Manipur: ಮಾಮೂಲಿ ಟ್ರಕ್‌ಗಳಿಗೆ ಸೇನೆ ಮಾದರಿ ಬಣ್ಣ ಬಳಿದ ಬಂಡುಕೋರರು!

Team Udayavani, Sep 24, 2023, 10:14 PM IST

ಇಂಫಾಲ್‌: ಸಂಘರ್ಷ ಪೀಡಿತ ಮಣಿಪುರದಲ್ಲಿ ಅಚ್ಚರಿಯ ಬೆಳವಣಿಗೆಯೊಂದು ನಡೆದಿದ್ದು, ಅರೆಸೇನಾಪಡೆಯ ವಾಹನಗಳ ಮಾದರಿಯಲ್ಲೇ ಬಣ್ಣ ಬಳಿದಿರುವಂಥ ಹಲವಾರು ವಾಹನಗಳು ಪತ್ತೆಯಾಗಿವೆ. ಕಾಕ್‌ಚಿಂಗ್‌ ಜಿಲ್ಲೆಯಲ್ಲಿ ಇಂತಹ ಅನೇಕ ಟ್ರಕ್‌ಗಳು ಕಂಡುಬಂದಿದ್ದು, ಈ ಕುರಿತು ಮಾಹಿತಿ ಲಭ್ಯವಾಗುತ್ತಿದ್ದಂತೆಯೇ ಮಣಿಪುರ ಪೊಲೀಸರಿಗೆ ಅಸ್ಸಾಂ ರೈಫ‌ಲ್ಸ್‌ ಪತ್ರ ಬರೆದಿದೆ.

ಕಣಿವೆ ಮೂಲದ ಬಂಡುಕೋರರು ಗುಂಪುಗಳ ಸಹಾಯದಿಂದ ಕೆಲವು ದುಷ್ಕರ್ಮಿಗಳು ಮಾರುಕಟ್ಟೆಯಿಂದ ಹಲವು ಟ್ರಕ್‌ಗಳನ್ನು ಖರೀದಿಸಿ, ಅವುಗಳಿಗೆ ಸೇನೆಯ ಮಾದರಿಯ ಬಣ್ಣಗಳನ್ನು ಹಚ್ಚಿದ್ದಾರೆ. ಜತೆಗೆ ಅಸ್ಸಾಂ ರೈಫ‌ಲ್ಸ್‌ನ ಲಾಂಛನವನ್ನೂ ಅಳವಡಿಸಿದ್ದಾರೆ. ನಾಗರಿಕ ವಾಹನಗಳನ್ನು ಸೇನಾ ವಾಹನಗಳಾಗಿ ಕಾಣುವಂತೆ ಬದಲಾಯಿಸಿದ್ದಾರೆ. ಇವುಗಳನ್ನು ಬಳಸಿಕೊಂಡು ದೇಶವಿರೋಧಿ ಕೃತ್ಯಗಳನ್ನು ನಡೆಸುವ ಅಪಾಯವಿದೆ ಎಂದು ಚುರಾಚಾಂದ್‌ಪುರ ಎಸ್‌ಪಿಗೆ ಬರೆದ ಪತ್ರದಲ್ಲಿ ಅಸ್ಸಾಂ ರೈಫ‌ಲ್ಸ್‌ ಕಳವಳ ವ್ಯಕ್ತಪಡಿಸಿದೆ. ಜತೆಗೆ, ಕೂಡಲೇ ಎಚ್ಚೆತ್ತು ತಪ್ಪಿತಸ್ಥರ ವಿರುದ್ಧ ಕ್ರಮ ಕೈಗೊಳ್ಳುವಂತೆ ಹಾಗೂ ಸಂಭಾವ್ಯ ವಿಧ್ವಂಸಕ ಕೃತ್ಯವನ್ನು ತಪ್ಪಿಸುವಂತೆಯೂ ಮನವಿ ಮಾಡಿದೆ.
ಸತತ 4 ತಿಂಗಳಿಂದಲೂ ಮಣಿಪುರದಲ್ಲಿ ಹಿಂಸಾಚಾರ ನಡೆಯುತ್ತಿದ್ದು, ಈವರೆಗೆ 175ಕ್ಕೂ ಹೆಚ್ಚು ಮಂದಿ ಬಲಿಯಾಗಿದ್ದಾರೆ.