ಅವಧಿ ಮುಗಿದ ದೇವಸ್ಥಾನಗಳಿಗೆ ಆಡಳಿತ ಸಮಿತಿ ರಚನೆ

Team Udayavani, Jun 11, 2020, 7:24 AM IST

ಉಡುಪಿ: ಕೋವಿಡ್ ಹಾವಳಿಯಿಂದ ಭಕ್ತರಿಗೆ ಬಂದ್‌ ಆಗಿದ್ದ ದೇವಸ್ಥಾನಗಳು ಬಾಗಿಲು ತೆರೆದು ದೇವರ ದರ್ಶನಕ್ಕೆ ಅವಕಾಶ ಕಲ್ಪಿಸಿವೆ. ಇದರ ಬೆನ್ನಲ್ಲೆ ಹಿಂದೂ ಧಾರ್ಮಿಕ ದತ್ತಿ ಇಲಾಖೆಗೆ ಒಳಪಟ್ಟ ಅವಧಿ ಮುಗಿದ ರಾಜ್ಯದ 90 “ಎ’ ದರ್ಜೆ ದೇವಸ್ಥಾನಗಳ ಆಡಳಿತ ಮಂಡಳಿಗಳಿಗೆ 9 ಮಂದಿ ನಾಮನಿರ್ದೇಶನ ಸದಸ್ಯರ ನೇಮಕ ಪ್ರಕ್ರಿಯೆಗೆ ಜೀವ ಸಿಕ್ಕಿದೆ.

ಜುಲೈ ಅಂತ್ಯದೊಳಗೆ ಈ ಎಲ್ಲ ದೇವಸ್ಥಾನಗಳಲ್ಲಿ ಹೊಸ ಆಡಳಿತ ಅಸ್ತಿತ್ವಕ್ಕೆ ಬರುವ ನಿರೀಕ್ಷೆ ಇದೆ.

ರಾಜ್ಯದಲ್ಲಿ 90, ಉಡುಪಿ ಜಿಲ್ಲೆಯಲ್ಲಿ 25 ಮತ್ತು ದ.ಕ. ಜಿಲ್ಲೆಯಲ್ಲಿ 36 “ಎ’ ಗ್ರೇಡ್‌ ದೇವಸ್ಥಾನಗಳಿವೆ. ಅವುಗಳ ಪೈಕಿ ಉಡುಪಿಯಲ್ಲಿ 20 ಮತ್ತು ದ.ಕ. ಜಿಲ್ಲೆಯಲ್ಲಿ 25ರಷ್ಟು ಅವಧಿ ಪೂರ್ಣಗೊಂಡ “ಎ’ ಗ್ರೇಡ್‌ ದೇವಸ್ಥಾನಗಳಲ್ಲಿ ಹೊಸ ಆಡಳಿತ ಸಮಿತಿ ರಚನೆಗೆ ಸಂಬಂಧಿಸಿ ಅರ್ಜಿ ಸ್ವೀಕೃತವಾಗಿದೆ. ಅವಿಭಜಿತ ಜಿಲ್ಲೆಗಳ “ಬಿ’ ಮತ್ತು “ಸಿ’ ವರ್ಗದ ಬಹುತೇಕ ದೇವಸ್ಥಾನಗಳ ಆಡಳಿತ ಅವಧಿ ಈ ಹಿಂದೆಯೇ ಮುಕ್ತಾಯ ಕಂಡಿದ್ದು, ಅರ್ಜಿ ಸ್ವೀಕೃತವಾಗಿ ಪರಿಶೀಲನೆಗೊಂಡು ಅಂತಿಮ ಘೋಷಣೆಗೆ ಬಾಕಿಯಿದೆ.

ಕುಕ್ಕೆ ಸುಬ್ರಹ್ಮಣ್ಯ ಹಾಗೂ ಕೊಲ್ಲೂರು ದೇವಸ್ಥಾನಗಳ ಆಡಳಿತ ಅವಧಿ 2019ರ ಅಕ್ಟೋಬರ್‌ಗೆ ಪೂರ್ಣಗೊಂಡಿದೆ. ಅನಂತರದಲ್ಲಿ ಆಡಳಿತ ಸಮಿತಿ ರಚನೆಗೆ ಬಳಿಕ ಅರ್ಜಿ ಸ್ವೀಕಾರವಾಗಿತ್ತು. ಮೇ 30 ಕೊನೆಯ ದಿನವಾಗಿತ್ತಾದರೂ ಅದು ಜೂ. 12ರ ತನಕ ಈಗ ವಿಸ್ತರಣೆಗೊಂಡಿದೆ. ಪುತ್ತೂರು, ಉಪ್ಪಿನಂಗಡಿ, ಕದ್ರಿ ಮೊದಲಾದ “ಎ’ ಗ್ರೇಡ್‌ ದೇವಸ್ಥಾನಗಳು ಹೊಸ ನಾಮನಿರ್ದೇಶನ ಸದಸ್ಯರ ನೇಮಕಕ್ಕೆ ಕಾಯುತ್ತಿವೆ.

