Mangaluru ಮಗು ಅದಲು ಬದಲು ಆರೋಪ; ಸಿಒಡಿ ತನಿಖೆಗೆ ಪೋಷಕರ ಆಗ್ರಹ

Team Udayavani, Aug 23, 2024, 12:42 AM IST

ಮಂಗಳೂರು: ನನ್ನ ಪತ್ನಿಗೆ ಲೇಡಿಗೋಷನ್‌ ಆಸ್ಪತ್ರೆಯಲ್ಲಿ ಹೆರಿಗೆಯಾಗಿ ಮೂರು ದಿನ ಕಳೆದ ಬಳಿಕ ಮಗುವಿಗೆ ಕಣ್ಣಿಲ್ಲ ಎಂದು ವೈದ್ಯರು ಹೇಳಿದ್ದು, ನಮಗೆ ಆಘಾತವಾಗಿದೆ. ಈ ಬಗ್ಗೆ ವೈದ್ಯರು, ಮೇಲಧಿಕಾರಿಗಳು ಸೂಕ್ತ ಕಾರಣ ನೀಡದೆ ನುಣುಚಿಕೊಳ್ಳುತ್ತಿದ್ದು, ಇದರಿಂದ ನಮ್ಮ ಮಗು ಅದಲು ಬದಲಾಗಿದೆ ಸಹಿತ ಹಲವು ಸಂಶಯಗಳು ಮೂಡಿವೆ. ಈ ಪ್ರಕರಣವನ್ನು ಸಿಒಡಿ ತನಿಖೆಗೆ ಒಳಪಡಿ ನಮಗೆ ನ್ಯಾಯ ದೊರಕಿಸಿಕೊಡಬೇಕು ಎಂದು ನಾಗರಾಜ್‌ ಅವರು ಹೇಳಿದ್ದಾರೆ.

ಗುರುವಾರ ಪತ್ರಿಕಾಗೋಷ್ಠಿಯಲ್ಲಿ ಮಾತನಾಡಿದ ನಾಗರಾಜ್‌, ಲೇಡಿ ಗೋಷನ್‌ ಆಸ್ಪತ್ರೆ ವೈದ್ಯರಲ್ಲಿ ವೈದ್ಯ ಕೀಯ ವರದಿ ಕೇಳಿದಾಗ ಕೊಡುತ್ತಿಲ್ಲ. ನಮ್ಮ ಜೀವಕ್ಕೆ ತೊಂದರೆ ಆಗುವ ಭಯ ಕಾಡುತ್ತಿದ್ದು, ಸೂಕ್ತ ರಕ್ಷಣೆ ನೀಡಬೇಕು ಎಂದು ಆಗ್ರಹಿಸಿದ್ದಾರೆ.

ತುಳುನಾಡ ರಕ್ಷಣ ವೇದಿಕೆ ಅಧ್ಯಕ್ಷ ಯೋಗೀಶ್‌ ಶೆಟ್ಟಿ ಜಪ್ಪು ಮಾತನಾಡಿ, ಈ ಪ್ರಕರಣದ ಕುರಿತಂತೆ ಪೊಲೀಸ್‌ ಠಾಣೆಯಲ್ಲಿ ಎಫ್ಐಆರ್‌ ದಾಖ ಲಾಗಿದೆ. ಸ್ಪೀಕರ್‌ ಯು.ಟಿ. ಖಾದರ್‌ ಜತೆ ಮಾತುಕತೆ ನಡೆಸಲಾಗಿದ್ದು, ಉನ್ನತ ಮಟ್ಟದ ತನಿಖೆ ಭರವಸೆ ನೀಡಿದ್ದಾರೆ. ಪ್ರಕರಣವನ್ನು ಸಿಒಡಿ ತನಿಖೆಗೆ ಒಪ್ಪಿಸಬೇಕು. ವಿಳಂಬ ವಾದರೆ ತುಳುನಾಡ ರಕ್ಷಣ ವೇದಿಕೆ ನೇತೃತ್ವದಲ್ಲಿ ಧರಣಿ ನಡೆಸುವುದಾಗಿ ತಿಳಿಸಿದರು. ಮಗುವಿನ ತಾಯಿಯ ಗೆಳತಿ ನಿಶ್ಮಿತಾ, ಮಗುವಿನ ಮಾವ ಸಂತೋಷ್‌, ತುಳುನಾಡ ರಕ್ಷಣ ವೇದಿಕೆಯ ಪದಾಧಿಕಾರಿಗಳು ಉಪಸ್ಥಿತರಿದ್ದರು.