ತವರಿನಲ್ಲಿ ಜಯದ ತೇರೆಳೆಯಲು ಮುಂಬೈ ಸಜ್ಜು

Team Udayavani, Apr 13, 2019, 9:42 AM IST

ಮುಂಬಯಿ: ಈ ಬಾರಿಯ ಐಪಿಎಲ್‌ ಕೂಟದಲ್ಲಿ ರಾಜಸ್ಥಾನ್‌ ರಾಯಲ್ಸ್‌ ಮತ್ತು ಮುಂಬೈ ಇಂಡಿಯನ್ಸ್‌ ಮೊದಲ ಬಾರಿಗೆ ಮುಖಾಮುಖೀಯಾಗುತ್ತಿವೆ. ಶನಿವಾರದ ಮೊದಲ ಪಂದ್ಯದಲ್ಲಿ ಎರಡೂ ತಂಡಗಳು ವಾಂಖೆಡೆ ಅಂಗಣದಲ್ಲಿ ಸೆಣೆಸಲಿವೆ.

ಸತತ 3 ಪಂದ್ಯಗಳಲ್ಲಿ ಜಯಿಸಿ ಸಂಭ್ರಮಿ ಸುತ್ತಿರುವ ಮುಂಬೈ ಈ ಪಂದ್ಯದಲ್ಲೂ ಗೆಲುವಿನ ಓಟ ಮುಂದುವರಿಸುವ ನಿರೀಕ್ಷೆಯಲ್ಲಿದ್ದರೆ, ಅಂಕಪಟ್ಟಿಯಲ್ಲಿ ಏಳನೇ ಸ್ಥಾನದಲ್ಲಿರುವ ರಾಜಸ್ಥಾನ್‌ ಕೂಟದ 2ನೇ ಗೆಲುವಿಗಾಗಿ ಕಾಯುತ್ತಿದೆ. ರಾಜಸ್ಥಾನ್‌- ಮುಂಬೈ ಇಷ್ಟರ ವರೆಗೆ 19 ಬಾರಿ ಮುಖಾಮುಖೀಯಾಗಿದ್ದು. 10ರಲ್ಲಿ ಮುಂಬೈ ಗೆದ್ದರೆ 8 ಪಂದ್ಯಗಳನ್ನು ರಾಜಸ್ಥಾನ್‌ ಜಯಿಸಿದೆ. 1 ಪಂದ್ಯ ರದ್ದಾಗಿದೆ.

ಈ ಪಂದ್ಯ “ವಾಂಖೆಡೆ ಸ್ಟೇಡಿಯಂ’ ನಲ್ಲಿ ನಡೆಯುವುದರಿಂದ ಮುಂಬೈಗೆ ಇದು ತವರಿನ ಪಂದ್ಯ. ಇದರ ಲಾಭ ಮುಂಬೈ ಪಾಲಾಗಬಹುದು. ಇನ್ನೂ ತವರಿನಲ್ಲೇ ಸೋಲುತ್ತಿರುವ ರಾಜಸ್ಥಾನ್‌ ಗೆಲುವಿನ ಹುಡುಕಾಟದಲ್ಲಿದೆ. ಆಡಿದ 6 ಪಂದ್ಯಗಳಲ್ಲಿ 5ರಲ್ಲಿ ಈಗಾಗಲೇ ಸೋತಿರುವ ರಾಜಸ್ಥಾನಕ್ಕೆ ಇಲ್ಲಿ ಗೆಲುವು ಅನಿವಾರ್ಯವಾಗಿದೆ. ಈ ಪಂದ್ಯದಲ್ಲೇನಾದರೂ ರಾಜಸ್ಥಾನ್‌ ಎಡವಿದ್ದೇ ಆದರೆ ಪ್ಲೇ ಆಫ್ ಬಾಗಿಲು ಮುಚ್ಚಿದಂತೆ.  ಲಸಿತ್‌ ಮಾಲಿಂಗ ಮತ್ತೇ ಮುಂಬೈ ಬಳಗ ಸೇರಿರುವುದು ತಂಡಕ್ಕೆ ನೆರವಾಗಿದೆ. ನಾಯಕ ರೋಹಿತ್‌ ಶರ್ಮ ಮರಳಿ ನಾಯಕತ್ವ ವಹಿಸುವ ಸಾಧ್ಯತೆ ಇದೆ.