ಸುಶಾಂತ್‌ ಮನೆಯ ಅಡುಗೆ ಭಟ್ಟ ಡ್ರಗ್ಸ್‌ ಸಿಂಡಿಕೇಟ್‌ ಸದಸ್ಯ: ಎನ್‌ಸಿಬಿ

Team Udayavani, Sep 7, 2020, 6:04 PM IST

ಮುಂಬೈ: ಇತ್ತೀಚೆಗೆ ಮೃತಪಟ್ಟ ಬಾಲಿವುಡ್‌ ನಟ ಸುಶಾಂತ್‌ ಸಿಂಗ್‌ ಅವರ ಮನೆಯ ಬಾಣಸಿಗ ದೀಪೇಶ್‌ ಸಾವಂತ್‌ ಡ್ರಗ್‌ ಸಿಂಡಿ ಕೇಟ್‌ನ ಸಕ್ರಿಯ ಸದಸ್ಯ ಎಂಬ ವಿಚಾರ ಭಾನುವಾರ ಬಯಲಾಗಿದೆ.

ಸಾವಂತ್‌ ನೀಡಿರುವ ಹೇಳಿಕೆಗಳು, ಈಗಾಗಲೇ ಸಂಗ್ರಹಿಸಲಾಗಿರುವ ಡಿಜಿಟಲ್‌ ಪುರಾವೆಗಳಿಂದಾಗಿ ಸಾವಂತ್‌ ಡ್ರಗ್‌ ಜಾಲದ ಸಕ್ರಿಯ ಸದಸ್ಯನಾಗಿದ್ದ ಎಂಬುದು ಸ್ಪಷ್ಟವಾಗಿದೆ. ಅಷ್ಟೇ ಅಲ್ಲ, ಆತ ಡ್ರಗ್‌ ಪೂರೈಕೆದಾರರು ಮತ್ತು ಗಣ್ಯ ವ್ಯಕ್ತಿಗಳ ನಡುವಿನ ಕೊಂಡಿಯಾಗಿಯೂ ಕೆಲಸ ಮಾಡುತ್ತಿದ್ದ ಎಂದು ಎನ್‌ಸಿಬಿ ಹೇಳಿದೆ.

ಇನ್ನೊಂದೆಡೆ, 2018ರಲ್ಲಿ ಸುಶಾಂತ್‌ ಡ್ರಗ್‌ ಸೇವಿಸುತ್ತಿರುವುದನ್ನು ನಾನು ಕಣ್ಣಾರೆ ನೋಡಿದ್ದೇನೆ ಎಂದೂ ಸಾವಂತ್‌ ಎನ್‌ಸಿಬಿ ಅಧಿಕಾರಿಗಳ ಮುಂದೆ ಬಾಯಿಬಿಟ್ಟಿದ್ದಾನೆ ಎಂದು ಹೇಳಲಾಗಿದೆ.

ಕಂಗ್ರಾಟ್ಸ್‌ ಇಂಡಿಯಾ: ಭಾನುವಾರ ರಿಯಾ ಚಕ್ರವರ್ತಿಯ ತಂದೆ, ಸೇನೆಯ ನಿವೃತ್ತ ವೈದ್ಯ ಲೆ.ಕ.ಇಂದ್ರಜಿತ್‌ ಚಕ್ರವರ್ತಿ ಪ್ರಕಟಣೆಯೊಂದನ್ನು ನೀಡಿ, “ದೇಶವಾಸಿಗಳಿಗೆ ಅಭಿನಂದನೆಗಳು-ನೀವು ನನ್ನ ಮಗನ ಬಂಧನವಾಗುವಂತೆ ಮಾಡಿದಿರಿ. ಮುಂದೆ ನನ್ನ ಮಗಳೂ ಬಂಧಿತಳಾಗುತ್ತಾಳೆ. ನೀವೆಲ್ಲರೂ ಸೇರಿ ಪರಿಣಾಮಕಾರಿಯಾಗಿ ಮಧ್ಯಮವರ್ಗದ ಕುಟುಂಬವೊಂದನ್ನು ನಾಶ ಮಾಡಿದಿರಿ’ ಎಂದು ಅದರಲ್ಲಿ ಹೇಳಿದ್ದಾರೆ.