ಕೆಂಪಣ್ಣ ಹೊಸ ಕಮಿಷನ್‌ ಬಾಂಬ್‌ -ಆಗ ರಾಜಕಾರಣಿಗಳು; ಈಗ ಅಧಿಕಾರಿಗಳ ದರಬಾರು ನಡೆಯುತ್ತಿದೆ

Team Udayavani, Dec 8, 2023, 12:53 AM IST

ಬೆಂಗಳೂರು: “ಹಿಂದೆ ಬಿಜೆಪಿ ಸರಕಾರ ಇದ್ದಾ ಗ ಕಮಿಷನ್‌ ವಿಚಾರದಲ್ಲಿ ರಾಜಕಾರಣಿಗಳ ರಾಜ್ಯಭಾರವಾಗಿತ್ತು. ಈಗಿನ ಕಾಂಗ್ರೆಸ್‌ ಸರಕಾರದಲ್ಲಿ ಅಧಿಕಾರಿ ಗಳಿಂದ ರಾಜ್ಯಭಾರ ನಡೆಯುತ್ತಿದೆ…’
– ಹೀಗೆಂದು ಕರ್ನಾಟಕ ಗುತ್ತಿಗೆದಾರರ ಸಂಘದ ಅಧ್ಯಕ್ಷ ಡಿ. ಕೆಂಪಣ್ಣ ಹೊಸ ಬಾಂಬ್‌ ಸಿಡಿಸಿದ್ದಾರೆ. ಗುತ್ತಿಗೆ ಕಾಮಗಾರಿಗೆ ಅನುದಾನ ಮಂಜೂರು ಮಾಡಲು ಕಮಿ ಷನ್‌ ಕೇಳುತ್ತಿರುವ ಆರೋಪಕ್ಕೆ ಸಂಬಂಧಿಸಿ ಬೆಂಗಳೂರಿನಲ್ಲಿರುವ ಲೋಕೋಪಯೋಗಿ ಇಲಾಖೆಯ ಮುಖ್ಯ ಕಟ್ಟಡದಲ್ಲಿರುವ ನ್ಯಾ| ಎಚ್‌.ಎನ್‌. ನಾಗಮೋಹನ ದಾಸ್‌ ವಿಚಾರಣ ಆಯೋಗಕ್ಕೆ ಗುರುವಾರ 6 ಸಾವಿರ ಪುಟಗಳ ದಾಖಲೆ ಸಲ್ಲಿಕೆ ಮಾಡಿದ ಬಳಿಕ ಅವರು ಮಾತನಾಡಿದರು.

“ಎಲ್ಲ ಸರಕಾರಗಳಲ್ಲೂ ಭ್ರಷ್ಟಾಚಾರ ಇದೆ ಎಂದಿದ್ದೇನೆ. ಕಾಂಗ್ರೆಸ್‌ ಸರಕಾರದಲ್ಲೂ ಇದು ನಡೆಯುತ್ತಿದೆ. ಹಿಂದಿನ ಸರಕಾರದಲ್ಲಿ ರಾಜಕಾರಣಿಗಳ ರಾಜ್ಯಭಾರವಾಗಿತ್ತು, ಈಗ ಅಧಿಕಾರಿಗಳೇ ರಾಜ್ಯಭಾರ ಮಾಡುತ್ತಿದ್ದಾರೆ. ಹಾಲಿ ಸರಕಾರದಲ್ಲಿ ನಡೆದ ಭ್ರಷ್ಟಾಚಾರದ ದಾಖಲೆ ಕೂಡ ಸಲ್ಲಿಕೆ ಮಾಡಿದ್ದೇವೆ. ನನಗೆ ಗೊತ್ತಿರುವ ಹಾಗೆ ಕಮಿಷನ್‌ ವಿಷಯದಲ್ಲಿ ಇದುವರೆಗೆ ಯಾವ ರಾಜಕಾರಣಿಯೂ ವೈಯಕ್ತಿಕವಾಗಿ ಬಂದಿಲ್ಲ. ಬಂದರೆ ತಿಳಿಸಲು ನಮಗೆ ಭಯವಿಲ್ಲ. ಅಧಿಕಾರಿಗಳನ್ನು ಹದ್ದುಬಸ್ತಿನಲ್ಲಿ ಇಟ್ಟುಕೊಳ್ಳಬೇಕು ಎಂದು ಮುಖ್ಯಮಂತ್ರಿಗಳಿಗೂ ಪತ್ರ ಬರೆದಿದ್ದೇನೆ. ಇದಕ್ಕೆ ಸೂಕ್ತ ರೀತಿಯಲ್ಲಿ ಸ್ಪಂದಿಸದಿದ್ದರೆ ಮುಂದಿನ ಹೋರಾಟದ ಬಗ್ಗೆ ತೀರ್ಮಾನ ತೆಗೆದುಕೊಳ್ಳುತ್ತೇವೆ’ ಎಂದು ಕೆಂಪಣ್ಣ ಎಚ್ಚರಿಕೆ ನೀಡಿದರು.

