ಟ್ರ್ಯಾಕ್ಟರ್‌ ಹಗ್ಗ ಜಗ್ಗಾಟಕ್ಕೆ ನೆಟ್ಟಿಗರ ಆಕ್ರೋಶ

Team Udayavani, Jul 1, 2022, 4:32 PM IST

ಅಡಹಳ್ಳಿ/ಅಥಣಿ: ಸಮೀಪದ ಚಮಕೇರಿ ಗ್ರಾಮದಲ್ಲಿ ಎರಡು ಟ್ರ್ಯಾಕ್ಟರ್‌ ನಡುವೆ ಹಗ್ಗ-ಜಗ್ಗಾಟ ಸ್ಪರ್ಧೆ ಆಯೋಜನೆ ಮಾಡಲಾಗಿರುವ ವಿಡಿಯೊ ಸಾಮಾಜಿಕ ಜಾಲತಾಣದಲ್ಲಿ ವೈರಲ್‌ ಆಗಿದ್ದು, ಅಪಾಯಕಾರಿ ಸ್ಪರ್ಧೆ ಜನರ ಆಕ್ರೋಶಕ್ಕೆ ಕಾರಣವಾಗಿದೆ.

ಚಮಕೇರಿ ಗ್ರಾಮದ ಬೀರಲಿಂಗೇಶ್ವರ ದೇವರ ಜಾತ್ರೆ ನಿಮಿತ್ತ ಟ್ರ್ಯಾಕ್ಟರ್‌ ಹಗ್ಗ-ಜಗ್ಗಾಟ ಸ್ಪರ್ಧೆ ಮಾಡಲಾಗಿತ್ತು. ಚಮಕೇರಿ ಮತ್ತು ಅಥಣಿ ರಸ್ತೆಯ ಮೇಲೆ ನಡೆದ ಟ್ರ್ಯಾಕ್ಟರ್‌ ಹಗ್ಗ-ಜಗ್ಗಾಟ ಸ್ಪರ್ಧೆಯಲ್ಲಿ ಒಂದು ಟ್ರಾ ಟ್ರ್ಯಾಕ್ಟರ್‌ ಮುಗುಚಿದ್ದು, ಜನರು ಕೂದಲೆಳೆಯಷ್ಟರಲ್ಲಿ ಅಪಾಯದಿಂದ ಪಾರಾಗಿದ್ದಾರೆ.

ಅಪಾಯಕಾರಿ ಸ್ಪರ್ಧೆಯನ್ನು ಯಾವುದೇ ಮುನ್ನೆಚ್ಚರಿಕೆ ಕ್ರಮ ವಹಿಸದೇ ಆಯೋಜನೆ ಮಾಡಿದ್ದು, ಆಟ ಹಾಗೂ ಆಯೋಜಕರ ನಿರ್ಲಕ್ಷ್ಯ ಕುರಿತು ನೆಟ್ಟಿಗರಿಂದ ಆಕ್ರೋಶ ವ್ಯಕ್ತವಾಗುತ್ತಿದೆ. ಸಾಮಾಜಿಕ ಜಾಲತಾಣದಲ್ಲಿ ವಿಡಿಯೊ ವೈರಲ್‌ ಆಗುತ್ತಿದ್ದಂತೆ ಜಿಲ್ಲಾ ಪೊಲೀಸ್‌ ವರಿಷ್ಠಾಧಿಕಾರಿ ಮಾಹಿತಿ ಕೇಳಿದ್ದು, ಚಮಕೇರಿ ಗ್ರಾಮಕ್ಕೆ ಸಿಪಿಐ ಶಂಕರಗೌಡ ಧಾವಿಸಿ ಗ್ರಾಮದಲ್ಲಾದ ಘಟನೆ ಕುರಿತು ಪರಿಶೀಲನೆ ನಡೆಸಿದರು. ವಿಡಿಯೊ ಆಧಾರದ ಮೇಲೆ ಐಗಳಿ ಪೊಲೀಸ್‌ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.