US: ಬ್ಯಾಟರಿ, ಸ್ಕ್ರೂ ತಿನ್ನಿಸಿ ಸ್ನೇಹಿತನ ಮಗುವನ್ನೇ ಕೊಂದಳು!

Team Udayavani, Jan 14, 2024, 10:02 PM IST

ವಾಷಿಂಗ್ಟನ್‌: ಒಂದೂವರೆ ವರ್ಷದ ಮಗುವಿಗೆ ಮಹಿಳೆಯೊಬ್ಬಳು ಬ್ಯಾಟರಿ, ಸ್ಕ್ರೂ , ನೈಲ್‌ಪಾಲಿಶ್‌ ರಿಮೂವರ್‌ನಂಥ ವಿಷಕಾರಿ ವಸ್ತುಗಳನ್ನು ತಿನ್ನಿಸಿ ಹತ್ಯೆಗೈದಿರುವ ಅಮಾನುಷ ಘಟನೆ ಅಮೆರಿಕದ ಪೆನ್ಸಿಲ್ವೇನಿಯಾದಲ್ಲಿ ವರದಿಯಾಗಿದೆ. 2023ರ ಜೂನ್‌ನಲ್ಲಿ ಬೈಲಿ ಜಾಕೋಬಿ ಎಂಬವರ 18 ತಿಂಗಳ ಮಗುವನ್ನು ಆಸ್ಪತ್ರೆಗೆ ದಾಖಲಿಸಲಾಗಿತ್ತು.

ಆ ಮಗು ಅಂಗಾಂಗ ವೈಫ‌ಲ್ಯದಿಂದ ಆಗಲೇ ಮೃತಪಟ್ಟಿತ್ತು. ಇದ್ದಕ್ಕಿದ್ದಂತೆ ಮಗು ಅನಾರೋಗ್ಯಕ್ಕೀಡಾಗಿ ಮೃತಪಟ್ಟಿದ ಹಿನ್ನೆಲೆಯಲ್ಲಿ ಪ್ರಕರಣ ದಾಖಲಿಸಿ ತನಿಖೆ ನಡೆಸಲಾಗಿದ್ದು, ಇದೀಗ ನಿಜಾಂಶ ಬಯಲಿಗೆ ಬಂದಿದೆ. ಜಾಕೋಬಿ ಅವರ ಗೆಳತಿ ಅಲೆಸಿಯಾ ಓವನ್ಸ್‌ ಮಗುವನ್ನು ಕೊಲ್ಲುವ ಉದ್ದೇಶದಿಂದಲೇ ಈ ವಿಷಕಾರಿ ಅಂಶಗಳ ಬಗ್ಗೆ ಎಲ್ಲಾ ಸಂಶೋಧಿಸಿ, ಮಗುವಿಗೆ ತಿಂಗಳುಗಟ್ಟಲೆ ವಿಷ ಪ್ರಾಶನ ಮಾಡಿದ್ದಾಳೆ. ಇದರಿಂದ ಮಗುವಿನ ರಕ್ತದಲ್ಲಿ ಅಸಿಟೋನ್‌ ಎಂಬ ಅಂಶ ಹೆಚ್ಚಾಗಿ ಮಗು ಮೃತಪಟ್ಟಿದೆ ಎಂದು ಪೊಲೀಸರು ತಿಳಿಸಿದ್ದಾರೆ.