ಸರಕಾರಕ್ಕೆ GST ಸಂಗ್ರಹವೇ ಸವಾಲು-  ಇದುವರೆಗೆ ಸಂಗ್ರಹಿಸಿದ್ದು ಕೇವಲ 68 ಸಾವಿರ ಕೋ.ರೂ.

Team Udayavani, Jan 21, 2024, 12:48 AM IST

ಬೆಂಗಳೂರು: ರಾಜ್ಯದ ಜಿಎಸ್‌ಟಿ ಸಂಗ್ರಹದಲ್ಲಿ ಹಿನ್ನಡೆ ಉಂಟಾಗಿದ್ದು, ಈ ಸಾಲಿನ ಗುರಿ ಮುಟ್ಟುವ ಸವಾಲು ಸರಕಾರದ ಮುಂದಿದೆ. ಪ್ರಸಕ್ತ ಹಣಕಾಸು ವರ್ಷದಲ್ಲಿ ಸುಮಾರು 6 ರಿಂದ 8 ಸಾವಿರ ಕೋಟಿ ರೂ. ತೆರಿಗೆ ಸಂಗ್ರಹ ಖೋತಾ ಆಗುವ ಸಾಧ್ಯತೆ ಇದೆ ಎನ್ನಲಾಗಿದೆ.

ಪ್ರಸಕ್ತ ವಿತ್ತೀಯ ವರ್ಷದಲ್ಲಿ ರಾಜ್ಯ ದಲ್ಲಿ ಜಿಎಸ್‌ಟಿ ಗುರಿ ಇರುವುದು 1.01 ಲಕ್ಷ ಕೋಟಿ ರೂ. ಆದರೆ ಜ. 10ರ ವರೆಗೆ ಸಂಗ್ರಹವಾಗಿರುವುದು 68 ಸಾವಿರ ಕೋಟಿ ರೂ. ಮುಂದಿನ 3 ತಿಂಗಳಲ್ಲಿ 31 ಸಾವಿರ ಕೋ.ರೂ. ಸಂಗ್ರಹಿಸುವ ಸವಾಲು ವಾಣಿಜ್ಯ ತೆರಿಗೆ ಇಲಾಖೆ ಮುಂದಿದೆ. ಸುಮಾರು 6ರಿಂದ 8 ಸಾವಿರ ಕೋಟಿ ರೂ. ಖೋತಾ ಆಗುವ ಸಾಧ್ಯತೆ ಇದೆ ಎನ್ನಲಾಗಿದೆ.

2023-24ನೇ ಸಾಲಿನಲ್ಲಿ ಮೂಲ ಜಿಎಸ್‌ಟಿ ಗುರಿ ಇದ್ದದ್ದು 92 ಸಾವಿರ ಕೋಟಿ ರೂ. ಕಾಂಗ್ರೆಸ್‌ ಅಧಿಕಾರಕ್ಕೆ ಬಂದ ಅನಂತರ ಈ ಗುರಿಯನ್ನು ಪರಿಷ್ಕರಿಸಿ, 1.01 ಲಕ್ಷ ಕೋ.ರೂ.ಗೆ ಹೆಚ್ಚಿಸಿತ್ತು. ಈ ಹೆಚ್ಚುವರಿ ಸಂಪನ್ಮೂಲ ವಿವಿಧ ಗ್ಯಾರಂಟಿ ಯೋಜನೆಗಳಿಂದ ಪರೋಕ್ಷವಾಗಿ ಬರಲಿದೆ ಎಂದು ಅಂದಾಜಿಸಿತ್ತು.

ಸರಕಾರದ ಲೆಕ್ಕಾಚಾರದ ಪ್ರಕಾರ ಯೋಜನೆ
ಗಳಿಂದ ಜನರ ಕೈಗೆ ಹಣ ಸೇರುತ್ತಿರುವುದು ನಿಜ. ಆದರೆ ಅದರ ಹರಿವು ನಿರೀಕ್ಷಿತ ಮಟ್ಟದಲ್ಲಿ ಆಗುತ್ತಿಲ್ಲ. ಮೂಲತಃ ನಮ್ಮದು ಉಳಿತಾಯ ಸಂಸ್ಕೃತಿ. ಹೀಗಾಗಿ ಜನರು ಹಣ ಕೂಡಿಡುತ್ತಾರೆ. ಗುರಿ ಸಾಧನೆ ಕಷ್ಟವಾಗುತ್ತಿದೆ ಎಂದು ವಾಣಿಜ್ಯ ಇಲಾಖೆ ಅಧಿಕಾರಿಯೊಬ್ಬರು “ಉದಯವಾಣಿ’ಗೆ ತಿಳಿಸಿದರು.