ಭಾರತವನ್ನು ಅವರದೇ ನೆಲದಲ್ಲಿ ಮಣಿಸುವ ಗುರಿ: ಲ್ಯಾಂಗರ್‌

Team Udayavani, May 2, 2020, 6:38 AM IST

ಮೆಲ್ಬರ್ನ್: ಮರಳಿ ಟೆಸ್ಟ್‌ ರ್‍ಯಾಂಕಿಂಗ್‌ನಲ್ಲಿ ಅಗ್ರಸ್ಥಾನ ಅಲಂಕರಿಸಿದ ಖುಷಿಯಲ್ಲಿರುವ ಆಸ್ಟ್ರೇಲಿಯದ ಮುಂದಿನ ಗುರಿ ಏನು ಗೊತ್ತೇ? ಭಾರತದಲ್ಲೇ ಭಾರತಕ್ಕೆ ಟೆಸ್ಟ್‌ ಸರಣಿ ಸೋಲುಣಿಸುವುದು. ಹೀಗೆಂದು ಹೇಳಿದವರು ಕಾಂಗರೂ ಕೋಚ್‌ ಜಸ್ಟಿನ್‌ ಲ್ಯಾಂಗರ್‌.

“ಈ ರ್‍ಯಾಂಕಿಂಗ್‌ ವಿಧಾನವೇ ಸರಿ ಇಲ್ಲ ಎಂಬುದು ನಮ್ಮ ತೀರ್ಮಾನವಾಗಿತ್ತು. ಆದರೆ ಈ ಬಾರಿ ನಮ್ಮ ಮುಖದಲ್ಲಿ ಮಂದಹಾಸ ಬೀರಿದೆ. ನಾನಾ ಸಂಕಟಗಳನ್ನು ನಿಭಾಯಿಸಿ ಮರಳಿ ಸಶಕ್ತ ತಂಡವನ್ನು ಕಟ್ಟಲು ನಾವು ಕಠಿನ ಶ್ರಮ ಪಟ್ಟಿದ್ದೆವು. ಈಗ ನಂಬರ್‌ ವನ್‌ ಗೌರವ ಲಭಿಸಿದೆ. ಆದರೆ ಭಾರತವನ್ನು ಅವರದೇ ನೆಲದಲ್ಲಿ ಸೋಲಿಸುವುದು ನಮ್ಮ ಗುರಿಯಾಗಿದೆ’ ಎಂದು ಲ್ಯಾಂಗರ್‌ ಹೇಳಿದರು.

“ನಾವು ಬಹಳಷ್ಟು ವಿಶ್ವಕಪ್‌ ಗಳನ್ನು ಗೆದ್ದಿದ್ದೇವೆ. ಮುಂದೊಂದು ದಿನ ಆರನ್‌ ಫಿಂಚ್‌ ಮತ್ತವರ ಪಡೆ ಟಿ20 ವಿಶ್ವಕಪ್‌ ಗೆಲ್ಲುವುದನ್ನು ನಾನು ನೋಡಬೇಕಿದೆ’ ಎಂದೂ ಲ್ಯಾಂಗರ್‌ ತಮ್ಮ ಅಭಿಲಾಷೆ ವ್ಯಕ್ತಪಡಿಸಿದರು.