ಗರಿಗೆದರಿದ ಚಿತ್ರರಂಗ

Team Udayavani, May 25, 2020, 4:15 AM IST

ಬರೋಬ್ಬರಿ ಎರಡು ತಿಂಗಳ ಬಳಿಕ ಚಿತ್ರರಂಗ ಮೆಲ್ಲನೆ ಗರಿಗೆದರಿದೆ. ಚಿತ್ರರಂಗದ ಒಂದಷ್ಟು ಸಿನಿಮಾ ಚಟುವಟಿಕೆಗಳು ಶುರುವಾಗಿವೆ. ಲಾಕ್‌ಡೌನ್‌ ಹಿನ್ನೆಲೆಯಲ್ಲಿ ಚಿತ್ರೀಕರಣ ಸೇರಿದಂತೆ ಹಲವು ಸಿನಿಮಾ ಚಟುವಟಿಕೆಗಳು ಸ್ಥಗಿತಗೊಂಡಿದ್ದವು. ಇದರಿಂದಾಗಿ ಇಡೀ ಚಿತ್ರರಂಗದಲ್ಲಿ ದುಡಿಯುವ ಕಾರ್ಮಿಕರು, ತಂತ್ರಜ್ಞರು, ಕಲಾವಿದರು ಸಂಕಷ್ಟಕ್ಕೆ ಸಿಲುಕಿದ್ದರು. ಯಾವಾಗ ಈ ಲಾಕ್‌ಡೌನ್‌ ಮುಗಿಯುತ್ತೋ ಅಂತ ಕಾದು ಕುಳಿತಿದ್ದರು.

ಆದರೆ, ಈಗ ಕೊಂಚ ಸಡಿಲ ಸಿಕ್ಕಿದ್ದರಿಂದ ಚಿತ್ರರಂಗದ ಕೆಲಸಗಳಾದ ಸಂಕಲನ, ಗ್ರಾಫಿಕ್ಸ್‌, ಹಿನ್ನೆಲೆ ಸಂಗೀತ, ಡಬ್ಬಿಂಗ್‌ ಸೇರಿದಂತೆ ಇತರೆ ಪೋಸ್ಟ್‌ ಪ್ರೊಡಕ್ಷನ್‌ ಕೆಲಸಗಳು ಶುರುವಾಗಿವೆ. ಈ ಹಿನ್ನೆಲೆಯಲ್ಲಿ ದಂಗುಬಡಿದ್ದಿದ್ದ ಚಿತ್ರರಂಗ ತುಸು ಉತ್ಸಾಹಗೊಂಡಿದೆ. ಸಿನಿಮಾರಂಗವನ್ನೇ ನಂಬಿಕೊಂಡು ಬದುಕುತ್ತಿದ್ದ ತಂತ್ರಜ್ಞರು ಸ್ವಲ್ಪ ಮಟ್ಟಿಗೆ ಖುಷಿಗೊಂಡಿದ್ದಾರೆ. ಸಂಕಲನಕಾರರು, ಹಲವು ಚಿತ್ರಗಳಿಗೆ ಕತ್ತರಿ ಪ್ರಯೋಗ ಶುರುಮಾಡಿದರೆ, ಡಬ್ಬಿಂಗ್‌ ಕೆಲಸ ನಿರ್ವಹಿಸುವ ಎಂಜಿನಿಯರ್‌ಗಳಿಗೂ ಕೆಲಸ ಸಿಕ್ಕಿದೆ. ಉಳಿದಂತೆ ಪೋಸ್ಟರ್‌ ಡಿಸೈನ್‌ ಮಾಡುವ, ಗ್ರಾಫಿಕ್ಸ್‌ ಮಾಡುವ ತಂತ್ರಜ್ಞರು ಈಗ ಕೆಲಸದಲ್ಲಿ ನಿರತರಾಗಿದ್ದಾರೆ.

ಡಬ್ಬಿಂಗ್‌ ಕಲಾವಿದರು ಎಂದಿನಂತೆಯೇ ಒಂದಷ್ಟು ಪಾತ್ರಗಳಿಗೆ ವಾಯ್ಸ ಕೊಡುವ ಉತ್ಸಾಹದಲ್ಲಿದ್ದರೆ, ಸಂಗೀತ ನಿರ್ದೇಶಕರೂ ಕೂಡ ತಮ್ಮ ಕೀಬೋರ್ಡ್‌ ಮೇಲೆ ಬೆರಳುಗಳನ್ನಾಡಿಸುತ್ತಿದ್ದಾರೆ. ಇನ್ನು, ಹಲವು ನಿರ್ಮಾಪಕರು ಕೂಡ ಇದುವರೆಗೆ ನಿಲ್ಲಿಸಿದ್ದ ತಮ್ಮ ಸಿನಿಮಾಗಳ ಕೆಲಸಕ್ಕೆ ಚಾಲನೆ ಕೊಟ್ಟಿದ್ದಾರೆ. ಆದಷ್ಟು ಬೇಗ ಪೋಸ್ಟ್‌ ಪ್ರೊಡಕ್ಷನ್ಸ್‌ ಕೆಲಸಗಳನ್ನು ಮುಗಿಸಿಕೊಂಡು ಲಾಕ್‌ಡೌನ್‌ ಬಳಿಕ ಚಿತ್ರಮಂದಿರಗಳಲ್ಲಿ ಚಿತ್ರ ಬಿಡುಗಡೆಗೆ ಅನುಮತಿ ಸಿಕ್ಕರೆ, ಬಿಡುಗಡೆ ಮಾಡಲು ರೆಡಿಯಾಗುತ್ತಿದ್ದಾರೆ.

ಸದ್ಯಕ್ಕೆ ಹಲವು ಸಂಕಷ್ಟಗಳಿಗೆ ಸಿಲುಕಿದ್ದ ಸಿನಿಮಮಂದಿ ಕೂಡ ಈಗ ಒಂದಷ್ಟು ಪೋಸ್ಟ್‌ ಪ್ರೊಡಕ್ಷನ್‌ ಕೆಲಸಗಳಲ್ಲಿ ನಿರತರಾಗುವ ಮೂಲಕ ಬದುಕು ಹಸನು ಮಾಡಿಕೊಳ್ಳುವಲ್ಲಿ ಮುಂದಾಗಿದ್ದಾರೆ. ಈಗಾಗಲೇ ಹಲವು ಸಿನಿಮಾಗಳ ಪೋಸ್ಟ್‌ ಪ್ರೊಡಕ್ಷನ್‌ ಕೆಲಸಗಳು ಶುರುವಾಗಿದ್ದು, ನೂರಾರು ತಂತ್ರಜ್ಞರು ಕೆಲಸದಲ್ಲಿ ಮುಳುಗಿದ್ದಾರೆ. ಈಗಾಗಲೇ ಒಂದಷ್ಟು ಸಿನಿಮಾಗಳು ಬಿಡುಗಡೆಗೂ ಸಜ್ಜಾಗಿವೆ. ಪೂರ್ಣ ಲಾಕ್‌ಡೌನ್‌ ಮುಗಿದ ಬಳಿಕ ಪ್ರೇಕ್ಷಕರ ಮುಂದೆ ಬರಲು ಅಣಿಯಾಗುತ್ತಿವೆ. ಆದರೆ, ಚಿತ್ರಮಂದಿರಗಳಿಗೆ ಜನರು ಬರುತ್ತಾರೋ, ಇಲ್ಲವೋ ಅನ್ನುವುದೇ ಈಗ ಯಕ್ಷಪ್ರಶ್ನೆ.