ಅ. 4ಕ್ಕೆ ಇಳಿಕೆಯಾಗುತ್ತಾ ಸಾಲದ ಮೇಲಿನ ಬಡ್ಡಿ?

Team Udayavani, Sep 30, 2019, 5:21 AM IST

ಮುಂಬಯಿ: ಭಾರತೀಯ ರಿಸರ್ವ್‌ ಬ್ಯಾಂಕ್‌ನ ತ್ತೈಮಾಸಿಕ ಸಾಲ ನೀತಿ ಪರಿಶೀಲನ ಸಭೆ ಅ. 2ರಿಂದ ಮುಂಬಯಿಯಲ್ಲಿ 3 ದಿನಗಳ ಕಾಲ ನಡೆಯಲಿದೆ.

ಅ. 4ರಂದು ಸಾಲಗಳ ಮೇಲಿನ ಬಡ್ಡಿ ದರ ಕಡಿಮೆ ಮಾಡುವ ನಿರ್ಧಾರ ಕೈಗೊಳ್ಳುವ ಸಾಧ್ಯತೆ ಇದೆ ಎಂದು ಹೇಳಲಾಗಿದೆ. ಈ ವರ್ಷದ ಜನವರಿಯಿಂದ ಈಚೆಗೆ ನಾಲ್ಕು ಬಾರಿ ರೆಪೋ ದರ ಕಡಿಮೆ ಮಾಡಿ ನಿರ್ಧಾರ ಕೈಗೊಂಡಿದೆ. ಅ. 1ರಿಂದ ರೆಪೋ ಆಧಾರಿತ ಬಡ್ಡಿ ದರದ ಅನ್ವಯವೇ ಸಾಲಕ್ಕೆ ಬಡ್ಡಿ ದರ ನಿಗದಿ ಮಾಡಬೇಕು ಎಂದು ಆರ್‌ಬಿಐ ಬ್ಯಾಂಕ್‌ಗಳಿಗೆ ಈಗಾಗಲೇ ಆದೇಶ ನೀಡಿರುವಂತೆಯೇ ತ್ತೈಮಾಸಿಕ ಸಭೆ ನಡೆಯಲಿದೆ.

ಮಧ್ಯಾಂತರ ಡಿವಿಡೆಂಡ್‌?: ಭಾರತೀಯ ರಿಸರ್ವ್‌ ಬ್ಯಾಂಕ್‌ನಿಂದ 30 ಸಾವಿರ ಕೋಟಿ ರೂ. ಮಧ್ಯಾಂತರ ಡಿವಿಡೆಂಡ್‌ ಅನ್ನು ಸರಕಾರ ವಿನಂತಿಸುವ ಸಾಧ್ಯತೆಯಿದೆ. ವಿತ್ತ ಕೊರತೆ ಗುರಿ ಶೇ. 3.3 ಅನ್ನು ಪೂರೈಸುವ ನಿಟ್ಟಿನಲ್ಲಿ ಆರ್‌ಬಿಐನಿಂದ ಈ ಮೊತ್ತವನ್ನು ಸರಕಾರ ಆಗ್ರಹಿಸುವ ಸಾಧ್ಯತೆಯಿದೆ. ಮಧ್ಯಾಂತರ ಡಿವಿಡೆಂಡ್‌ ಆಗ್ರಹಿಸುವುದರ ಜತೆಗೆ, ಬಂಡವಾಳ ಹಿಂತೆಗೆತ, ಸಣ್ಣ ಹೂಡಿಕೆಗಳ ಸಂಗ್ರಹದ ಉತ್ತಮ ಬಳಕೆಯ ಮೂಲಕ ಸರಕಾರ ನಿರ್ವಹಿಸುವ ಸಾಧ್ಯತೆಯಿದೆ ಎನ್ನಲಾಗಿದೆ.