SRK: “ಬಾಲಿವುಡ್‌ ಹಾಳಾಗಲು ಶಾರುಖ್‌ ಕಾರಣ”: ವಿವೇಕ್‌ ಅಗ್ನಿಹೋತ್ರಿ

Team Udayavani, Aug 19, 2023, 6:47 AM IST

ನವದೆಹಲಿ: ಬಾಲಿವುಡ್‌ ಖ್ಯಾತ ನಟ ಶಾರುಖ್‌ ಖಾನ್‌ ಸಿನಿರಂಗದಲ್ಲಿ ವಿಪರೀತ ರಾಜಕೀಯ ಮಾಡುತ್ತಾರೆ. ಬಾಲಿವುಡ್‌ ಹಾಳಾಗಲು ಅವರೇ ಕಾರಣವೆಂದು ದಿ -ಕಾಶ್ಮೀರ್‌ ಫೈಲ್ಸ್‌ ಚಿತ್ರದ ನಿರ್ದೇಶಕ ವಿವೇಕ್‌ ಅಗ್ನಿಹೋತ್ರಿ ಹೇಳಿದ್ದಾರೆ. ಇತ್ತೀಚೆಗಷ್ಟೇ ಸಂದರ್ಶನವೊಂದರಲ್ಲಿ ಮಾತನಾಡಿದ ಅವರು, ನಾನೂ ಕೂಡ ಶಾರುಖ್‌ ಅವರ ಅಭಿಮಾನಿ.

ಅವರ ವರ್ಚಸ್ಸೇ ಬೇರೆ ಎಂದವರಲ್ಲಿ ನಾನೂ ಒಬ್ಬ, ಆದರೆ ಶಾರುಖ್‌ ಅವರ ಸಿನಿ ರಾಜಕೀಯವನ್ನು ಒಪ್ಪಲು ಸಾಧ್ಯವೇ ಇಲ್ಲ. ಬಾಲಿವುಡ್‌ ಎಂದರೆ ಬರೀ ಗ್ಲಾಮರ್‌, ಸ್ಟಾರ್‌ಡಂ, ಹೈಪ್‌, ಪಬ್ಲಿಸಿಟಿ ಎನ್ನುವಂಥಾಗಲು ಅವರೇ ಕಾರಣ ಎಂದು ನೇರವಾಗಿ ಆರೋಪಿಸಿದ್ದಾರೆ. ಅಲ್ಲದೇ, ಶಾರುಖ್‌ ಜನರನ್ನು ಮೂರ್ಖರು ಎನ್ನುವಂತೆ ಭಾವಿಸಿದ್ದಾರೆ. ಆದರೆ ನಾನು ಹಾಗಲ್ಲ. ಅವರ ಸಿನಿಮಾಗಳು ಗೆದ್ದರೆ ಅದು ಅವರದ್ದೇ ಸಿನಿಮಾ, ನನ್ನ ಸಿನಿಮಾಗಳು ಗೆದ್ದರೆ ಅದು ಜನರ ಸಿನಿಮಾ.

ನಾನು ಶಾರುಖ್‌ ಉತ್ತರ ಮತ್ತು ದಕ್ಷಿಣ ಧ್ರುವಗಳಿದ್ದಂತೆ ಎಂದಿದ್ದಾರೆ. ಇನ್ನು ಮುಂದೆ ಎಂದಾದರೂ ಒಟ್ಟಿಗೆ ಕೆಲಸ ಮಾಡುವ ಸಾಧ್ಯತೆ ಇದೆಯಾ ಎಂಬ ಪ್ರಶ್ನೆಗೆ, ನನ್ನ ಸಿನಿಮಾದಲ್ಲಿ ಬರೆಹಗಾರ ಮತ್ತು ನಿರ್ದೇಶಕರೇ ಮುಂಚೂಣಿಯಲ್ಲಿರುತ್ತಾರೆ. ಅದನ್ನು ಅವರು ಒಪ್ಪಿದರೆ ನನಗೆ ಸಮಸ್ಯೆ ಇಲ್ಲ, ಇಲ್ಲದಿದ್ದರೆ ನನ್ನನ್ನು ಮೂಲೆಗುಂಪು ಮಾಡುವ ಯಾರೊಂದಿಗೂ ನಾನು ಕೆಲಸ ಮಾಡಲ್ಲ ಎಂದೂ ಅಗ್ನಿಹೋತ್ರಿ ತಿಳಿಸಿದ್ದಾರೆ.