‘ನಮಸ್ಕಾರ ದೇವ್ರು..’ ಹೊಸ ವಿಡಿಯೋ ಮೂಲಕ ʼಅಯೋಧ್ಯೆ ದರ್ಶನʼ ಮಾಡಿಸಿದ ಡಾಕ್ಟರ್‌ ಬ್ರೋ

Team Udayavani, Jan 1, 2024, 6:03 PM IST

ಬೆಂಗಳೂರು: ಜಗತ್ತಿನ ನಾನಾ ದೇಶ ಸುತ್ತು, ಅಲ್ಲಿನ ವಿಶಿಷ್ಟ – ವಿಶೇಷಗಳನ್ನು ಹಂಚಿಕೊಳ್ಳುವ ಡಾಕ್ಟರ್‌ ಬ್ರೋ ಖ್ಯಾತಿಯ ವ್ಲಾಗರ್‌ ಗಗನ್‌ ಶ್ರೀನಿವಾಸ್‌ ಬಹು ಸಮಯದ ಬಳಿಕ ಹೊಸ ವಿಡಿಯೋದೊಂದಿಗೆ ಯೂಟ್ಯೂಬ್‌ ಗೆ ಮರಳಿದ್ದಾರೆ.

ನಮಸ್ಕಾರ ದೇವ್ರು.. ಎನ್ನುತ್ತಲೇ ಜಗತ್ತಿನ ನಾನಾ ದೇಶ ಸುತ್ತುವ ಮೂಲಕ, ಕನ್ನಡಿಗರ ಮನ ಗೆದ್ದಿರುವ ಗಗನ್‌ ಕಳೆದ ಕೆಲ ಸಮಯದಿಂದ ಯೂಟ್ಯೂಬ್‌ ನಲ್ಲಿ ಯಾವ ವಿಡಿಯೋವನ್ನು ಕೂಡ ಹಾಕಿರಲಿಲ್ಲ.

ಎರಡು ತಿಂಗಳ ಹಿಂದೆ ಅವರು, ಚೀನಾ ದೇಶದ ವಿಡಿಯೋವನ್ನು ಮಾಡಿದ್ದರು. ಈ ವೇಳೆ ಅವರು ಅಲ್ಲಿನ ಶೈಕ್ಷಣಿಕ ವ್ಯವಸ್ಥೆ ಹಾಗೂ ಭಾರತದ ಶೈಕ್ಷಣಿಕ ವ್ಯವಸ್ಥೆಯ ಬಗ್ಗೆ ಮಾತನಾಡಿದ್ದರು. ಇದರಿಂದ ಕೆಲವರು ಗರಂ ಆಗಿದ್ದರು. ಕೆಲವರಿಂದ ಈ ಮಾತಿಗೆ ಆಕ್ಷೇಪ ವ್ಯಕ್ತವಾಗಿತ್ತು. ಆ ಬಳಿಕ ಅವರು ಯಾವ ವಿಡಿಯೋವನ್ನು ಹಾಕಿರಲಿಲ್ಲ.

ಆದರೆ ಕಳೆದ ಕೆಲ ದಿನಗಳ ಹಿಂದಷ್ಟೇ ಬಿಹಾರದಲ್ಲಿರುವ ಫೋಟೋವನ್ನು ಹಂಚಿಕೊಂಡು ಶೀಘ್ರದಲ್ಲಿ ಬರುವುದಾಗಿ ಹೇಳಿದ್ದರು. ಅದರಂತೆ ಹೊಸ ವರ್ಷದಂದು ಗಗನ್‌ ʼಅಯೋಧ್ಯೆ ದರ್ಶನʼ ಮಾಡಿಸಿದ್ದಾರೆ. ಶ್ರೀರಾಮನ ಜನ್ಮಭೂಮಿಯ ಸ್ಥಳದಲ್ಲಿ ಡಾಕ್ಟರ್‌ ಬ್ರೋ ತಮ್ಮ ಕ್ಯಾಮರಾ ಹಿಡಿದು, ದೇಶಿ ಶೈಲಿಯ ಉಡುಗೆಯಲ್ಲಿ ಮಿಂಚಿದ್ದಾರೆ.

ಸರಯೂ ನದಿ ತೀರದಿಂದ ಆರಂಭವಾಗುವ ಅವರ ವಿಡಿಯೋದಲ್ಲಿ ಅಯೋಧ್ಯೆಯ ನಾನಾ ವಿಚಾರ – ವಿಷಯಗಳನ್ನು ಹೇಳಿದ್ದಾರೆ. ಡಾಕ್ಟರ್‌  ಬ್ರೋ ಕಂಬ್ಯಾಕ್‌ ಮಾಡಿರುವ ಈ ವಿಡಿಯೋಗೆ ಕೆಲವೇ ಗಂಟೆಯಲ್ಲಿ ಹೆಚ್ಚಿನ ವೀಕ್ಷಣೆ ಪಡೆದಿದೆ.