ಮೇಲಿಂದ ಮೇಲೆ ಅಡ್ಡಿ
ಅವಧಿ ಮುಗಿದ ದೇವಸ್ಥಾನಗಳ ನಾಮನಿರ್ದೇಶನ ಸದಸ್ಯರ ಆಯ್ಕೆ ಸಂಬಂಧ ಹಿಂದೆಯೇ ಪ್ರಕ್ರಿಯೆ ಆರಂಭಗೊಂಡಿದ್ದರೂ ರಾಜ್ಯದಲ್ಲಿ ನಡೆದ ಉಪಚುನಾವಣೆ ಆರಂಭದಲ್ಲಿ ಅಡ್ಡಿಯಾಗಿತ್ತು. ಬಳಿಕ ಸರಕಾರ ಸುಭದ್ರಗೊಂಡಿತ್ತು. ಅನಂತರದಲ್ಲಿ ಶೀಘ್ರ ನೇಮಕಾತಿ ಹೊರ ಬೀಳುತ್ತದೆ ಎನ್ನುವಾಗ ಕೋವಿಡ್‌-19 ಸೋಂಕು ವ್ಯಾಪಿಸಿ ಲಾಕ್‌ಡೌನ್‌ನಿಂದ ದೇವಸ್ಥಾನಗಳೇ ಬಂದ್‌ ಆದವು.

ವ್ಯವಸ್ಥಾಪನಾ ಸಮಿತಿ ಯಾಕೆ ಅಗತ್ಯ?
ಸುದೀರ್ಘ‌ ಅವಧಿಯಿಂದ‌ ದೇವಸ್ಥಾನಗಳ ಆಡಳಿತದ ಅಧಿಕಾರದ ಹೊಣೆಯನ್ನು ವಿವಿಧ ವರ್ಗದ ಅಧಿಕಾರಿಗಳು ವಹಿಸಿಕೊಂಡಿದ್ದಾರೆ. ಮೂಲ ಇಲಾಖೆಯ ಜವಾಬ್ದಾರಿ ಜತೆಗೆ ದೇವಸ್ಥಾನಕ್ಕೆ ಸಂಬಂಧಿಸಿದ ಹೆಚ್ಚುವರಿ ಜವಾಬ್ದಾರಿ ಅವರ ಹೆಗಲ ಮೇಲಿದೆ. ಎರಡನ್ನೂ ಏಕಕಾಲದಲ್ಲಿ ನಿಭಾಯಿಸುವುದು ಅವರಿಗೆ ಕಷ್ಟವಾಗುತ್ತಿದೆ. ಇದರಿಂದ ದೇವಸ್ಥಾನಗಳು ವ್ಯಾಪ್ತಿಯಲ್ಲಿ ಅಭಿವೃದ್ಧಿಗೆ ಹಿನ್ನಡೆಯಾಗುತ್ತಿದೆ. ಆದ್ದರಿಂದ ಅವಧಿ ಮುಗಿದ ದೇವಸ್ಥಾನಗಳಿಗೆ ಶೀಘ್ರವೇ ಆಡಳಿತ ಮಂಡಳಿ ನೇಮಿಸುವಂತೆ ಭಕ್ತರು ಆಗ್ರಹಿಸಿದ್ದಾರೆ.

ದೇವಸ್ಥಾನದ ಧಾರ್ಮಿಕ ವಿಚಾರಗಳ ಬಗ್ಗೆ ಅಲ್ಲಿನ ಅರ್ಚಕರು, ಆಗಮ ಪಂಡಿತರು ನೋಡಿಕೊಳ್ಳುತ್ತಾರೆ. ಭಕ್ತರ ವ್ಯವಸ್ಥೆಗಳ ಬಗ್ಗೆ ಅಧಿಕಾರಿಗಳು, ಸಿಬಂದಿಗೆ ಮಾರ್ಗಸೂಚಿಗಳನ್ನು ನೀಡಿದ್ದೇವೆ. ಅವಧಿ ಮುಗಿದ ದೇವಸ್ಥಾನಗಳ ಆಡಳಿತ ಸಮಿತಿ ರಚನೆಯನ್ನು ಜುಲೈ ಅಂತ್ಯಕ್ಕೆ ಪೂರ್ತಿಗೊಳಿಸುತ್ತೇವೆ.
– ಕೋಟ ಶ್ರೀನಿವಾಸ ಪೂಜಾರಿ, ಮುಜರಾಯಿ ಇಲಾಖೆ ಸಚಿವ

ಎಲ್ಲ ದೇವಸ್ಥಾನಗಳಿಗೂ ನೇಮಕ ಅಗತ್ಯ
“ಎ’ ಗ್ರೇಡ್‌ ದೇವಸ್ಥಾನಗಳಷ್ಟೇ ಅಲ್ಲ. ಅವಧಿ ಮುಗಿದ ಎಲ್ಲ ಇತರ ವರ್ಗದ ದೇವಸ್ಥಾನಗಳಿಗೂ ನಾಮನಿರ್ದೇಶಕರ ಆಯ್ಕೆ ನಡೆಯಬೇಕಿದೆ. ಪ್ರಸ್ತುತ ವ್ಯವಸ್ಥಾಪನ ಸಮಿತಿಯ ಅಗತ್ಯ ಖಂಡಿತ ಇದೆ.
– ಸೂರ್ಯ ಭಟ್‌ ಕಶೆಕೋಡಿ, ರಾಜ್ಯ ಧಾರ್ಮಿಕ ಪರಿಷತ್‌ ಸದಸ್ಯರು