Annapurni: ರಾಮನಿಗೆ ಅವಹೇಳನ ವಿವಾದ: “ಅನ್ನಪೂರ್ಣಿ” ನಟಿ ಕ್ಷಮೆ ಯಾಚನೆ

Team Udayavani, Jan 20, 2024, 12:53 AM IST

ಹೊಸದಿಲ್ಲಿ: “ಅನ್ನಪೂರ್ಣಿ’ ಸಿನೆಮಾದಲ್ಲಿ ಧಾರ್ಮಿಕ ಭಾವನೆಗಳಿಗೆ ಧಕ್ಕೆ ತಂದ ಆರೋಪ ಸಂಬಂಧ ನಟಿ ನಯನತಾರಾ ಕ್ಷಮೆಯಾಚಿಸಿದ್ದಾರೆ. “ಜೈ ಶ್ರೀ ರಾಮ್‌. ನಾನು ಮತ್ತು ಚಿತ್ರ ತಂಡ ಯಾರೊಬ್ಬರ ಭಾವನೆಗಳನ್ನು  ಘಾಸಿಗೊಳಿಸುವ ಉದ್ದೇಶ ಹೊಂದಿಲ್ಲ. ಸಕಾರಾತ್ಮಕ ಅಂಶಗಳನ್ನು ಹಂಚಿಕೊಳ್ಳುವ ನಮ್ಮ ಪ್ರಾಮಾಣಿಕ ಪ್ರಯತ್ನದಲ್ಲಿ ಅಜಾಗರೂಕತೆಯಿಂದ ನೋವುಂಟು ಮಾಡಿರಬಹುದು. ಇದಕ್ಕಾಗಿ ನಾನು ಕ್ಷಮೆ ಕೋರುತ್ತೇನೆ. ನಾನು ದೇವರ ಮೇಲೆ ನಂಬಿಕೆ ಹೊಂದಿದ್ದೇನೆ’ ಎಂದು ಇನ್‌ಸ್ಟಾಗ್ರಾಂನಲ್ಲಿ ನಟಿ ಬರೆದುಕೊಂಡಿದ್ದಾರೆ.

ಸಾಮಾಜಿಕ ಜಾಲತಾಣದಲ್ಲಿ ಹಲವರು ನಯನತಾರಾ ಕ್ಷಮೆಯಾಚಿಸಿದ್ದನ್ನು ಸ್ವಾಗತಿಸಿದ್ದಾರೆ. ಇನ್ನು ಕೆಲವರು, ಕ್ಷಮೆ ಕೇಳಬಾರದಿತ್ತು. ಚಿತ್ರದ ಪರವಾಗಿ ನಿಲ್ಲಬೇಕಿತ್ತು ಎಂದು ಸಲಹೆ ನೀಡಿದ್ದಾರೆ. “ಅನ್ನಪೂರ್ಣಿ’ ಸಿನೆಮಾ ವಿವಾದವಾಗುತ್ತಿದ್ದಂತೆ ನೆಟ್‌ಫ್ಲಿಕ್ಸ್‌ನಿಂದ ಸಿನೆಮಾವನ್ನು ತೆಗೆದುಹಾಕಲಾಗಿತ್ತು.