ಐಸಿಸ್‌ ನಂಟು ಹೊಂದಿದ್ದಾತ ವಶಕ್ಕೆ

Team Udayavani, Aug 3, 2023, 6:54 AM IST

ಮುಂಬೈ: ಉಗ್ರ ಸಂಘಟನೆ ಐಸಿಸ್‌ ನಿರ್ದೇಶನದ ಮೇರೆಗೆ ಮಹಾರಾಷ್ಟ್ರದಲ್ಲಿ ಮುಂಬೈ ದಾಳಿಗಿಂತಲೂ ಭೀಕರವಾದ ಭಯೋತ್ಪಾದಕ ಕೃತ್ಯಗಳನ್ನು ನಡೆಸಲು ಸಂಚು ರೂಪಿಸಿದ ಆರೋಪದ ಮೇಲೆ ರಾಷ್ಟ್ರೀಯ ತನಿಖಾ ಸಂಸ್ಥೆ (ಎನ್‌ಐಎ) ಇತ್ತೀಚೆಗೆ ಬಂಧಿಸಿದ್ದ ಆರೋಪಿಗಳ ಪೈಕಿ ಜುಲ್ಫಿಕರ್‌ ಅಲಿಯನ್ನು ಪುಣೆ ಭಯೋತ್ಪಾದನೆ ನಿಗ್ರ ಘಟಕದ (ಎಟಿಎಸ್‌) ಅಧಿಕಾರಿಗಳು ವಶಕ್ಕೆ ಪಡೆದಿದ್ದಾರೆ. ಈತ ರಾಜ್ಯದಲ್ಲಿ ಬಾಂಬ್‌ ತಯಾರಿಕೆಯಲ್ಲಿನ ಮಾಸ್ಟರ್‌ ಮೈಂಡ್‌ ಆಗಿ ಕೆಲಸ ಮಾಡುತ್ತಿದ್ದಾನೆಂಬ ಶಂಕೆಯೂ ವ್ಯಕ್ತವಾಗಿದೆ.

ಜು.3ರಂದು ಎನ್‌ಐಎ ಜುಲ್ಫಿಕರ್‌ ಅಲಿ ಸೇರಿ ನಾಲ್ವರನ್ನು ಬಂಧಿಸಿತ್ತು. ಇದಾದ ಬಳಿಕ ಐಸಿಸ್‌ನ ಎಸ್‌ಯುಎಫ್ಎ ಎಂಬ ಘಟಕದ ಪರವಾಗಿ ಕೆಲಸ ಮಾಡುತ್ತಿದ್ದಾರೆಂಬ ಆರೋಪದ ಮೇರೆಗೆ ಜುಲೈ 18ರಂದು ಮೊಹಮ್ಮದ್‌ ಇಮ್ರಾನ್‌ ಮತ್ತು ಮೊಹಮ್ಮದ್‌ ಯೂನಸ್‌ ಎಂಬವರನ್ನು ಪುಣೆ ಎಟಿಎಸ್‌ ಅಧಿಕಾರಿಗಳು ಬಂಧಿಸಿದ್ದರು. ಈ ಬೆನ್ನಲ್ಲೇ ಸಿನಾಮ್‌ ನಜರುದ್ದೀನ್‌ ಖಾಜಿ ಎಂಬವನನ್ನು ಕಳೆದ ಶುಕ್ರವಾರ ಬಂಧಿಸಲಾಗಿದ್ದು, ಆತನ ತನಿಖೆಯು ಬಾಂಬ್‌ ತಯಾರಿಕೆಯಲ್ಲಿ ಶಹನವಾಜ್‌ ಆಲಂ ಮತ್ತು ಜುಲ್ಫಿಕರ್‌ ಇಬ್ಬರೂ ಬಾಂಬ್‌ ತಯಾರಿಕೆಯ ರೂವಾರಿಗಳು ಎನ್ನುವಂಥ ಸಂಶಯ ಮೂಡಿಸಿದೆ.

ಈ ಹಿನ್ನೆಯಲ್ಲಿ ಜುಲ್ಫಿಕರ್‌ನನ್ನು ವಿಚಾರಣೆ ನಡೆಸಿ, ನಿಜವಾದ ಮಾಸ್ಟರ್‌ ಮೈಂಡ್‌ನ‌ನ್ನು ಪತ್ತೆಹಚ್ಚಲು ಎಟಿಎಸ್‌ ಆತನನ್ನು ವಶಕ್ಕೆ ಪಡೆದಿರುವುದಾಗಿ ಹೇಳಿದೆ.
ಇದಕ್ಕೂ ಮುನ್ನ ಜು.31ರಂದು ಇದೇ ಪ್ರಕರಣ ಸಂಬಂಧಿಸಿದಂತೆ ಉಗ್ರರ ತಂಡ ಬಾಂಬ್‌ ತಯಾರಿಸುತ್ತಿದ್ದ ತಂಡವನ್ನು ಎಟಿಎಸ್‌ ಭೇದಿಸಿ, ಅಲ್ಲಿ ಬಾಂಬ್‌ ತಯಾರಿಕೆಗೆ ಬಳಸುವ ಲ್ಯಾಬ್‌ ಉಪಕರಣಗಳು, ರಾಸಾಯನಿಕಗಳು ಸೇರಿದಂತೆ ಹಲವು ವಸ್ತುಗಳನ್ನು ಪತ್ತೆಹಚ್ಚಿತ್ತು. ಉಗ್ರರು ಗೆರಿಲ್ಲಾ ಮಾದರಿಯಲ್ಲಿ ಭಯೋತ್ಪಾದಕ ಕೃತ್ಯ ನಡೆಸಲು ಯೋಜಿಸಿದ್ದರೆಂಬುದೂ ತಿಳಿದುಬಂದಿತ್ತು.