ದಾಖಲೆ ಎತ್ತರದಿಂದ ಕುಸಿದ ಮುಂಬಯಿ ಶೇರು: 98 ಅಂಕ ನಷ್ಟ

Team Udayavani, Dec 27, 2017, 4:07 PM IST

ಮುಂಬಯಿ : ಡಿಸೆಂಬರ್‌ ತಿಂಗಳ ವಾಯಿದೆ ವಹಿವಾಟು ಇತ್ಯರ್ಥಗೊಳಿಸುವ ತಿಂಗಳ ಕೊನೇ ಗುರುವಾರದ ಮುನ್ನಾ ದಿನವಾದ ಇಂದು ಬುಧವಾರ ಕೊನೇ ತಾಸಿನಲ್ಲಿ ಅತ್ಯಂತ ಎಚ್ಚರಿಕೆ ನಡೆ ತೋರಲಾದ ಕಾರಣ ಮುಂಬಯಿ ಶೇರು ಪೇಟೆಯ ಸೆನ್ಸೆಕ್ಸ್‌ ಸೂಚ್ಯಂಕ ದಿನದ ವಹಿವಾಟನ್ನು 98.80 ಅಂಕಗಳ ನಷ್ಟದೊಂದಿಗೆ 33,911.81 ಅಂಕಗಳ ಮಟ್ಟದಲ್ಲಿ ಕೊನೆಗೊಳಿಸಿತು. 

ಇದೇ ರೀತಿ ರಾಷ್ಟ್ರೀಯ ಶೇರು ಮಾರುಕಟ್ಟೆಯ ನಿಫ್ಟಿ ಸೂಚ್ಯಂಕ 40.70 ಅಂಕಗಳ ನಷ್ಟಕ್ಕೆ ಗುರಿಯಾಗಿ ದಿನದ ವಹಿವಾಟನ್ನು 10,490.80 ಅಂಕಗಳ ಮಟ್ಟದಲ್ಲಿ ಕೊನೆಗೊಳಿಸಿತು.

ದಿನದ ವಹಿವಾಟಿನ ನಡುವೆ ಸೆನ್ಸೆಕ್ಸ್‌  34,000 ಅಂಕಗಳ ಗಡಿಯನ್ನು ಮತ್ತೆ ಪುನಃ ದಾಟಿ ಹೊಸ ಸಾರ್ವಕಾಲಿಕ ದಾಖಲೆಯ ಎತ್ತರವನ್ನು ತಲುಪುವ ಸಾಧನೆ ಮಾಡಿತ್ತು.

ಕೊನೇ ತಾಸಿನ ವಹಿವಾಟಿನಲ್ಲಿಂದು ಬ್ಯಾಂಕ್‌, ಆಟೋ ಮತ್ತು ಎಫ್ಎಂಸಿಜಿ ಶೇರುಗಳು ಸೂಚ್ಯಂಕಗಳನ್ನು ಕೆಳಕ್ಕೆ ಎಳೆದವು. 

ಮುಂಬಯಿ ಶೇರು ಪೇಟೆ (ಬಿಎಸ್‌ಇ) ಯಲ್ಲಿ ಇಂದು ವಹಿವಾಟಿಗೆ ಒಳಪಟ್ಟ ಒಟ್ಟು ಶೇರುಗಳ ಸಂಖ್ಯೆ 2,948. ಮುನ್ನಡೆ ಸಾಧಿಸಿದ ಶೇರುಗಳು 1,213; ಹಿನ್ನಡೆಗೆ ಗುರಿಯಾದವುಗಳು 1,532; ಯಾವುದೇ ಬದಲಾವಣೆ ಕಾಣದ ಶೇರುಗಳು 203.

ಲಿಬಿಯಾ ತೈಲ ಉತ್ಪಾದನಾ ಘಟಕದಲ್ಲಿ ಸಂಭವಿಸಿದ ಬ್ಲಾಸ್ಟ್‌ ಪರಿಣಾಮವಾಗಿ ಒಪೆಕ್‌ ತೈಲ ಉತ್ಪಾದನೆಯನ್ನು ನಿರ್ಬಂಧಿಸಿದ ಕಾರಣ ಇಂದು ಅಂತಾರಾಷ್ಟ್ರೀಯ ಕಚ್ಚಾ ತೈಲ ಬೆಲೆಗಳು ಗಮನಾರ್ಹವಾಗಿ ಏರಿದುದು ಕೂಡ ಶೇರು ಮಾರುಕಟ್ಟೆಗೆ ವ್ಯತಿರಿಕ್ತವಾಯಿತು.