್ಥೆ ತಿಳಿಸಿದೆ.