ಡಾರ್ಲಿಂಗ್‌ ಕೃಷ್ಣನಿಗೆ ರಾಧಿಕಾ ನಾಯಕಿ!

Team Udayavani, May 26, 2020, 4:07 AM IST

ಒಡೆಯ ಚಿತ್ರದ ಬಳಿಕ ಸಂದೇಶ್‌ ನಾಗರಾಜ್‌ ಬ್ಯಾನರ್‌ ನಲ್ಲಿ ನಿರ್ಮಾಣವಾಗುತ್ತಿರುವ ಹೊಸ ಚಿತ್ರವನ್ನು ನಾಗಶೇಖರ್‌ ನಿರ್ದೇಶಿಸುತ್ತಿದ್ದು, ಲವ್‌ ಮಾಕ್ಟೇಲ್‌ ಖ್ಯಾತಿಯ ಡಾರ್ಲಿಂಗ್‌ ಕೃಷ್ಣ ನಟಿಸುತ್ತಿದ್ದಾರೆ ಎನ್ನಲಾಗಿದೆ. ಲಾಕ್‌ ಡೌನ್‌  ಸಮಯದಲ್ಲಿ ನಿರ್ದೇಶಕ ನಾಗಶೇಖರ್‌ ಹೊಸ ಕಥೆ ಸಿದ್ದಪಡಿಸಿದ್ದಾರೆ. ಇನ್ನು ಕಥೆಯನ್ನು ಕೇಳಿದ ಕೃಷ್ಣ ಕೂಡ ನಾಗಶೇಖರ್‌ ಚಿತ್ರಕ್ಕೆ ಗ್ರೀನ್‌ ಸಿಗ್ನಲ್‌ ನೀಡಿದ್ದಾರಂತೆ.

ಈ ಕಥೆಯ ಪಾತ್ರಕ್ಕೆ ಕೃಷ್ಣ ಫಿಟ್‌ ಆಗುತ್ತಾರೆ ಹೀಗಾಗಿ ಅವರನ್ನೇ ಆಯ್ಕೆ  ಮಾಡಿದ್ದಾಗಿ ನಾಗಶೇಖರ್‌ ತಿಳಿಸಿದ್ದಾರೆ. ಲವ್‌ ಮಾಕ್ಟೇಲ್‌ ಸಿನಿಮಾದಲ್ಲಿ ಲವ್ವರ್‌ ಬಾಯ್‌ ಆಗಿದ್ದ ಕೃಷ್ಣ, ಈ ಚಿತ್ರದಲ್ಲಿ ಫ್ಲರ್ಟ್‌ ಮಾಡುವ ಹುಡುಗನಾಗಿ ತೆರೆ ಮೇಲೆ ಕಾಣಿಸಿಕೊಳ್ಳಲಿದ್ದಾರೆ. ಇನ್ನೂ ಚಿತ್ರಕ್ಕೆ ನಾಯಕಿ ಆಯ್ಕೆ ಮಾಡಬೇಕಿದೆ.  ಸದ್ಯ ಚಿತ್ರತಂಡ ನಟಿ ರಾಧಿಕಾ ಕುಮಾರಸ್ವಾಮಿ ಅವರನ್ನು ತೆರೆಮೇಲೆ ಕರೆತರಲು ಆಲೋಚಿಸಿದೆಯಂತೆ.

ಈಗಾಗಲೇ ರಾಧಿಕಾ ಕುಮಾರಸ್ವಾಮಿ ಅವರ  ಜೊತೆ ಫೋನಿನಲ್ಲಿ ಒಂದು ಸುತ್ತಿನ ಮಾತುಕಥೆ ನಡೆಸಿರುವ ನಿರ್ದೇಶಕ ನಾಗಶೇಖರ್‌,  ಲಾಕ್‌ ಡೌನ್‌ ಬಳಿಕ ರಾಧಿಕಾ ಕುಮಾರಸ್ವಾಮಿ ಅವರನ್ನು ಭೇಟಿ ಮಾಡಿ ಕಥೆ ಹೇಳುವುದಾಗಿ ತಿಳಿಸಿದ್ದಾರೆ. ಉಳಿದಂತೆ ಈ ಚಿತ್ರಕ್ಕೆ ಸತ್ಯ ಹೆಗಡೆ ಛಾಯಾಗ್ರಹಣ, ದೀಪು ಎಸ್‌ ಕುಮಾರ್‌ ಸಂಕಲನವಿದೆ. ಜೆಸ್ಸಿ ಗಿಫ್ಟ್ ಸಂಗೀತವಿದ್ದು,  ಕವಿರಾಜ್‌  ಸಾಹಿತ್ಯವಿದೆ. ಇನ್ನುಳಿದ ಕಲಾವಿದರು ತಂತ್ರಜ್ಞರ ಆಯ್ಕೆ ನಡೆಯುತ್ತಿದೆ.

ಒಟ್ಟಾರೆ ರಾಧಿಕಾ ಕುಮಾರಸ್ವಾಮಿ ಡಾರ್ಲಿಂಗ್‌ ಕೃಷ್ಣ ಜೊತೆ ಹೆಜ್ಜೆ ಹಾಕುತ್ತಾರಾ ಎನ್ನುವುದು ಇನ್ನಷ್ಟೇ ಗೊತ್ತಾಗಬೇಕಿದೆ.