ಬ್ಯಾಟರಿ ಚಾಲಿತ ರೈಲಿಗೆ ಭಾರತೀಯರ ಕೊಡುಗೆ!

Team Udayavani, Feb 25, 2021, 6:05 AM IST

ಹೊಸದಿಲ್ಲಿ: ಎಲೆಕ್ಟ್ರಿಕ್‌ ಕಾರುಗಳು ಹೆಚ್ಚುತ್ತಿವೆ. ಅತ್ತ ಅಮೆರಿಕದಲ್ಲಿ ವ್ಯಾಬ್‌ಟೆಕ್‌ ಕಂಪೆನಿಯು ಬ್ಯಾಟರಿ ಚಾಲಿತ ಎಲೆಕ್ಟ್ರಿಕ್‌ ರೈಲು ಎಂಜಿನ್‌ ನಿರ್ಮಿಸುತ್ತಿದೆ. ಇದನ್ನು ವಿನ್ಯಾಸಗೊಳಿಸುತ್ತಿರುವ ಎಂಜಿನಿಯರ್‌ಗಳ ತಂಡದಲ್ಲಿ 1,200 ಮಂದಿ ಭಾರತೀಯರಿರುವುದು ವಿಶೇಷ. ಕ್ಯಾಲಿಫೋರ್ನಿಯದಲ್ಲಿ ಈ ಎಂಜಿನ್‌ನ ಪರೀಕ್ಷೆ ನಡೆಯುತ್ತಿದೆ.

ಈ ಎಂಜಿನ್‌ನ ಬಹುಭಾಗಗಳು ಭಾರತದಲ್ಲಿ ರೂಪುಗೊಳ್ಳುತ್ತಿವೆ ಎಂದು ವ್ಯಾಬ್‌ಟೆಕ್‌ ಇಂಡಿಯಾದ ಕಾರ್ಪೊರೆಟ್‌ ಉಪಾಧ್ಯಕ್ಷ ಗೋಪಾಲಕೃಷ್ಣ ಮದಭೂಷಿ ಹೇಳಿದ್ದಾರೆ.

ಮೈಲುಗಟ್ಟಲೆ ಉದ್ದದ, ಹಲವು ಎಂಜಿನ್‌ಗಳಿರುವ ಸರಕು ಸಾಗಣೆ ರೈಲಿನಲ್ಲಿ ಈ ಎಂಜಿನ್‌ ಬಳಕೆಯಾಗಲಿದೆ. ಮುಂದೆ ಮತ್ತು ಹಿಂದೆ ಡೀಸೆಲ್‌ ಎಂಜಿನ್‌ ಇದ್ದರೆ ನಡುವೆ ಬ್ಯಾಟರಿ ಚಾಲಿತ ಎಂಜಿನ್‌ ಇರಲಿದೆ. ಯಾವಾಗ ಯಾವ ಎಂಜಿನ್‌ ಕಾರ್ಯನಿರ್ವಹಿಸಬೇಕು ಎಂಬುದನ್ನು “ಸ್ಮಾರ್ಟ್‌ ಸಿಸ್ಟಮ್‌’ ನಿಯಂತ್ರಿಸಲಿದೆ.