Muslim ಆ್ಯನಿಮೇಟೆಡ್‌ ವೀಡಿಯೋ ತೆಗದುಹಾಕಲು ಎಕ್ಸ್‌ಗೆ ಆಯೋಗ ಸೂಚನೆ

Team Udayavani, May 8, 2024, 11:10 AM IST

ಹೊಸದಿಲ್ಲಿ: ಮುಸ್ಲಿಂ ಮೀಸಲಾತಿಗೆ ಸಂಬಂಧಿಸಿ ಕರ್ನಾಟಕ ಬಿಜೆಪಿ ಘಟಕವು ತನ್ನ “ಎಕ್ಸ್‌’ ಖಾತೆಯಲ್ಲಿ ಹಂಚಿಕೊಂಡಿರುವ ಆ್ಯನಿಮೇಟೆಡ್‌ ವೀಡಿಯೋವನ್ನು ತತ್‌ಕ್ಷಣ ತೆಗದುಹಾಕುವಂತೆ ಚುನಾವಣ ಆಯೋಗ(ಇಸಿ)ವು ಟ್ವೀಟ ರ್‌ಗೆ ಮಂಗಳವಾರ ಸೂಚಿಸಿದೆ.

ಎಕ್ಸ್‌ ಸಂಸ್ಥೆಯ ನೋಡಲ್‌ ಆಫಿಸರ್‌ಗೆ ಈ  ಕುರಿತು ಆಯೋಗ ಪತ್ರ ಬರೆದಿದ್ದು, ಬಿಜೆಪಿ ಖಾತೆಯಲ್ಲಿ ಹಂಚಿಕೊಂಡಿರುವ ವೀಡಿಯೋವು ಮಾಹಿತಿ ಮತ್ತು ತಂತ್ರಜ್ಞಾನ ಕಾಯ್ದೆಯ ನಿಬಂಧನೆಗಳನ್ನು ಉಲ್ಲಂಘಿಸುತ್ತದೆ. ಈ ಹಿನ್ನೆಲೆಯಲ್ಲಿ ತತ್‌ಕ್ಷಣವೇ ವೀಡಿಯೋವನ್ನು ತೆಗೆದುಹಾಕಿ ಎಂದಿದೆ.

ವೀಡಿಯೋದಲ್ಲಿ ಏನಿದೆ?
ವೀಡಿಯೋದಲ್ಲಿ ರಾಹುಲ್‌ ಗಾಂಧಿ ಮತ್ತು ಖರ್ಗೆ ಅವರ ಕಾರ್ಟೂನ್‌ಗಳಿವೆ. ಎಸ್ಸಿ, ಎಸ್ಟಿ, ಒಬಿಸಿ ಎಂದು ಬರೆದಿರುವ ಮೂರು ಮೊಟ್ಟೆಗಳಿದ್ದ ಗೂಡಿಗೆ ರಾಹುಲ್‌ ಮುಸ್ಲಿಂ ಎಂದು ಬರೆದಿರುವ ದೊಡ್ಡ ಮೊಟ್ಟೆಯನ್ನು ತಂದಿಡುತ್ತಾರೆ. ಆ ಮೊಟ್ಟೆಗಳು ಒಡೆದು ಮರಿಯಾದ ಬಳಿಕ ಫಂಡ್ ಎಂದು ಬರೆದಿರುವ ಚೀಲವನ್ನು ಮುಸ್ಲಿಂ ಎಂಬ ಕೋಳಿ ಮರಿಗೆ ರಾಹುಲ್‌ ತಿನ್ನಿಸುತ್ತಾರೆ. ಬಳಿಕ ಆ ಕೋಳಿ ಮರಿಯು ಎಸ್ಸಿ, ಎಸ್ಟಿ, ಒಬಿಸಿ ಮರಿಗಳನ್ನು ಗೂಡಿನಿಂದ ಹೊರಗೆ ತಳ್ಳುತ್ತದೆ. ಅನಂತರ ರಾಹುಲ್‌, ಖರ್ಗೆ, ಮುಸ್ಲಿಂ ಕೋಳಿ ನಗುತ್ತಿರುವಂತೆ ಚಿತ್ರಿಸಲಾಗಿದೆ.