ಸದಾ ನೆನಪಿನಲ್ಲಿ ಉಳಿಯುವಂತಾದ ಪುನೀತ್ ಜೋಯಿಡಾ ಭೇಟಿ

Team Udayavani, Nov 7, 2021, 2:27 PM IST

ಜೋಯಿಡಾ: ಕನ್ನಡದ ಎಲ್ಲರ ಮೆಚ್ಚುಗೆಯ ನಟ ಪುನೀತ್ ರಾಜಕುಮಾರ್ ಅವರ ಅಗಲಿಕೆಯ ನೋವಿನಿಂದ ಇನ್ನೂ ಹೊರಬರಲಾಗದಿದ್ದರೂ, ಅವರ ಜೀವನದಲ್ಲಿ ನಡೆದು ಬಂದ ಹಾದಿ, ಆಯಾಯ ಊರಿಗೆ ಭೇಟಿ ನೀಡಿದ ಕ್ಷಣಗಳು ಇನ್ನೂ ಅಚ್ಚಳಿಯದೆ ಸ್ಮರಣೆಗೆ ಬರುತ್ತಿರುವುದರ ಜೊತೆಯಲ್ಲಿ ಅವರ ಅಪರೂಪದ ಭೇಟಿಗಳ ದೃಶ್ಯಗಳು ಸಾಮಾಜಿಕ ಜಾಲತಾಲಗಳಲ್ಲಿ ವೈರಲ್ ಆಗುತ್ತಿವೆ. ಅಂತಹದ್ದೆ ವಿಡಿಯೋ ಒಂದು ಜೋಯಿಡಾ ತಾಲೂಕಿನೆಲ್ಲೆಡೆ ಸಾಮಾಜಿಕ ಜಾಲತಾಣದ ಮೂಲಕ ವೈರಲ್ ಆಗುತ್ತಿದೆ.

ಕಳೆದ 6 ತಿಂಗಳ ಹಿಂದೆ ವನ್ಯಜೀವಿ ಇಲಾಖೆಗೆ ಸಂಬಂಧಪಟ್ಟಂತೆ ಸಾಕ್ಷ್ಯಚಿತ್ರಕ್ಕಾಗಿ ಜೋಯಿಡಾಕ್ಕೆ ಆಗಮಿಸಿದ್ದ ಪುನೀತ್ ರಾಜಕುಮಾರ್, ಜೋಯಿಡಾ ತಾಲೂಕು ಕೇಂದ್ರದಲ್ಲಿರುವ ಬ್ರಹ್ಮಕುಮಾರಿ ಈಶ್ವರಿ ವಿದ್ಯಾಲಯ ಕೇಂದ್ರಕ್ಕೆ ಭೇಟಿ ನೀಡಿ, ಕೇಂದ್ರದ ಕಾರ್ಯಚಟುವಟಿಕೆಗಳ ಬಗ್ಗೆ ಮಾಹಿತಿಯನ್ನು ಪಡೆದುಕೊಂಡಿದ್ದರು. ಬ್ರಹ್ಮಕುಮಾರಿ ಈಶ್ವರಿ ವಿದ್ಯಾಲಯದ ಕಾರ್ಯಚಟುವಟಿಕೆಗಳ ಬಗ್ಗೆ ಆ ಸಂದರ್ಭದಲ್ಲಿ ಮೆಚ್ಚುಗೆಯನ್ನು ವ್ಯಕ್ತಪಡಿಸಿದ್ದರು.

ಇದನ್ನೂ ಓದಿ: ಟೀಂ ಇಂಡಿಯಾ ಮುಂದಿನ ನಾಯಕನ ಹೆಸರು ಸೂಚಿಸಿದ ನೆಹ್ರಾ: ರೋಹಿತ್,ರಾಹುಲ್, ಪಂತ್ ಪಟ್ಟಿಯಲ್ಲಿಲ್ಲ

ಸಹಾಯಕ ಉಪ ಅರಣ್ಯ ಸಂರಕ್ಷಣಾಧಿಕಾರಿ ಶಿವಾನಂದ ತೋಡ್ಕರ್, ಈಶ್ವರಿ ವಿದ್ಯಾಲಯದ ಸಂಚಾಲಕಿ ಬಿ.ಕೆ.ಗೀತಕ್ಕ, ವಿದ್ಯಾಧಿರಾಜ, ಸುನೀತಾ ಬಾಂದೇಕರ ಹಾಗೂ ಊರ ನಾಗರೀಕರು ಮತ್ತು ಕೇಂದ್ರದ ಸದಸ್ಯರುಗಳು ಪುನೀತ್ ಭೇಟಿಯ ವೇಳೆ ಉಪಸ್ಥಿತರಿದ್ದು, ಇದೀಗ ಪುನೀತ್ ಅವರ ಸರಳ ಸಹೃದಯಿ ನಡವಳಿಕೆಗಳನ್ನು ಸ್ಮರಿಸಿಕೊಳ್ಳುತ್ತಿದ್ದಾರೆ.