Rahul Gandhi: ಚಾಕೊಲೇಟ್‌ ತಯಾರಿಸಿದ ರಾಹುಲ್‌! – ಊಟಿಯ ಚಾಕೊಲೇಟ್‌ ಫ್ಯಾಕ್ಟರಿಗೆ ಭೇಟಿ

Team Udayavani, Aug 27, 2023, 9:31 PM IST

ಉದಕಮಂಡಲ: ಕಾಂಗ್ರೆಸ್‌ ನಾಯಕ, ಸಂಸದ ರಾಹುಲ್‌ ಗಾಂಧಿ ಅವರು ಭಾನುವಾರ ಊಟಿಯಲ್ಲಿನ ಚಾಕೊಲೇಟ್‌ ತಯಾರಿಕಾ ಫ್ಯಾಕ್ಟರಿಯೊಂದಕ್ಕೆ ಭೇಟಿ ನೀಡಿ, ಖುದ್ದು ತಾವೇ ಚಾಕೊಲೇಟ್‌ ತಯಾರಿಸಿ, ಸವಿದಿದ್ದಾರೆ. ಈ ವಿಡಿಯೋವನ್ನು ಸಾಮಾಜಿಕ ಜಾಲತಾಣಗಳಲ್ಲೂ ಹಂಚಿಕೊಂಡಿರುವ ಅವರು, ಭಾರತೀಯ ಆರ್ಥಿಕತೆಗೆ ಸಣ್ಣ ಮತ್ತು ಮಧ್ಯಮ ಕೈಗಾರಿಕೆಗಳ (ಎಂಎಸ್‌ಎಂಇ) ಕೊಡುಗೆಯನ್ನು ಶ್ಲಾ ಸಿದ್ದಾರೆ.

ವಯನಾಡ್‌ಗೆ ತೆರಳುವ ಮಾರ್ಗ ಮಧ್ಯದಲ್ಲಿಯೇ ರಾಹುಲ್‌, ಮುರುಳೀಧರ್‌ ರಾವ್‌ ಹಾಗೂ ಸ್ವಾತಿ ದಂಪತಿ ಆರಂಭಿಸಿರುವ ಊಟಿಯಲ್ಲಿನ ಸಣ್ಣ ಚಾಕೊಲೇಟ್‌ ಫ್ಯಾಕ್ಟರಿಗೆ ಭೇಟಿ ನೀಡಿದ್ದಾರೆ. 70 ಮಂದಿ ಮಹಿಳಾ ಕಾರ್ಮಿಕರಿರುವ ಫ್ಯಾಕ್ಟರಿಯಲ್ಲಿ ಚಾಕೊಲೇಟ್‌ ತಯಾರಿಸುವುದು ಹೇಗೆ ಎಂದು ನೋಡಿ, ಸ್ವತಃ ತಾವೂ ತಯಾರಿಸಿ, ಸವಿದಿದ್ದಾರೆ.

ಈ ವೇಳೆ ಮಹಿಳೆಯರೊಂದಿಗೆ ತಮಿಳಿನಲ್ಲಿ ಮಾತನಾಡುವ, ಕಲಿಯುವ ಪ್ರಯತ್ನವನ್ನೂ ಮಾಡಿದ್ದಾರೆ. ಈ ಕುರಿತು ವಿಡಿಯೋ ಹಂಚಿಕೊಂಡು, ಇಲ್ಲಿನ ಮಹಿಳೆಯರ ಹುರುಪು ಮತ್ತು ಕಾರ್ಯವಿಧಾನ ಎಂಎಸ್‌ಎಂಇಗಳ ಸಾಮರ್ಥ್ಯವನ್ನು ಸಾಬೀತು ಪಡಿಸುತ್ತದೆ. ಆದರೆ, ಸರ್ಕಾರವು ದೊಡ್ಡ ಉದ್ಯಮಿಗಳಿಗೆ ಸಹಾಯ ಮಾಡಲು ಎಂಎಸ್‌ಎಂಇ ಹೆಗಲಿಗೆ ಜಿಎಸ್‌ಟಿ ಹೊರೆ ಹೊರಿಸಿದೆ. ಏಕರೂಪದ ಜಿಎಸ್‌ಟಿ ದರ ಮಾತ್ರವೇ ಇದಕ್ಕೆ ಪರಿಹಾರವಾಗಿದ್ದು, ಅದನ್ನು ಜಾರಿಗೊಳಿಸಬೇಕು ಎಂದೂ ರಾಹುಲ್‌ ಹೇಳಿದ್ದಾರೆ.