Vitla: ಜೆಸಿಬಿ ಬಿಡಿಭಾಗಗಳ ಕಳವು- ಆಟೋ ಬೆನ್ನಟ್ಟಿ ಮೂವರಿಗೆ ಹಲ್ಲೆ

Team Udayavani, Oct 27, 2023, 12:05 AM IST

ವಿಟ್ಲ: ಜೆಸಿಬಿ ಬಿಡಿಭಾಗ ಗಳನ್ನು ಕಳವುಗೈದು ಮಾರಾಟ ಮಾಡಲು ಯತ್ನಿಸುತ್ತಿದ್ದವರನ್ನು ಬೆನ್ನಟ್ಟಿ, ಅವರು ಚಲಾಯಿಸುತ್ತಿದ್ದ ಆಟೋವನ್ನು ತಡೆದು ಜಖಂ ಮಾಡಿ, ಅದರಲ್ಲಿದ್ದ ಮೂವರಿಗೆ ಹಲ್ಲೆ ನಡೆಸಿ ತಂಡವೊಂದು ಪೊಲೀಸರಿಗೊಪ್ಪಿಸಿದ ಘಟನೆ ವಿಟ್ಲ ಠಾಣಾ ವ್ಯಾಪ್ತಿಯಲ್ಲಿ ಅ. 26ರಂದು ಸಂಭವಿಸಿದೆ. ಘಟನೆಯ ಫೋಟೊ ಮತ್ತು ವೀಡಿಯೋ ಸಾಮಾಜಿಕ ಜಾಲತಾಣದಲ್ಲಿ ವೈರಲ್‌ ಆಗಿದೆ . ಆದರೆ ಠಾಣೆಯಲ್ಲಿ ಪ್ರಕರಣ ದಾಖಲಾಗಿಲ್ಲ.

ಜೆಸಿಬಿಯ ಬಿಡಿಭಾಗ ಕದ್ದು ಮಾರಾಟ ಮಾಡುತ್ತಿರುವ ಸಾಲೆತ್ತೂರು ಗ್ರಾಮದ ಮೆದು ನಿವಾಸಿ ಮತ್ತು ಬಿಹಾರ ಹಾಗೂ ಜಾರ್ಖಂಡ್‌ ಮೂಲದ ಒಟ್ಟು ಮೂವರನ್ನು ತಂಡವು ಪೊಲೀಸರಿಗೆ ಒಪ್ಪಿಸಿದೆ ಎನ್ನಲಾಗಿದೆ. ಆದರೆ ಇತ್ತಂಡಗಳು ಅಪರಾಧ ಕೃತ್ಯ ಎಸಗಿದ ಹಿನ್ನೆಲೆಯಲ್ಲಿ ಪರಸ್ಪರ ಇತ್ಯರ್ಥ ಮಾಡಿಕೊಂಡಿದ್ದಾರೆಂದು ಹೇಳಲಾಗುತ್ತಿದೆ.

ಕನ್ಯಾನ ಸಮೀಪ ಜೆಸಿಬಿ ಬಿಡಿಭಾಗಗಳನ್ನು ಕಳವುಗೈದು, ಬಳಿಕ ಅದನ್ನು ಮಾರಾಟ ಮಾಡಲು ಕಳ್ಳರು ವಿಟ್ಲದ ಗುಜರಿ ಅಂಗಡಿಗೆ ಬಂದಿದ್ದಾರೆ. ಈ ಮಾಹಿತಿ ದೊರೆತು ಕಳವುಗೈದ ವಸ್ತುಗಳನ್ನು ಹುಡುಕಿಕೊಂಡು ತಂಡವೊಂದು ಅಲ್ಲಿಗೆ ಬಂದಿತ್ತು. ತಂಡವನ್ನು ನೋಡಿದ ಮೂವರು ಆಟೋದಲ್ಲಿ ಪರಾರಿಯಾಗಲು ಯತ್ನಿಸಿದ್ದರು. ಈ ವೇಳೆ ಬೆನ್ನಟ್ಟಿದ ತಂಡ ಆಟೋರಿ ಕ್ಷಾ ಸಹಿತ ಮೂವರನ್ನೂ ಕಡಂಬು ಸಮೀಪ ಅಡ್ಡಗಟ್ಟಿದ್ದಾರೆ. ಆಟೋವನ್ನು ಪುಡಿಗೈದು ಅದರಲ್ಲಿದ್ದವರಿಗೆ ಹಲ್ಲೆ ನಡೆಸಿ ವಿಟ್ಲ ಠಾಣಾ ಪೊಲೀಸರ ವಶಕ್ಕೆ ಒಪ್ಪಿಸಿದ್ದಾರೆ.

ಕಳವಾದ ಬಿಡಿಭಾಗಗಳು ಮರಳಿ ಸಿಕ್ಕಿದ್ದರಿಂದ ಜೆಸಿಬಿ ಮಾಲಕರು ದೂರು ನೀಡಿಲ್ಲ ಮತ್ತು ಹಲ್ಲೆಗೊಳಗಾದ ಆರೋಪಿಗಳೂ ಕೂಡ ದೂರು ನೀಡಲು ಆಸಕ್ತಿ ತೋರಿಸಿಲ್ಲ ಎನ್ನಲಾಗಿದೆ.