ಸಮಸ್ಯೆ ಹಂಚಿಕೊಂಡ ಗುತ್ತಿಗೆದಾರರು
ಕೆಂಪಣ್ಣ ಅವರ ನೇತೃ ತ್ವ ದಲ್ಲಿ ರಾಜ್ಯದ ವಿವಿಧ ಜಿಲ್ಲೆಗಳ ಗುತ್ತಿಗೆದಾರರು ತಮ್ಮ ಸಮಸ್ಯೆಗಳನ್ನು ನ್ಯಾ| ಎಚ್‌.ಎನ್‌. ನಾಗಮೋಹನ್‌ದಾಸ್‌ ಬಳಿ ನಿವೇದಿಸಿಕೊಂಡಿದ್ದಾರೆ. ಹಿರಿತನದ ಆಧಾರದಲ್ಲಿ ಬಾಕಿ ಬಿಲ್‌ ಪಾವತಿ ಮಾಡದೆ ಕಮಿಷನ್‌ ಕೊಡುವವರಿಗೆ ಬಾಕಿ ಬಿಲ್‌ ಪಾವತಿ ಮಾಡಲಾಗುತ್ತಿದೆ. ನಿಯಮಾನುಸಾರ ಬಾಕಿ ಬಿಲ್‌ ಬಿಡುಗಡೆ ಮಾಡುತ್ತಿಲ್ಲ ಎಂಬಿತ್ಯಾದಿ ವಿಚಾರಗಳನ್ನು ನ್ಯಾ| ದಾಸ್‌ ಗಮನಕ್ಕೆ ಗುತ್ತಿಗೆದಾರರು ತಂದರು. ಹಿಂದಿನ ಬಿಜೆಪಿ ಸರಕಾರ, ಹಾಲಿ ಕಾಂಗ್ರೆಸ್‌ ಸರಕಾರದಲ್ಲಿ ನಡೆದ ಅವ್ಯವ ಹಾರದ ದಾಖಲೆ, ಭ್ರಷ್ಟಾಚಾರದ ಆಡಿಯೋ, ವೀಡಿಯೋಗಳನ್ನು ಆಯೋಗಕ್ಕೆ ಸಲ್ಲಿಸಲಾಗಿದೆ ಎಂದು ತಿಳಿದು ಬಂದಿದೆ.

ಹಾಲಿ ಸರಕಾರದಲ್ಲಿ ಯಾವುದೇ ಸಚಿವರ ಮೇಲೆ ಕಮಿಷನ್‌ ಆರೋಪ ಕೇಳಿ ಬಂದಿಲ್ಲ. ಒಂದು ವೇಳೆ ಆರೋಪ ಕೇಳಿ ಬಂದರೆ ತಿಳಿ ಸಲು ಹೆದರುವುದಿಲ್ಲ. ಈ ಹಿಂದೆ ಮನೆಗೆ ಬಂದು ಬಂಧಿಸಿದಾಗಲೂ ಹೆದರಲಿಲ್ಲ.
-ಡಿ. ಕೆಂಪಣ್ಣ, ಕೆಎಸ್‌ಸಿಎ ಅಧ್ಯಕ್ಷ