ಕೋವಿಡ್ : ಗುಣಮುಖ ಪ್ರಮಾಣ ಮೂರು ಪಟ್ಟು ಅಧಿಕ

Team Udayavani, Aug 25, 2020, 1:11 AM IST

ಸಾಂದರ್ಭಿಕ ಚಿತ್ರ

ಹೊಸದಿಲ್ಲಿ: ದೇಶದಲ್ಲಿ ಕೋವಿಡ್ ಸೋಂಕಿನಿಂದ ಗುಣಮುಖರಾದವರ ಸಂಖ್ಯೆ ಸೋಮವಾರ 23 ಲಕ್ಷದ ಗಡಿ ದಾಟಿದೆ. ಜತೆಗೆ, ಸಕ್ರಿಯ ಸೋಂಕಿತರ ಸಂಖ್ಯೆಗಿಂತ ಗುಣಮುಖರಾದವರ ಸಂಖ್ಯೆ 3 ಪಟ್ಟು ಹೆಚ್ಚಾಗಿದೆ ಎಂಬ ಸಮಾಧಾನದ ಸುದ್ದಿಯನ್ನು ಕೇಂದ್ರ ಆರೋಗ್ಯ ಸಚಿವಾಲಯ ನೀಡಿದೆ.

ರವಿವಾರದಿಂದ ಸೋಮವಾರಕ್ಕೆ 24 ಗಂಟೆಗಳ ಅವಧಿಯಲ್ಲಿ 57,469 ಮಂದಿ ಸಂಪೂರ್ಣ ಗುಣಮುಖರಾಗಿ ಮನೆಗೆ ಮರಳಿ ದ್ದಾರೆ. ಈ ಮೂಲಕ ಗುಣಮುಖ ಪ್ರಮಾಣ ಶೇ.75.27ಕ್ಕೇರಿದೆ. ಈವರೆಗೆ ವಾಸಿಯಾದವರ ಸಂಖ್ಯೆ 23.38 ಲಕ್ಷದ ಆಸುಪಾಸಿನಲ್ಲಿದ್ದರೆ, ಸಕ್ರಿಯ ಸೋಂಕಿತರ ಸಂಖ್ಯೆ 7.10 ಲಕ್ಷದ ಆಸುಪಾಸಿನಲ್ಲಿದೆ. ಅಲ್ಲದೆ, ದೇಶದಲ್ಲಿ ಕೊರೊನಾ ದಿಂದ ಮೃತಪಟ್ಟವರ ಪ್ರಮಾಣ ಶೇ.1.85ಕ್ಕಿಳಿದಿದೆ ಎಂದು ಸಚಿವಾಲಯದ ಅಧಿಕಾರಿಗಳು ಮಾಹಿತಿ ನೀಡಿದ್ದಾರೆ.

ಪರೀಕ್ಷಾ ಪ್ರಮಾಣ ಹೆಚ್ಚಳ, ಸೋಂಕಿತರ ಸಮಗ್ರ ಟ್ರ್ಯಾಕಿಂಗ್‌ ಮತ್ತು ಸೂಕ್ತ ಚಿಕಿತ್ಸೆ ಮುಂತಾದ ಕ್ರಮಗಳಿಂದಾಗಿ ಇದು ಸಾಧ್ಯವಾ ಯಿತು ಎಂದಿದ್ದಾರೆ ಅಧಿಕಾರಿಗಳು.

ಈವರೆಗೆ 3.6 ಕೋಟಿ ಪರೀಕ್ಷೆ:
ರವಿವಾರ ಒಂದೇ ದಿನ 6.09 ಲಕ್ಷ ಸ್ಯಾಂಪಲ್‌ಗ‌ಳ ಪರೀಕ್ಷೆ ನಡೆದಿದ್ದು, ಈವರೆಗೆ ದೇಶಾದ್ಯಂತ 3.59 ಕೋಟಿ ಸ್ಯಾಂಪಲ್‌ಗ‌ಳ ಪರೀಕ್ಷೆ ಪೂರ್ಣಗೊಂಡಿದೆ ಎಂದು ಭಾರತೀಯ ವೈದ್ಯಕೀಯ ಸಂಶೋಧನಾ ಮಂಡಳಿ ತಿಳಿಸಿದೆ. ಈ ಮೂಲಕ ಪ್ರತಿ 10 ಲಕ್ಷ ಜನಸಂಖ್ಯೆಗೆ ಪರೀಕ್ಷಾ ಪ್ರಮಾಣ 26,016ಕ್ಕೆ ಏರಿದಂತಾಗಿದೆ.

ಒಂದೇ ದಿನ 61,408 ಮಂದಿಗೆ ಸೋಂಕು
ರವಿವಾರ ಬೆಳಗ್ಗೆ 8ರಿಂದ ಸೋಮವಾರ ಬೆಳಗ್ಗೆ 8ರವರೆಗೆ ದೇಶದಲ್ಲಿ 61,408 ಮಂದಿಗೆ ಸೋಂಕು ದೃಢಪಟ್ಟಿದೆ. ಈ ಅವಧಿಯಲ್ಲಿ 836 ಸೋಂಕಿತರು ಮೃತಪಟ್ಟಿದ್ದಾರೆ ಎಂದೂ ಆರೋಗ್ಯ ಇಲಾಖೆ ಅಧಿಕಾರಿಗಳು ತಿಳಿಸಿದ್ದಾರೆ. ಮೃತ 836 ಮಂದಿಯ ಪೈಕಿ ಅತಿ ಹೆಚ್ಚು ಅಂದರೆ 258 ಮಂದಿ ಮಹಾರಾಷ್ಟ್ರದ ವರಾದರೆ, 97 ಮಂದಿ ತಮಿಳುನಾಡು,
93 ಆಂಧ್ರ, 68 ಮಂದಿ ಕರ್ನಾಟಕದವರು ಎಂದೂ ಅವರು ಹೇಳಿದ್ದಾರೆ.