Gujarat ; ದಟ್ಟಾರಣ್ಯದಲ್ಲಿ ಒಬ್ಬ ಮತದಾರನಿಗಾಗಿ ಮತಗಟ್ಟೆ ಸ್ಥಾಪನೆ!

Team Udayavani, May 8, 2024, 10:29 AM IST

ಗಿರ್ ಸೋಮನಾಥ್: ಗುಜರಾತ್‌ನ 25 ಲೋಕಸಭಾ ಸ್ಥಾನಗಳಿಗೆ ಮಂಗಳವಾರ ಮತದಾನ ನಡೆಯಿತು. ಗುಜರಾತ್‌ನ ಗಿರ್ ಸೋಮನಾಥ್ ಜಿಲ್ಲೆಯ ಬನೇಜ್‌ನಲ್ಲಿನ ಏಕೈಕ ಮತದಾರ ತನಗಾಗಿ ಸ್ಥಾಪಿಸಿದ ಮತಗಟ್ಟೆಯಲ್ಲಿ ಹಕ್ಕು ಚಲಾಯಿಸಿದರು.

ಚುನಾವಣ ಆಯೋಗವು ಬನೇಜ್‌ನಲ್ಲಿ ವಿಶೇಷವಾಗಿ ಒಬ್ಬ ಮತದಾರರಿಗಾಗಿ ಮತಗಟ್ಟೆಯನ್ನು ಸ್ಥಾಪಿಸಿತ್ತು. ಗಿರ್ ಅರಣ್ಯ ಪ್ರದೇಶದ ಆಳದಲ್ಲಿರುವ ಬನೇಜ್‌ನ ದೇವಾಲಯದ ಅರ್ಚಕ ಮಹಂತ್ ಹರಿದಾಸ್ ಅವರು ಮತಗಟ್ಟೆಯಲ್ಲಿ ನೋಂದಾಯಿಸಲ್ಪಟ್ಟ ಏಕೈಕ ಮತದಾರರಾಗಿದ್ದು, ಜುನಾಗಢ್ ಲೋಕಸಭಾ ಕ್ಷೇತ್ರದ ಬೂತ್ ಅಧ್ಯಕ್ಷ ಸುರ್ಸಿನ್ಹ್ ಪಾಧಿಯಾರ್ ಅವರು ಒಂಟಿ ವ್ಯಕ್ತಿಗಾಗಿ ಮತಗಟ್ಟೆಯನ್ನು ಸ್ಥಾಪಿಸಲಾಗಿದೆ ಎಂದು ಹೇಳಿದರು.

ಬೆಳಗ್ಗೆ 11 ಗಂಟೆಗೆ ಬಂದು ಮತದಾನ ಮಾಡಿದ್ದು, ಬೂತ್‌ನಲ್ಲಿ ಶೇ 100ರಷ್ಟು ಮತದಾನವಾಗಿದೆ!!.

“ಪ್ರಜಾಪ್ರಭುತ್ವದಲ್ಲಿ ಎಲ್ಲರೂ ಮತದಾನ ಮಾಡಬೇಕು” ಎಂದು ಹರಿದಾಸ್ ಹಕ್ಕು ಚಲಾಯಿಸಿದ ನಂತರ ಸುದ್ದಿಗಾರರಿಗೆ ತಿಳಿಸಿದರು.