ಕೋವಿಡ್‌-19 ಉತ್ತರ ಯೆಮನ್‌ನಲ್ಲಿ ಮೊದಲ ಸಾವು

Team Udayavani, May 7, 2020, 10:14 AM IST

ಹೌತಿ: ಹೌತಿ ಆಡಳಿತಕ್ಕೆ ಒಳಪಡುವ ಉತ್ತರ ಯೆಮನ್‌ನಲ್ಲಿ ಮೊದಲ ಕೋವಿಡ್‌-19 ಸಾವು ಪ್ರಕರಣ ದಾಖಲಾಗಿದ್ದು, ಸನಾ ನಗರದ ಹೊಟೇಲ್‌ನಲ್ಲಿ ಸೋಂಕಿತ ವ್ಯಕ್ತಿ ಮೃತಪಟ್ಟಿದ್ದಾನೆ. ಘಟನೆ ಕುರಿತು ಅಧಿಕಾರಿಗಳು ದೃಢಪಡಿಸಿದ್ದು, ಮೃತ ವ್ಯಕ್ತಿಯನ್ನು ಸೊಮಾಲಿ ಪ್ರಜೆ ಎಂದು ಗುರುತಿಸಲಾಗಿದೆ.

ರಾಜಧಾನಿ ಸನಾದಲ್ಲಿ ಕಾರ್ಯಾಚರಿಸುತ್ತಿರುವ ಆ ಹೊಟೇಲ್‌ ಕುರಿತು ಮಾಹಿತಿ ಕಲೆ ಹಾಕುತ್ತಿದ್ದು, ಘಟನೆ ತಿಳಿಯುತ್ತಿದ್ದಂತೆ ತತ್‌ಕ್ಷಣ ಸಾಂಕ್ರಾಮಿಕ ರೋಗಶಾಸ್ತ್ರೀಯ ತನಿಖಾ ತಂಡ ಸ್ಥಳಕ್ಕೆ ಭೇಟಿ ನೀಡಿ ತನಿಖೆ ನಡೆಸಿರುವುದಾಗಿ ಹೌತಿ ಸರಕಾರದ ಪ್ರತಿನಿಧಿ ಸ್ಥಳೀಯ ಮಾಧ್ಯಮಕ್ಕೆ ತಿಳಿಸಿದ್ದಾರೆ ಎಂದು ಅಲ್‌ಜಜೀರಾ ವರದಿ ಮಾಡಿದೆ.

ಮೃತಪಟ್ಟ ಆ ಸೊಮಾಲಿ ಸೋಂಕಿತ ವ್ಯಕ್ತಿ ಹೃದ್ರೋಗ ಮತ್ತು ಮೂತ್ರಪಿಂಡದ ಸಮಸ್ಯೆಗಳಿಂದ ಬಳಲುತ್ತಿದ್ದ ಎನ್ನಲಾಗುತ್ತಿದೆ.
ಅರೇಬಿಯನ್‌ ಪೆನಿನ್ಸುಲಾದ ಭಾಗದಲ್ಲಿರುವ ಯೆಮೆನ್‌, ಆಫ್ರಿಕಾ ಮತ್ತಿತ್ತರ ಪ್ರದೇಶಗಳಿಂದ ವಲಸೆ ಬರುವ ಕಾರ್ಮಿಕರಿಗೆ ಮತ್ತು ನಿರಾಶ್ರಿತರಿಗೆ ಒಂದು ಆಶ್ರಯ ತಾಣವಾಗಿದೆ. ಈ ಪ್ರದೇಶ ಮೂಲ ಸೌಕರ್ಯಗಳ ಕೊರತೆಯಿಂದ ಬಳಲುತ್ತಿದೆ.

ಎಪ್ರಿಲ್‌ 10 ರಂದು ತನ್ನ ಮೊದಲ ಕೋವಿಡ್‌-19 ಸೋಂಕು ಪ್ರಕರಣವನ್ನು ಪ್ರಕಟಿಸಿದ ಕೆಲ ರಾಷ್ಟ್ರಗಳ ಪೈಕಿ ಯೆಮೆನ್‌ ಕೂಡ ಒಂದಾಗಿದ್ದು,, ಪ್ರತ್ಯೇಕ ಆಡಳಿತವನ್ನು ನಡೆಸುತ್ತಿರುವವ ಏಡನ್‌ ಪ್ರದೇಶ ಸೇರಿ ಒಟ್ಟು 21 ಪ್ರಕರಣಗಳು ಇದುವರೆಗೆ ದಾಖಲಾಗಿವೆ. ಈ ಪೈಕಿ ಮೂವರು ಮೃತಪಟ್ಟಿದ್ದಾರೆ. ಹೌತಿ ಪ್ರದೇಶದ ವ್ಯಾಪ್ತಿಯಲ್ಲಿ ಒಂದು ಪ್ರಕರಣ ದಾಖಲಾಗಿದ್ದು, ಆ ಸೋಂಕಿತ ವ್ಯಕ್ತಿ ಮೃತಪಟ್ಟಿದ್ದಾನೆ.