ಜೀರ್ಣೋದ್ಧಾರಗೊಂಡ 200 ವರ್ಷ ಹಳೆಯ ಮುಂಬಯಿ ವಾಲ್ಕೇಶ್ವರ ಶ್ರೀ ಕಾಶೀ ಮಠ ಉದ್ಘಾಟನೆ

ಕಾಶೀ ಮಠಾಧೀಶರಿಂದ ಇಂದು ಉದ್ಘಾಟನೆ

Team Udayavani, Feb 29, 2024, 6:30 AM IST

ಜೀರ್ಣೋದ್ಧಾರಗೊಂಡ 200 ವರ್ಷ ಹಳೆಯ ಮುಂಬಯಿ ವಾಲ್ಕೇಶ್ವರ ಶ್ರೀ ಕಾಶೀ ಮಠ ಉದ್ಘಾಟನೆ

ಮಣಿಪಾಲ /ಮುಂಬಯಿ: ಸಮಗ್ರ ಜೀರ್ಣೋದ್ಧಾರಗೊಂಡ ವಾಲ್ಕೇಶ್ವರ ಶ್ರೀ ಕಾಶೀ ಮಠದ ಉದ್ಘಾಟನ ಸಮಾರಂಭವು ಫೆ. 29ರಂದು ನೆರವೇರಲಿದೆ.

ಫೆ. 29ರಂದು ಬೆಳಗ್ಗೆ 10 ಗಂಟೆಗೆ ಶ್ರೀಮತ್‌ ಸಂಯಮೀಂದ್ರತೀರ್ಥ ಶ್ರೀಗಳು ನೂತನ ಮಠ ವನ್ನು ಉದ್ಘಾಟಿಸಲಿದ್ದಾರೆ. ಉದ್ಘಾ ಟನ ಸಮಾ ರಂಭದ ಪ್ರಯುಕ್ತ ಫೆ. 28ರಿಂದ ಮಾ.9ರ ವರೆಗೆ ವಿವಿಧ ಧಾರ್ಮಿಕ ಕಾರ್ಯ ಕ್ರಮಗಳನ್ನು ಸ್ವಾಮೀಜಿಯವರ ಮಾರ್ಗದರ್ಶನ ದಲ್ಲಿ ಹಮ್ಮಿ ಕೊಳ್ಳಲಾಗಿದೆ.

18ನೇ ಶತಮಾನದಲ್ಲಿ ಸ್ಥಾಪನೆ
ವಾಲ್ಕೇಶ್ವರ ಶ್ರೀ ಕಾಶೀ ಮಠವು 18ನೇ ಶತಮಾನ ದಲ್ಲಿ ಸ್ಥಾಪನೆಗೊಂಡಿದ್ದು, ತನ್ನದೇ ಆದ ಇತಿಹಾಸ ಹೊಂದಿ ಧಾರ್ಮಿಕ ಕೇಂದ್ರವಾಗಿ ಬೆಳೆದು ನಿಂತಿದೆ. ಕಾಶೀ ಮಠದ 7ನೇ ಯತಿಗಳಾದ ಶ್ರೀಮತ್‌ ಮಾಧವೇಂದ್ರತೀರ್ಥ ಸ್ವಾಮೀಜಿ ಹಾಗೂ 18ನೇ ಯತಿಗಳಾದ ಶ್ರೀಮತ್‌ ವರದೇಂದ್ರತೀರ್ಥ ಸ್ವಾಮೀಜಿಗಳ ವೃಂದಾವನಗಳು ಇಲ್ಲಿವೆ.

