Uppunda ವಿದ್ಯುತ್ ಶಾಕ್ ಹೊಡೆದು ವ್ಯಕ್ತಿ ಸಾವು

Team Udayavani, Jul 27, 2024, 1:19 AM IST

ಉಪ್ಪುಂದ: ವಿದ್ಯುತ್‌ ಶಾಕ್‌ ಹೊಡೆದು ಸ್ಥಳದಲ್ಲೇ ವ್ಯಕ್ತಿ ಮೃತಪಟ್ಟ ಘಟನೆ ಜು. 26ರಂದು ನಾವುಂದದಲ್ಲಿ ಸಂಭವಿಸಿದೆ.
ಗಂಗೊಳ್ಳಿ ನಾಯಕವಾಡಿ ನಿವಾಸಿ ಸಂದೀಪ್‌ (40) ಮೃತರು.

ಅವಿವಾಹಿತರಾಗಿರುವ ಅವರು ವಾಹನಗಳ ಚೇಸಿಗೆ ಪೈಂಟಿಂಗ್‌ ಮಾಡುವ ಕೆಲಸ ಮಾಡಿಕೊಂಡಿದ್ದರು. ವರ್ಷಕ್ಕೆ ಒಂದೆರಡು ತಿಂಗಳು ನಾವುಂದಕ್ಕೆ ಬಂದು ವಾಹನಗಳ ಚೇಸಿಗೆ ಪೈಂಟಿಂಗ್‌ ಮಾಡುವ ಕೆಲಸ ಮಾಡುತ್ತಾರೆ. ಅವರು ಜು. 25ರಂದು ಕೆಲಸಕ್ಕೆ ಬಂದಿದ್ದರು.

ಕೆಲಸ ಪ್ರಾರಂಭ ಮಾಡುವ ಹೊತ್ತಿಗೆ ಪೈಂಟಿಂಗ್‌ ಮಾಡೋ ಕಂಪ್ರಷರ್‌ ಮೆಷಿನ್‌ ಕೈ ಕೊಟ್ಟಿತ್ತು. ಬಳಿಕ ದುರಸ್ತಿ ಮಾಡಿಕೊಂಡು ಬರುವುದಾಗಿ ಹೇಳಿ ಹೋಗಿದ್ದರು. ಜು. 26ರಂದು ಬೆಳಗ್ಗೆ ಮಿಷನ್‌ನೊಂದಿಗೆ ಬಂದಿದ್ದ ಅವರು ವಿದ್ಯುತ್‌ ಇಲ್ಲದೆ ಇರುವುದರಿಂದ ವಾಪಸ್‌ ಹೋಗಿದ್ದರು.

ಮಧ್ಯಾಹ್ನ ಕೆಲಸ ಮಾಡಲು ಕಂಪ್ರಷರ್‌ ಮಷಿನ್‌ಗೆ ವಯರ್‌ ಅಳವಡಿಸಿಕೊಂಡು ಕೆಲಸ ಮಾಡುವಾಗ ವಿದ್ಯುತ್‌ ಶಾಕ್‌ ಹೊಡೆದು ಮೃತಪಟ್ಟಿದ್ದಾರೆ. ಅವರು ಮಿಷನ್‌ ಎಳೆದುಕೊಂಡು ಬರುತ್ತಿರುವಾಗ ವಿದ್ಯುತ್‌ ಶಾಕ್‌ ತಗಲಿತ್ತು. ಈ ಸಂದರ್ಭ ಹೊರಗಡೆ ಇಬ್ಬರು ವಾಹನ ಚಾಲಕರು ನಿಂತಿದ್ದರು. ಅವರಿಗೆ ಯಾವುದೇ ಶಬ್ದ, ಕಿರುಚಾಟ ಕೂಡ ಕೇಳಿಸಲಿಲ್ಲ. ಸಂದೀಪ್‌ ಹೊರಗೆ ಬಾರದಿದ್ದನ್ನು ನೋಡಲು ಹೋದಾಗ ಅವಘಡ ಸಂಭವಿಸಿರುವುದು ಬೆಳಕಿಗೆ ಬಂದಿದೆ.