ತೆಕ್ಕಟ್ಟೆ ಆಟಿ  ಅಮಾವಾಸ್ಯೆ ಸಂಭ್ರಮ : ಕೊಮೆ-ಕೊರವಡಿಯಲ್ಲಿ ಸಮುದ್ರ ಸ್ನಾನ

Team Udayavani, Jul 20, 2020, 4:27 PM IST

ತೆಕ್ಕಟ್ಟೆ : ಪ್ರತಿ ವರ್ಷ ಆಷಾಢ ಮಾಸದ ಆಟಿ ಅಮಾವಾಸ್ಯೆಯಂದು ನಂಬಿಕೆಯಂತೆ ಕೊಮೆ, ಕೊರವಡಿ ಕಡಲಿನಲ್ಲಿ ಜು.20 ರಂದು ಮುಂಜಾನೆಯಿಂದಲೇ ಜನ ಸಮುದ್ರ ಸ್ನಾನಕ್ಕಾಗಿ ಬಹು ಉತ್ಸಾಹದಿಂದ ಪಾಲ್ಗೊಂಡಿರುವ ದೃಶ್ಯ ಕಂಡು ಬಂತು.

ಕಡಲಿಗೆ ಹಿಡಿ ಮರಳು ಸಮರ್ಪಣೆ : ಸಮುದ್ರ ಸ್ನಾನಕ್ಕೆ ಕಡಲ ತೀರದೆಡೆಗೆ ಆಗಮಿಸುತ್ತಿದ್ದ ಸ್ಥಳೀಯರು ಬರಿಗೈಯಲ್ಲಿ ಬಂದು ಸಮುದ್ರ ಸ್ನಾನಕ್ಕೆ ಇಳಿಯ ಬಾರದು ಎಂಬ ನಂಬಿಕೆ ಇದ್ದು ಅದಕ್ಕೆ ಪೂರಕವಾಗಿ ಸಮುದ್ರ ತೀರದಲ್ಲಿರುವ ಮರಳು ಅಥವಾ ಒಂದು ಗುಲಗುಂಜಿಯನಾದರೂ ಕೈಯಲ್ಲಿ ಹಿಡಿದು ಸಮುದ್ರಕ್ಕೆ ಸಮರ್ಪಿಸಿ ತಮ್ಮ ಗ್ರಹಚಾರ ಪೀಡೆಯನ್ನು ಪರಿಹರಿಸಿಕೊಳ್ಳಬೇಕು ಎನ್ನುವ ನಂಬಿಕೆ ಇದೆ. ಈ ಹಿನ್ನೆಲೆಯಲ್ಲಿ ಸ್ನಾನಕ್ಕೆ ತೆರಳುವ ಮುನ್ನ ನೆರೆದವರು ಕೈನಲ್ಲಿ ಒಂದು ಹಿಡಿ ಮರಳು ಹಿಡಿದುಕೊಂಡು ಸಮುದ್ರದ ನೀರಿಗೆ ಅರ್ಪಿಸುತ್ತಿದ್ದ ದೃಶ್ಯ ಸಾಮಾನ್ಯವಾಗಿ ಕಂಡು ಬಂತು.

ಹೆಚ್ಚಿದ ಕಡಲ ಅಲೆಗಳ ಅಬ್ಬರ : ಆಷಾಢ ಮಾಸದ ಆಟಿ ಅಮಾವಾಸ್ಯೆಯ ದಿನದಂದು ಕಡಲ ಅಬ್ಬರ ಹೆಚ್ಚಾಗಿದ್ದು ಕೊರೊನಾ ಆತಂಕದ ನಡುವೆಯೂ ಕೂಡಾ ಪರಿಸರದ ಮಂದಿ ಅತ್ಯಂತ ಉತ್ಸಾಹದಿಂದ ಪಾಲ್ಗೊಂಡರು.

ಯುವಕರಲ್ಲಿ ಹೆಚ್ಚಿದ ಸೆಲ್ಫಿ ಕ್ರೇಜ್‌ : ಸಮುದ್ರ ಸ್ನಾನಕ್ಕೆ ತೆರಳಿದ ಕೆಲವೊಂದು ಯುವಕರ ತಂಡ ಅಲೆಗಳ ಅಬ್ಬರದ ನಡುವೆ ನಿಂತು ಸೆಲ್ಫಿ ತೆಗೆದುಕೊಳ್ಳುತ್ತಿರುವ ದೃಶ್ಯ ಸಾಮಾನ್ಯವಾಗಿ ಕಂಡು ಬಂತು .

ಮೀನುಗಾರಿಕೆ : ಅಮಾವಾಸ್ಯೆಯ ಹಿನ್ನೆಲೆಯಲ್ಲಿ ಸ್ಥಳೀಯ ಮೀನುಗಾರರು ಬಲೆ ಬೀಸಿ ಮೀನುಗಾರಿಕೆ ನಡೆಸುತ್ತಿರುವ ದೃಶ್ಯ ಕಂಡು ಬಂತು.

ಚಿತ್ರ : ಟಿ. ಲೋಕೇಶ್ . ಆಚಾರ್ಯ ತೆಕ್ಕಟ್ಟೆ