Rashmika Mandanna; ಪುಷ್ಟ-3 ಸುಳಿವು ನೀಡಿದ ನಟಿ ರಶ್ಮಿಕಾ ಮಂದಣ್ಣ

Team Udayavani, Nov 28, 2024, 12:11 PM IST

ಯಾವುದೇ ಸಿನಿಮಾ ಇರಲಿ, ಅದರ ತಯಾರಿ, ಚಿತ್ರೀಕರಣ ಕೊನೆಗೆ ಬಿಡುಗಡೆಯವರೆಗೆ ವರ್ಷಗಳ ಸಮಯ ಹಿಡಿಯುತ್ತದೆ. ಈ ಅವಧಿಯಲ್ಲಿ ಕಲಾವಿದರಿಗೆ ಆವಿಸ್ಮರಣೀಯ ಅನುಭವ ನೀಡುತ್ತದೆ. ಸದ್ಯ ನಟಿ ರಶ್ಮಿಕಾ ಮಂದಣ್ಣ ಇದೇ ರೀತಿಯ ಅನುಭವ ಹೊಂದಿದ್ದಾರೆ.

ಇತ್ತೀಚೆಗೆ ಪುಷ್ಪ 2 ಚಿತ್ರದ ಶೂಟಿಂಗ್‌ ಪೂರ್ಣ ಗೊಂಡು, ಡಿಸೆಂಬರ್‌ 5ರಂದು ಬಿಡುಗಡೆಗೆ ಸಜ್ಜಾಗುತ್ತಿದೆ. ಹಾಗಾಗಿ ರಶ್ಮಿಕಾ, ಪುಷ್ಪ ಬಗೆಗಿನ ತಮ್ಮ ವಿಶೇಷ ಅನುಭವವನ್ನು ಇನಸ್ಟಾಗ್ರಾಂ ಸ್ಟೋರಿಯಲ್ಲಿ ಬರೆದಿದ್ದಾರೆ. ಜೊತೆಗೆ ಪುಷ್ಪ 3 ಬಗ್ಗೆ ಸಣ್ಣ ಸುಳಿವನ್ನೂ ನೀಡಿದ್ದಾರೆ.

“ಇದು ನನಗೆ ಅತ್ಯಂತ ಸಂತಸದ ದಿನ. ಪುಷ್ಪ 2 ಚಿತ್ರೀಕರಣದ ಕೊನೆ ದಿನದಂದು ಅದ್ಭುತ ಹಾಡೊಂದನ್ನು ಚಿತ್ರೀಕರಿಸಿದ್ದೇವೆ. ಇದು ಕೊನೆ ದಿನ ಎಂದೆನಿಸಲೇ ಇಲ್ಲ. ನನ್ನ 7-8 ವರ್ಷಗಳ ಸಿನಿ ಪಯಣದಲ್ಲಿ 5 ವರ್ಷ ಪುಷ್ಪ ಸೆಟ್‌ನಲ್ಲೇ ಕಳೆದಿದ್ದೇನೆ. ಇದು ನನಗೆ ಮನೆಯಂತಾಗಿದೆ. ಪುಷ್ಪ 3 ಕೆಲಸಗಳು ಬಾಕಿ ಇವೆ. ಒಂದು ಅಂತ್ಯದ ಭಾವ ಇದಾಗಿದೆ. ಅರ್ಥವಾಗದ ಭಾವನೆ, ದುಃಖಗಳು ಆವರಿಸಿಕೊಂಡಿವೆ. ಅಲ್ಲು ಅರ್ಜುನ್‌, ಸುಕುಮಾರ್‌ ಹಾಗೂ ಇಡೀ ಚಿತ್ರತಂಡ ನನ್ನನ್ನು ಚೆನ್ನಾಗಿ ಅರ್ಥೈಸಿಕೊಂಡಿದ್ದರು. ಇಂಥ ವಿಶೇಷ ವ್ಯಕ್ತಿಗಳ ಜೊತೆ ಕೆಲಸ ಮಾಡುತ್ತ ಅವರಿಗೆ ಆಪ್ತವಾಗಿದ್ದೇನೆ. ಕಳೆದ 5 ವರ್ಷಗಳಿಂದ ಪುಷ್ಪ ಸೆಟ್‌ ನನ್ನ ಮನೆಯಾಗಿದ್ದು, ಈಗ ಇದನ್ನು ತೊರೆಯುತ್ತಿರುವುದು ವಿಷಾದವಾಗಿದೆ’ ಎಂದು ರಶ್ಮಿಕಾ ಮನದ ಮಾತುಗಳನ್ನು ಹಂಚಿಕೊಂಡಿದ್ದಾರೆ.