Pope: ಬುದ್ಧಿವಂತನಿಗೆ ಕೊಡುವುದಲ್ಲೇ ಸಂತೋಷ-ಗೌತಮ ಬುದ್ಧನ ಹೇಳಿಕೆ ಉಲ್ಲೇಖೀಸಿದ ಪೋಪ್‌

Team Udayavani, Sep 3, 2023, 9:21 PM IST

ಉಲಾನ್‌ಬಾಟರ್‌: “ಬುದ್ಧಿವಂತ ವ್ಯಕ್ತಿ ಕೊಡುವುದರಲ್ಲಿ ಸಂತೋಷಪಡುತ್ತಾನೆ’ ಎಂಬ ಗೌತಮ ಬುದ್ಧನ ಹೇಳಿಕೆಯನ್ನು ಪೋಪ್‌ ಫ್ರಾನ್ಸಿಸ್‌ ತಮ್ಮ ಭಾಷಣದಲ್ಲಿ ಉಲ್ಲೇಖೀಸಿದ್ದಾರೆ. ಮಂಗೋಲಿಯಾ ರಾಜಧಾನಿ ಉಲಾನ್‌ಬಾಟರ್‌ನಲ್ಲಿ ಭಾನುವಾರ ಆಯೋಜಿಸಿದ್ದ ವಿವಿಧ ಧರ್ಮಗಳ ಮುಖಂಡರ ಸಮ್ಮೇಳನ ಉದ್ದೇಶಿಸಿ ಮಾತನಾಡಿದ ಅವರು, “ಎಲ್ಲಾ ಧರ್ಮಗಳು ಸೌಹಾರ್ದತೆಯಿಂದ ಇರುವುದನ್ನು ಬೋಧಿಸುತ್ತವೆ. ಜತೆಗೆ ಮೂಲಭೂತವಾದ, ಹಿಂಸೆಯನ್ನು ಬಿಡಲು ದಾರಿ ತೋರಿಸುತ್ತವೆ’ ಎಂದು ಹೇಳಿದ್ದಾರೆ.

“ತಾಂತ್ರಿಕ ಪ್ರಗತಿ ಮಾತ್ರವೇ ಮಾನವನ ಅಭ್ಯುದ್ಯಯಕ್ಕೆ ಕಾರಣವಾಗಲಾರದು. ಜಗತ್ತಿನಲ್ಲಿ ಮಾನವರು ಸೌಹಾರ್ದತೆಯಿಂದ ಬದುಕಬೇಕಿದೆ. ಮಾನವೀಯತೆಯನ್ನು ಎತ್ತಿಹಿಡಿಯುವುದೇ ಎಲ್ಲಾ ಧರ್ಮಗಳ ಪ್ರಮುಖ ಅಂಶವಾಗಿದೆ’ ಎಂದಿದ್ದಾರೆ.

“ಪಡೆಯುವುದಕ್ಕಿಂತ ನೀಡುವುದರಲ್ಲಿ ಹೆಚ್ಚಿನ ಸಂತೋಷ ಸಿಗುತ್ತದೆ’ ಎಂಬ ಏಸು ಕ್ರಿಸ್ತನ ಮಾತಿನಿಂತೆ ನಾವು ಜಗತ್ತಿನಿಂದ ಪಡೆಯುವುದಕ್ಕಿಂತ ಹೆಚ್ಚಾಗಿ ಜಗತ್ತಿಗೆ ನೀಡಬೇಕಿದೆ’ ಎಂದು ಪೋಪ್‌ ಫ್ರಾನ್ಸಿಸ್‌ ಹೇಳಿದ್ದಾರೆ.