ಪ್ರತೀ ವರ್ಷ ಮುಂಬಯಿ ಕಿಂಗ್ಸ್‌ ಸರ್ಕಲ್‌ನ ಜಿಎಸ್‌ಬಿ ಸೇವಾ ಮಂಡಲದ ಗಣೇಶೋತ್ಸವವು ನಡೆಯುವ ವೇಳೆ ಶ್ರೀಮತ್‌ ಮಾಧವೇಂದ್ರತೀರ್ಥ ಶ್ರೀಗಳ ವೃಂದಾವನದ ಮುಂದೆ ತೆಂಗಿನ ಕಾಯಿಯನ್ನು ಇರಿಸಿ ಪ್ರಾರ್ಥನೆ ಸಲ್ಲಿಸಿ ಬಳಿಕ ಅದನ್ನು ಗಣಪತಿ ವಿಗ್ರಹದೊಂದಿಗೆ ಇರಿಸುವ ಕ್ರಮವಿದೆ.

ಶ್ರೀಮತ್‌ ಮಾಧವೇಂದ್ರತೀರ್ಥ ಶ್ರೀಗಳು ವಿಶಿಷ್ಟ ಸಿದ್ಧಿಯ ಯೋಗಿ ಹಾಗೂ ತಪಸ್ವಿಗಳಾಗಿದ್ದರು. ಇವರ ಖ್ಯಾತಿ ಮತ್ತು ಮಹಿಮೆ ಅಪ್ರತಿಮವಾದದ್ದು. ವಾಲ್ಕೇಶ್ವರ ಶ್ರೀ ಕಾಶೀ ಮಠವು ಇವರಿಂದಲೇ ಸ್ಥಾಪನೆಗೊಂಡಿತ್ತು. ಶ್ರೀಮತ್‌ ವರದೇಂದ್ರತೀರ್ಥ ಶ್ರೀಗಳು ಮಂತ್ರಸಿದ್ಧಿ ಪಡೆದಿ ದ್ದರು, 14 ಭಾಷೆ ಗಳನ್ನು ಬಲ್ಲವರಾಗಿದ್ದರು. ಗಣಿತ, ಜೋತಿಷ, ಹಸ್ತ ರೇಖಾ ಶಾಸ್ತ್ರ ಹಾಗೂ ಆಯುರ್ವೇದ ವಿದ್ವಾಂಸ ರಾಗಿದ್ದರು. ತಾಂತ್ರಿಕ ಜ್ಞಾನ ಕೂಡ ಅಪಾರ ವಾಗಿತ್ತು. ಈ ವರ್ಷ ಶ್ರೀಮತ್‌ ಮಾಧವೇಂದ್ರತೀರ್ಥ ಶ್ರೀಗಳ ಜೀವಂತ ಸಮಾಧಿ ಪ್ರವೇಶದ 250ನೇ ವರ್ಷ.ಇದರೊಂದಿಗೆ ಶ್ರೀಮತ್‌ ವರದೇಂದ್ರತೀರ್ಥ ಶ್ರೀಗಳ 110ನೇ ಪುಣ್ಯತಿಥಿ ಆಚರಣೆಯೂ ಇದೆ.

2022ರಲ್ಲಿ ಶಂಕುಸ್ಥಾಪನೆ
ಶ್ರೀ ವಾಲ್ಕೇಶ್ವರ ಮಠದ ಸಮಗ್ರ ಜೀರ್ಣೋದ್ಧಾರಕ್ಕೆ ಶ್ರೀ ಕಾಶೀ ಮಠಾಧೀಶರಾದ ಶ್ರೀಮತ್‌ ಸಂಯಮೀಂದ್ರತೀರ್ಥ ಸ್ವಾಮೀಜಿಯವರ ಆಶೀರ್ವಾದಗಳೊಂದಿಗೆ 2022ರ ಮೇ ತಿಂಗಳಿನಲ್ಲಿ ಶಂಕುಸ್ಥಾಪನೆ ನೆರವೇರಿತ್ತು. ಈಗ ಸುಮಾರು 22,000 ಚದರ ಅಡಿಗಳ ಭವ್ಯವಾದ ಕಟ್ಟಡ ನಿರ್ಮಾಣಗೊಂಡಿದೆ.