ವಿಶ್ವ ಷೇರು ಮಾರುಕಟ್ಟೆಯಲ್ಲಿ ತಲ್ಲಣ

Team Udayavani, Sep 26, 2019, 4:59 AM IST

ಲಂಡನ್‌/ಮುಂಬೈ: ಅಮೆರಿಕ ಅಧ್ಯಕ್ಷ ಡೊನಾಲ್ಡ್‌ ಟ್ರಂಪ್‌ ಮಹಾಭಿಯೋಗ ಪ್ರಸ್ತಾಪವನ್ನು ಮಂಡಿಸಿದ ಹಿನ್ನೆಲೆಯಲ್ಲಿ ವಿಶ್ವ ಷೇರು ಮಾರುಕಟ್ಟೆ ಬುಧವಾರ ಕುಸಿತ ಕಂಡಿದೆ. ಎಸ್‌ಆ್ಯಂಡ್‌ಪಿ 500 ಸೂಚ್ಯಂಕವು ಶೇ. 0.11 ಹಾಗೂ ನಾಸ್‌ಡಾಕ್‌ ಕಾಂಪೊಸಿಟ್‌ ಶೇ. 0.26ರಷ್ಟು ಕುಸಿತ ಕಂಡಿದೆ. ಇದೇ ವೇಳೆ ಇದರ ಪರಿಣಾಮವಾಗಿ ಮುಂಬೈ ಷೇರು ಮಾರುಕಟ್ಟೆ ಕೂಡ ಕುಸಿದಿದೆ. ಬಿಎಸ್‌ಇ ಸೆನ್ಸೆಕ್ಸ್‌ 503.62 ಅಂಕ ಕುಸಿದಿದ್ದು, ದಿನದ ಅಂತ್ಯಕ್ಕೆ 35,593.52 ಗೆ ಇಳಿದಿದೆ. ನಿಫ್ಟಿ ಕೂಡ 148 ಅಂಕ ಇಳಿಕೆ ಕಂಡು, 11,440 ಕ್ಕೆ ತಲುಪಿದೆ.

ಈ ಮಧ್ಯೆ ಚಿನ್ನದ ಬೆಲೆ 10 ಗ್ರಾಮ್‌ಗೆ 162 ರೂ. ಏರಿಕೆಯಾಗಿ 39,182 ರೂ. ತಲುಪಿದೆ. ರೂಪಾಯಿ ಮೌಲ್ಯ ಕುಸಿತ ಮತ್ತು ಅಂತಾರಾಷ್ಟ್ರೀಯ ಬೆಲೆ ಏರಿಕೆಯಿಂದಾಗಿ ಚಿನ್ನದ ದರ ತುಟ್ಟಿಯಾಗಿದೆ. ಬೆಳ್ಳಿ ಕೂಡ ಏರಿಕೆಯಾಗಿದ್ದು, ಕಿಲೋಗೆ 95 ರೂ. ಏರಿ 39,020 ರೂ. ಆಗಿದೆ.

ಜಾಗತಿಕ ಕರೆನ್ಸಿಗಳ ಮೌಲ್ಯ ಅಮೆರಿಕದ ಡಾಲರ್‌ ಎದುರು ಕುಸಿಯುತ್ತಿರುವ ಹಿನ್ನೆಲೆಯಲ್ಲಿ ರೂಪಾಯಿ ಮೌಲ್ಯ ಬುಧವಾರ 3 ಪೈಸೆ ಕುಸಿದಿದೆ. ಭಾರತದ ಕರೆನ್ಸಿ ಮೌಲ್ಯ ಬುಧವಾರ 71.04 ರೂ. ಆಗಿದೆ. ದೇಶೀಯ ಷೇರುಪೇಟೆಯ ಕುಸಿತವೂ ಇದಕ್ಕೆ ಕಾರಣ ಎಂದು ವಿಶ್ಲೇಷಿಸಲಾಗುತ್ತಿದೆ.