ಮೇ ಅಂತ್ಯದೊಳಗೆ ಸಿಇಟಿ ಫ‌ಲಿತಾಂಶ

Team Udayavani, May 5, 2019, 3:02 AM IST

ಬೆಂಗಳೂರು: ವೃತ್ತಿಪರ ಕೋರ್ಸ್‌ಗಳ ಸೀಟು ಹಂಚಿಕೆಗೆ ಕರ್ನಾಟಕ ಪರೀಕ್ಷಾ ಪ್ರಾಧಿಕಾರ ನಡೆಸಿದ ಸಾಮಾನ್ಯ ಪ್ರವೇಶ ಪರೀಕ್ಷೆ (ಸಿಇಟಿ)ಯ ಫ‌ಲಿತಾಂಶ ಮೇ ಅಂತ್ಯದೊಳಗೆ ಹೊರಬೀಳುವ ಸಾಧ್ಯತೆಯಿದೆ.

ರಾಜ್ಯದ 431 ಪರೀಕ್ಷಾ ಕೇಂದ್ರದಲ್ಲಿ ಏ.29 ಮತ್ತು ಏ.30ರಂದು ನಡೆದ ಸಾಮಾನ್ಯ ಪ್ರವೇಶ ಪರೀಕ್ಷೆಗೆ 97,716 ಹುಡುಗರು ಹಾಗೂ 96,585 ಹುಡುಗಿಯರು ಸೇರಿ ಒಟ್ಟು 1,94,311 ಅಭ್ಯರ್ಥಿಗಳು ಸಿಇಟಿಗೆ ನೋಂದಣಿ ಮಾಡಿಕೊಂಡಿದ್ದರು.

ಜೀವಶಾಸ್ತ್ರಕ್ಕೆ ಶೇ.79.90, ಗಣಿತಕ್ಕೆ ಶೇ.91.92, ಭೌತಶಾಸ್ತ್ರಕ್ಕೆ ಶೇ.92.27 ಹಾಗೂ ರಸಾಯನಶಾಸ್ತ್ರ ಪರೀಕ್ಷೆಗೆ ಶೇ.90.88ರಷ್ಟು ವಿದ್ಯಾರ್ಥಿಗಳು ಹಾಜರಾಗಿದ್ದರು. ಎಲ್ಲ ವಿದ್ಯಾರ್ಥಿಗಳ ಉತ್ತರ ಪತ್ರಿಕೆಯ ಮೌಲ್ಯಮಾಪನ ಕಾರ್ಯ ನಡೆಯುತ್ತಿದೆ.

ಉತ್ತರಗಳು ಓಎಂಆರ್‌ ಶೀಟಿನಲ್ಲಿರುವುದರಿಂದ ಸ್ಕ್ಯಾನಿಂಗ್‌ ಪ್ರಕ್ರಿಯೆ ಕೂಡ ನಡೆಯುತ್ತಿದೆ. ಮೇ ಮೂರನೇ ಅಥವಾ ನಾಲ್ಕನೇ ವಾರದಲ್ಲಿ ಫ‌ಲಿತಾಂಶ ಹೊರಬೀಳುವ ಸಾಧ್ಯತೆ ಇದೆ. ಜೂನ್‌ ಮೊದಲ ವಾರದಿಂದ ದಾಖಲಾತಿ ಪರಿಶೀಲನೆ ಕಾರ್ಯ ನಡೆಯಲಿದೆ ಎಂದು ಪ್ರಾಧಿಕಾರದ ಮೂಲಗಳು ತಿಳಿಸಿವೆ.